İşıqlı ömrün sönməyən xatirəsi

Bakı:

13 °C

62 %

12 m/s

Əlaqə

AZ RU EN

Ana səhifə / YAP xəbərləri / İşıqlı ömrün sönməyən xatirəsi

İşıqlı ömrün sönməyən xatirəsi

13.04.2026 [14:36]

Zərifə Əliyeva Azərbaycan elminin tarixində özünəməxsus izi olan, adı dərin ehtiramla xatırlanan görkəmli ziyalılardandır. Onun ömrü təkcə bir alimin elmi fəaliyyəti ilə deyil, həm də insanlığa xidmət edən nurlu bir həyat yolunun simvolu kimi dəyərləndirilir. O, oftalmologiya elminə verdiyi töhfələrlə yanaşı, insanlara göstərdiyi diqqət, qayğı və mərhəmətlə yaddaşlarda silinməz iz buraxmışdır.

Zərifə xanımın, keçdiyi həyat yolu elmə, insan sağlamlığına və xüsusilə göz xəstəliklərinin müalicəsinə həsr olunmuş mənalı, zəngin və örnək bir ömürdür. Zərifə Əliyevanın xatirəsi təkcə bir alim kimi deyil, həm də böyük ürək sahibi, insanlara sevgi, mərhəmət və qayğı ilə yanaşan bir ziyalı kimi bu gün də yaşayır.

Anım günü bu nurlu ömrün izlərini bir daha xatırlamaq, onun həyat amalını dərk etmək və gələcək nəsillərə ötürmək üçün dərin mənəvi məna daşıyan bir fürsətdir. Bu gün biz yalnız bir alimi deyil, eyni zamanda yüksək mənəvi dəyərləri şəxsiyyətində birləşdirən, insanlıq nümunəsinə çevrilmiş böyük bir insanı ehtiramla yad edirik.

Zərifə Əliyevanın adı Azərbaycan elminin, səhiyyəsinin və mənəvi düşüncə tarixinin ayrılmaz bir hissəsinə çevrilmişdir. Onun keçdiyi həyat yolu, göstərdiyi fədakarlıq və insanlara bəxş etdiyi ümid bu gün də yaşayır və hər bir insan üçün örnək olaraq qalır.

O, zəngin mənəviyyata, yüksək intellektə və dərin humanizmə malik bir alim idi. Oftalmologiya sahəsində apardığı fundamental tədqiqatlar sayəsində yalnız ölkəmizdə deyil, beynəlxalq elmi mühitdə də böyük nüfuz qazanmışdır. Xüsusilə sənaye müəssisələrində çalışan insanların görmə orqanlarına mənfi təsir göstərən amillərin araşdırılması və bu istiqamətdə profilaktik tədbirlərin işlənib hazırlanması onun elmi fəaliyyətinin əsas istiqamətlərindən birini təşkil etmişdir. Bu sahədə əldə etdiyi nəticələr onun adını dünya oftalmologiya elminin görkəmli nümayəndələri sırasında möhkəmləndirmişdir.

Onun elmi irsi olduqca zəngindir. Zərifə Əliyeva çoxsaylı monoqrafiyaların və elmi məqalələrin müəllifi olmuş, oftalmologiyanın müxtəlif sahələri üzrə dəyərli tədqiqatlar aparmışdır. Bu əsərlər bu gün də gənc həkimlər və tədqiqatçılar üçün mühüm elmi mənbə kimi öz aktuallığını qoruyur. O, daim yeniliyə açıq olmuş, tibbin inkişafına xidmət edən yeni elmi yanaşmaların formalaşmasına xüsusi diqqət yetirmişdir.

Akademikin fəaliyyəti yalnız elmi tədqiqatlarla məhdudlaşmırdı. O, eyni zamanda yüksək səviyyəli pedaqoq kimi tanınırdı. Gənc mütəxəssislərin yetişdirilməsinə böyük önəm verir, onlara yalnız bilik deyil, həm də peşə etikası, məsuliyyət və insanlara hörmət hissini aşılayırdı. Onun yetirmələri bu gün də onun elmi məktəbini layiqincə davam etdirirlər.

Heydər Əliyev bu böyük şəxsiyyət haqqında demişdir:

“Azərbaycan xanımının mənəvi dəyərlərini özündə təcəssüm etdirən Zərifə xanım bir qadın, bir həyat yoldaşı, bir ana, bir həkim, bir alim, bir ictimai xadim olaraq elə sağlığında əfsanəviləşməyi bacarıb və daşıdığı bu titulları mərhəmət, şəfqət, humanizm kimi ali hisslərlə bütövləşdirərək əsl insanlıq zirvəsinə yüksəlib”.

Bu fikirlər Zərifə Əliyevanın şəxsiyyətinin böyüklüyünü və onun çoxşaxəli fəaliyyətini dolğun şəkildə ifadə edir. O, həm elm adamı, həm nümunəvi qadın, həm qayğıkeş ana, həm də sədaqətli həyat yoldaşı kimi xalqın yaddaşında silinməz iz qoymuşdur. Onun həyatı Azərbaycan qadınının mənəvi ucalığının parlaq təcəssümüdür.

Zərifə Əliyevanın ictimai fəaliyyəti də xüsusi əhəmiyyət kəsb edir. O, müxtəlif sosial layihələrdə fəal iştirak edir, insanların sağlamlığı və rifahı naminə təşəbbüslərlə çıxış edirdi. Onun ideyaları və fəaliyyəti cəmiyyətin inkişafına və sosial məsuliyyətin güclənməsinə mühüm töhfə vermişdir.

Bu gün onun adı böyük ehtiramla yad edilir. Elmi irsi, pedaqoji fəaliyyəti və yüksək insani keyfiyyətləri gələcək nəsillər üçün əvəzolunmaz örnək olaraq qalır. Azərbaycan tibb elmi onun yaratdığı zəngin məktəb üzərində inkişafını davam etdirir və yeni uğurlar qazanır.

Anım günü bir daha göstərir ki, belə şəxsiyyətlər xalqın yaddaşında əbədi yaşayır. Zərifə Əliyeva nin həyatı, elmə və insanlığa həsr olunmuş ömrü hər zaman nümunə kimi qalacaqdır. Onun əziz xatirəsi xalqımızın qəlbində daim yaşayacaq, adı isə Azərbaycan tarixində ucalıq və hörmət rəmzi kimi əbədiləşəcəkdir.

Elşən Səfərov

YAP Ağcabədi rayon təşkilatının əməkdaşı

Paylaş:

Baxılıb: 357 dəfə