Milli Birlik və Həmrəylik Tariximiz

Bakı:

1 °C

75 %

11 m/s

Əlaqə

AZ RU EN

Ana səhifə / YAP xəbərləri / Milli Birlik və Həmrəylik Tariximiz

Milli Birlik və Həmrəylik Tariximiz

30.12.2025 [19:47]

31 dekabr tarixi Azərbaycan xalqının milli birlik və həmrəylik rəmzi kimi tarixə düşmüşdür. Bu gün dünyanın müxtəlif ölkələrində yaşayan milyonlarla azərbaycanlını eyni duyğu, eyni məqsəd və eyni milli kimlik ətrafında birləşdirir. Dünya Azərbaycanlılarının Həmrəyliyi Günü xalqımızın birliyini, milli-mənəvi dəyərlərə bağlılığını və Vətən sevgisini ifadə edən mühüm bayramlardan biridir.

Tarix boyu azərbaycanlılar müxtəlif ölkələrə köç etsələr də, öz dilini, mədəniyyətini və adət-ənənələrini qoruyub saxlamışlar. Xaricdə yaşayan soydaşlarımız Azərbaycanı layiqincə təmsil edir, milli maraqlarımızın müdafiəsində fəal iştirak edirlər. Bu baxımdan 31 dekabr həm milli kimliyimizin yaşadılması, həm də azərbaycançılıq ideyasının möhkəmləndirilməsi baxımından böyük əhəmiyyət daşıyır.

Xalqımız, eləcə də dünyanın müxtəlif ölkələrində məskunlaşmış soydaşlarımız, hər il dekabrın 31-ni Dünya Azərbaycanlılarının Həmrəylik Gününü böyük həvəs və coşqu ilə qeyd edir. Bu bayram ildən-ilə daha geniş vüsət alır, daha geniş şəkildə keçirilir. Azərbaycanı özünə tarixi Vətən bilən hər bir şəxsin həmrəylik nümayiş etdirməsi qürurvericidir.

Naxçıvan Muxtar Respublikası Ali Məclisinin 1991-ci il dekabrın 16-da Ulu Öndər Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edilib. Dekabrın 25-də Ali Sovetin Milli Şurası müraciəti nəzərə alaraq, dekabrın 31-nin Dünya azərbaycanlılarının həmrəyliyigünü elan olunması barədə qanun qəbul edibvə artıq bütün azərbaycanlılar rəsmən bu günü bayram kimi qeyd edir.

31 dekabr tarixinin bütün dünya azərbaycanlılarının birlik, həmrəylik günü kimi hər il böyük təntənə və qürur hissi ilə qeyd olunduğunu bildirən Ulu Öndərin siyasi kursunun layiqli davamçısı, Azərbaycan Respublikasının Prezidenti İlham Əliyev demişdir: "Dünya azərbaycanlılarının həmrəyliyi və birliyi üçün Ulu Öndər çox böyük səylər göstərmişdir. Hələ 1991-ci ildə Naxçıvanda onun təşəbbüsü ilə 31 Dekabr Dünya Azərbaycanlılarının Həmrəylik Günü" kimi elan edilmişdir.

Azərbaycan Respublikasının Prezidenti İlham Əliyev “Dünya azərbaycanlılarının II qurultayının keçirilməsi haqqında” 2006-cı il 8 fevral tarixli Sərəncamına uyğun olaraq, həmin il martın 16-da Bakıda keçirilən növbəti mötəbər toplantı xaricdə yaşayan azərbaycanlıların diaspordan lobbiyə çevrilməsi istiqamətində yeni addım olmuş, ölkəmizlə bağlı həqiqətlərin dünya ictimaiyyətinə çatdırılması işində əhəmiyyətli rol oynamışdır.

Prezident İlham Əliyevin rəhbərliyi altında milli həmrəylik siyasəti yeni bir mərhələyə qədəm qoyub. Ölkə başçısı dünya azərbaycanlılarının maraqlarını müdafiə edən və onların vahid platforma ətrafında birləşməsini təmin edən müxtəlif təşəbbüslərlə çıxış edib. Dünya Azərbaycanlılarının Qurultaylarının keçirilməsi bu siyasətin mühüm komponentlərindən biridir. Bu qurultaylar dünya azərbaycanlılarını bir araya gətirərək, onların milli maraqlarını müzakirə etmək və müştərək layihələr həyata keçirmək üçün əhəmiyyətli bir platforma olub.

Xüsusilə, Müzəffər Ali Baş Komandan, Prezident İlham Əliyevin rəhbərliyi ilə 44 günlük Vətən müharibəsi dövründə, eləcə də, əldə olunan tarixi Zəfərlərdə dünya azərbaycanlılarının birliyi və həmrəyliyini açıq şəkildə göstərdi. Bu müddət ərzində dünya azərbaycanlıları maddi və mənəvi dəstək göstərərək, Azərbaycanın haqq işini beynəlxalq səviyyədə müdafiə etdilər.

Müqəddəs Vətən müharibəsi zamanı xaricdə yaşayan soydaşlarımızın düşmənin və anti-Azərbaycan dairələrin məkrli təxribatlarına qarşı cəsarətli etirazları, Azərbaycan həqiqətlərinin dünya ictimaiyyətinə çatdırılması işində fədakar xidmətləri Qələbəmizə layiqli töhfə olmuşdur.

Azərbaycanın ərazi bütövlüyünün qorunması, müstəqil dövlətimizə hər hansı təhlükənin, təcavüzün qarşısının alınması, onun demokratik, dünyəvi, hüquqi, milli bir dövlət olaraq inkişaf edib möhkəmləndirilməsi hər bir azərbaycanlının şərəfli vəzifəsi kimi bütün istəklərinin fövqündə durmalıdır. Azərbaycan dilinin, milli-əxlaqi dəyərlimizin, millət kimi formalaşdığımız tarixi Vətənimizin şərəfini qorumaq, harada yaşamasından asılı olmayaraq, bütün soydaşlarımızın ən yüksək həyat amalına çevrilməlidir. Çünki müstəqil Azərbaycan dövləti xalqımızın əldə etdiyi ən böyük nailiyyətidir. Dünya azərbaycanlılarının həmrəyliyi, birliyi müstəqil Azərbaycanın gələcəyinin qarantıdır.

“Hər bir insan üçün onun milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən azərbaycanlıyam!”–Ulu Öndər Heydər Əliyevin bu kəlamları hər bir həmvətənimiz üçün milli qürur rəmzinə çevrilmişdir.

YAP Naftalan şəhər təşkilatının sədri Rövlan Heydərov

Paylaş:

Baxılıb: 195 dəfə