Azərbaycanın ədalətə əsaslanan mövqeyi

Bakı:

28 °C

47 %

8 m/s

Əlaqə

AZ RU EN

Ana səhifə / YAP xəbərləri / Azərbaycanın ədalətə əsaslanan mövqeyi

Azərbaycanın ədalətə əsaslanan mövqeyi

16.03.2026 [11:46]

Prezident İlham Əliyevin martın 12-də Bakıda keçirilən XIII Qlobal Bakı Forumu çərçivəsində “Keçid dövründə olan dünyada fikir ayrılıqlarının aradan qaldırılması” mövzusunda çıxışı müasir beynəlxalq münasibətlər sistemində Azərbaycanın mövqeyini aydın şəkildə nümayiş etdirdi. Prezident İlham Əliyev çıxışında xüsusilə vurğuladı ki, Azərbaycan uzun illər ərzində beynəlxalq hüququn norma və prinsiplərinə əsaslanaraq öz torpaqlarının işğaldan azad olunması üçün siyasi və diplomatik yollar axtarıb. Lakin otuz ilə yaxın davam edən nəticəsiz danışıqlar, bəzi beynəlxalq vasitəçilərin qeyri-obyektiv yanaşması və ikili standartlar regionda ədalətli həllə imkan vermədi.

Bu şəraitdə Azərbaycan xalqı və dövləti öz tarixi hüququnu təmin etmək üçün qətiyyətli addım atdı və işğal altında olan torpaqlarını güc yolu ilə azad etdi. Prezident İlham Əliyevin forumdakı çıxışında səsləndirdiyi əsas fikirlərdən biri də məhz bu idi: Azərbaycan beynəlxalq hüquqa əsaslanaraq öz ərazi bütövlüyünü bərpa etdi və bununla regionda yeni geosiyasi reallıq formalaşdırdı. Bu reallıq bir daha göstərdi ki, bəzən beynəlxalq hüququn kağız üzərində qalmasına imkan verməmək üçün dövlətlər öz gücünə və siyasi iradəsinə arxalanmalı olur. Azərbaycan bunu bacardı və bu gün Cənubi Qafqazda yeni mərhələnin əsasını qoydu.

Prezident İlham Əliyev forumdakı çıxışında, hərbi mərhələ başa çatdıqdan sonra Azərbaycanın regionda davamlı sülhün qurulması üçün siyasi dialoqa üstünlük verdiyini qeyd etdi. Azərbaycanın mövqeyi aydındır: müharibə artıq tarixdə qalıb və regionun gələcəyi əməkdaşlıq, iqtisadi inteqrasiya və qarşılıqlı etimada əsaslanmalıdır. Bu yanaşma Azərbaycanın məsuliyyətli dövlət kimi davranışının bariz nümunəsidir. Dövlət başçısının sözlərinə görə, Azərbaycan öz torpaqlarını azad etdikdən sonra revanşist ritorikaya deyil, məhz sülh gündəliyinə üstünlük verdi. Bu isə regionda sabitlik və təhlükəsizliyin təmin olunmasına xidmət edən strateji xəttdir.

Prezident İlham Əliyevin çıxışında xüsusi vurğulanan məqamlardan biri də bəzi beynəlxalq vasitəçilik mexanizmlərinin səmərəsizliyi ilə bağlı idi. Dövlət başçısı açıq şəkildə bildirdi ki, uzun illər davam edən danışıqlar prosesində bəzi vasitəçilər problemin həllindən daha çox status-kvonun qorunmasına xidmət edirdi. Məhz buna görə Azərbaycan “qırnaqarası vasitəçilikdən” imtina edərək yeni yanaşma ortaya qoydu. Rəsmi Bakı hesab etdi ki, regionun gələcəyini müəyyən edən məsələlərdə ən səmərəli yol ikitərəfli dialoqdur. Bu yanaşmanın nəticəsi isə gözlənilən oldu. Üçüncü tərəflərin siyasi manipulyasiyalarından və geosiyasi maraqlarından uzaq formatda aparılan danışıqlar sülh prosesinə daha real dinamika gətirdi. Prezident İlham Əliyevin qeyd etdiyi kimi, tərəflər birbaşa dialoqa başlayan kimi sülh gündəliyində ciddi irəliləyiş əldə olundu.

XIII Qlobal Bakı Forumunda səslənən fikirlər təkcə region üçün deyil, bütövlükdə beynəlxalq münasibətlər sistemi üçün mühüm mesaj idi. Müasir dünya həqiqətən də keçid dövrünü yaşayır: geosiyasi gərginliklər artır, beynəlxalq hüququn selektiv tətbiqi isə yeni münaqişələrin yaranmasına səbəb olur.

Azərbaycanın təcrübəsi göstərir ki, dövlətlər öz suverenliyini qətiyyətlə müdafiə etməlidir, münaqişələrin həllində ədalət və beynəlxalq hüquq əsas prinsip olmalıdır, sülh isə yalnız real siyasi dialoq və qarşılıqlı hörmət üzərində qurula bilər.

Prezident İlham Əliyevin XIII Qlobal Bakı Forumundakı çıxışı Azərbaycanın müasir dünya siyasətində artan rolunu bir daha nümayiş etdirdi. Azərbaycan yalnız regional deyil, həm də qlobal səviyyədə sülh, əməkdaşlıq və ədalətli beynəlxalq münasibətlər modelini müdafiə edən ölkə kimi çıxış edir. Bu çıxış bir daha göstərdi ki, Azərbaycan öz gücünə arxalanaraq tarixi ədaləti bərpa edən və eyni zamanda gələcəyə sülh və əməkdaşlıq prizmasından baxan məsuliyyətli dövlətdir.

Gündüz Bayramov

YAP Samux rayon təşkilatının sədri

Paylaş:

Baxılıb: 635 dəfə