Naxçıvana qarşı hücum: Regionda gərginliyi artıran təhlükəli addımdır.

Bakı:

25 °C

72 %

16 m/s

Əlaqə

AZ RU EN

Ana səhifə / YAP xəbərləri / Naxçıvana qarşı hücum: Regionda gərginliyi artıran təhlükəli addımdır.

Naxçıvana qarşı hücum: Regionda gərginliyi artıran təhlükəli addımdır.

06.03.2026 [16:05]

Martın 5-də Naxçıvan Muxtar Respublikasına qarşı həyata keçirilən pilotsuz uçuş aparatları ilə hücum Azərbaycan cəmiyyətində ciddi narahatlıq və qəzəb doğuran hadisə kimi yadda qaldı. Günorta saatlarında baş verən bu insident nəticəsində Muxtar Respublikanın bir sıra mülki obyektləri zərər gördü, o cümlədən Naxçıvan Beynəlxalq Hava Limanının ərazisi, terminal binası və digər mülki infrastrukturlar zərbə aldı. Hadisə nəticəsində yaralanan şəxslərin olması da bu hücumun nə qədər təhlükəli və qəbuledilməz olduğunu bir daha göstərdi. Mülki obyektlərin və insanların hədəfə alınması beynəlxalq hüququn fundamental prinsiplərinə zidd olmaqla yanaşı, regionda sabitlik və təhlükəsizlik üçün ciddi təhdid yaradır.

Azərbaycan dövləti bu hadisəyə dərhal və qəti reaksiya verdi. Xarici İşlər Nazirliyi və Müdafiə Nazirliyi tərəfindən yayılan rəsmi bəyanatlarda hücumun beynəlxalq hüququn norma və prinsiplərinin kobud şəkildə pozulması olduğu vurğulandı və bu cür addımların regionda gərginliyin artmasına xidmət etdiyi bildirildi. İran tərəfinin baş vermiş hadisə ilə bağlı operativ izahat verməsi və məsul şəxslərin müəyyən edilərək məsuliyyətə cəlb olunması tələb olundu. Bununla yanaşı, İranın Azərbaycandakı səfiri Xarici İşlər Nazirliyinə dəvət edilərək ona rəsmi etiraz bildirildi və diplomatik nota təqdim edildi.

Baş vermiş hadisə ölkə rəhbərliyi səviyyəsində də ciddi şəkildə müzakirə olundu. Prezident İlham Əliyevin sədrliyi ilə keçirilən Təhlükəsizlik Şurasının iclasında Naxçıvana qarşı edilən hücum sərt şəkildə pisləndi və bu addımın arxasında duran qüvvələrin müəyyən edilərək məsuliyyətə cəlb olunmasının vacibliyi vurğulandı. Dövlət başçısı açıq şəkildə bəyan etdi ki, belə bir hücum heç bir halda qəbul edilə bilməz və İran rəsmiləri baş verənlərlə bağlı aydın mövqe ortaya qoymalı, rəsmi izahat verməli və üzr istəməlidirlər.
Son illərdə baş verən hadisələr də göstərir ki, iki ölkə arasında münasibətlər bəzən gərgin mərhələlərdən keçib. Xüsusilə Azərbaycanın Tehrandakı səfirliyinə qarşı törədilmiş silahlı hücum bütün ölkə ictimaiyyətində dərin narahatlıq yaratmışdı. Həmin hadisə nəticəsində Azərbaycan vətəndaşı həyatını itirmiş, bir neçə nəfər yaralanmışdı.

Azərbaycan dəfələrlə bəyan edib ki, onun ərazisi heç bir qonşu dövlətə qarşı istifadə olunmayacaq və ölkəmiz regionda sabitlik və əməkdaşlığın tərəfdarıdır. Rəsmi Bakı hər zaman qonşu ölkələrlə qarşılıqlı hörmət və beynəlxalq hüquq prinsipləri əsasında münasibətlərin inkişaf etdirilməsini prioritet hesab edib.

Bununla yanaşı, Azərbaycan rəhbərliyi dəfələrlə humanist və konstruktiv mövqe nümayiş etdirib. Regionda gərginliklərin artdığı dövrlərdə belə Azərbaycan qonşularına qarşı düşmənçilik siyasəti yürütmədiyini açıq şəkildə bəyan edib. Son hadisələrdən əvvəl də ölkə rəhbərliyi tərəfindən İranla münasibətlərdə qarşılıqlı hörmət və əməkdaşlığın vacibliyi ifadə olunmuşdu.

Naxçıvana qarşı həyata keçirilən hücum isə göstərdi ki, regionda sabitliyin qorunması üçün bütün tərəflər daha məsuliyyətli davranmalı və təxribat xarakterli addımlardan çəkinməlidir. Azərbaycanın mövqeyi aydındır: ölkəmizin suverenliyi və ərazi bütövlüyü hər zaman qorunacaq və istənilən təhdidə adekvat cavab veriləcək.

Azərbaycan artıq əvvəlki illərlə müqayisədə daha güclü dövlətə çevrilib. Güclü iqtisadi potensial, modernləşdirilmiş ordu və milli birlik ölkəmizin təhlükəsizliyinin əsas təminatıdır. Dövlət başçısının dəfələrlə vurğuladığı kimi, Azərbaycan öz təhlükəsizliyini təmin etmək və milli maraqlarını qorumaq üçün bütün imkanlara malikdir.

Naxçıvana qarşı edilən bu hücum bir daha göstərdi ki, regionda sabitliyin qorunması üçün beynəlxalq hüququn norma və prinsiplərinə hörmət edilməlidir. Azərbaycan isə hər zaman olduğu kimi, sülhün, əməkdaşlığın və qarşılıqlı hörmətə əsaslanan münasibətlərin tərəfdarı olaraq qalır. Lakin eyni zamanda ölkəmiz öz təhlükəsizliyinə və vətəndaşlarının həyatına yönələn istənilən təhdidə qarşı qətiyyətli mövqe nümayiş etdirməkdə qərarlıdır.

Eldar Əsədov

YAP Tərtər rayon təşkilatının sədri

Paylaş:

Baxılıb: 339 dəfə