Azərbaycan–Avropa İttifaqı münasibətlərinin strateji əhəmiyyəti

Bakı:

17 °C

72 %

3 m/s

Əlaqə

AZ RU EN

Ana səhifə / YAP xəbərləri / Azərbaycan–Avropa İttifaqı münasibətlərinin strateji əhəmiyyəti

Azərbaycan–Avropa İttifaqı münasibətlərinin strateji əhəmiyyəti

16.03.2026 [10:55]

Azərbaycan ilə Avropa İttifaqı arasındakı əlaqələr son illərdə yeni səviyyəyə yüksəlib və tərəflər arasında həm siyasi, həm də iqtisadi əməkdaşlıq daha sistemli xarakter alıb. Xüsusilə enerji tədarükü və nəqliyyat sahəsində tərəfdaşlıq tərəflər arasında strateji maraqların formalaşmasını təmin edir və regionun iqtisadi və enerji təhlükəsizliyinə töhfə verir.

Belə bir fon üzərində 2026-cı il martın 11-də Avropa İttifaqı Şurasının Prezidenti Antonio Koşta Azərbaycana rəsmi səfər edib və Prezident İlham Əliyev ilə görüş keçirib. Görüş zamanı tərəflər qarşılıqlı əməkdaşlığın nəticələrini, həmçinin gələcək prioritet istiqamətləri müzakirə edib və bu barədə birgə mətbuat bəyanatı ilə ictimaiyyətə məlumat veriblər.

Dövlətimizin Başçısı birgə bəyanat zamanı bildirdi ki, Azərbaycan ilə Avropa İttifaqı arasında əməkdaşlıq müxtəlif sahələri əhatə edir və tərəflər arasında siyasi dialoq müntəzəm şəkildə davam edir. Dövlət başçısı qeyd etdi ki, Avropa İttifaqı Azərbaycanın əsas ticarət tərəfdaşlarından biridir və tərəflər arasında iqtisadi əlaqələr ildən-ilə genişlənir.

Cənab Prezident İlham Əliyev çıxışında Azərbaycanın Avropanın enerji təhlükəsizliyinə verdiyi töhfəni də xüsusi vurğuladı. Onun sözlərinə görə, Azərbaycan uzun illərdir Avropa ölkələri üçün etibarlı enerji tərəfdaşıdır və hazırda Avropa İttifaqının 10 üzv dövləti Azərbaycandan təbii qaz alır. Bu fakt Azərbaycanın Avropa enerji bazarında mühüm mövqeyə malik olduğunu göstərir.

Qazın Avropaya nəqli əsasən Cənub Qaz Dəhlizi vasitəsilə həyata keçirilir. Prezident İlham Əliyev qeyd edib ki, bu layihə Avropanın enerji mənbələrinin şaxələndirilməsinə töhfə verir və gələcəkdə qaz tədarükünün artırılması istiqamətində də müzakirələr aparılır.

Birgə mətbuat bəyanatında həmçinin Azərbaycanın nəqliyyat və logistika sahəsində artan roluna da diqqət çəkildi. Bildirildi ki, ölkə Avropa ilə Asiyanı birləşdirən mühüm tranzit qovşaqlarından birinə çevrilir və Orta Dəhliz üzrə əməkdaşlıq beynəlxalq yük daşımalarının genişlənməsində mühüm rol oynayır.

Cənab Prezident İlham Əliyev regionda sülh və sabitliyin təmin olunmasının vacibliyini də vurğuladı və Azərbaycanın Cənubi Qafqazda uzunmüddətli sülhün qurulması istiqamətində səylərini davam etdirdiyini bildirdi.

Ümumilikdə, Antonio Koştanın Azərbaycana səfəri və cənab Prezident İlham Əliyev ilə keçirilən görüşdən sonra səsləndirilən birgə mətbuat bəyanatı Azərbaycan ilə Avropa İttifaqı arasında münasibətlərin gələcək inkişaf istiqamətlərini göstərən mühüm siyasi mesaj kimi qiymətləndirilir. Enerji, nəqliyyat və iqtisadi sahələrdə əməkdaşlığın genişləndirilməsi tərəflər arasında strateji tərəfdaşlığın daha da möhkəmlənməsinə xidmət edir.

Elşən Səfərov

YAP Ağcabədi rayon təşkilatının əməkdaşı

Paylaş:

Baxılıb: 358 dəfə