Azərbaycanda idman dövlət siyasətinin prioritet istiqamətlərindən biridir

Bakı:

17 °C

77 %

2 m/s

Əlaqə

AZ RU EN

Ana səhifə / YAP xəbərləri / Azərbaycanda idman dövlət siyasətinin prioritet istiqamətlərindən biridir

Azərbaycanda idman dövlət siyasətinin prioritet istiqamətlərindən biridir

04.05.2026 [17:10]

2026-cı ilin aprel ayı Azərbaycanın zəngin idman salnaməsinə qızıl hərflərlə yazıldı. Albaniyanın paytaxtı Tiranada keçirilən güləş üzrə Avropa çempionatında misilsiz əzmkarlıq, yüksək texnika və əsl vətənpərvərlik nümayiş etdirərək komanda hesabında qitənin ən güclüsü adını qazanan milli yığmamızın üzvləri və məşqçilər heyəti aprelin 30-da Azərbaycan Respublikasının Prezidenti cənab İlham Əliyev tərəfindən böyük ehtiramla qəbul edilib. Bu görüş yalnız bir idman uğurunun deyil, həm də Azərbaycan dövlətinin idmana, sağlam gələcəyə və milli ruhun yüksəldilməsinə verdiyi strateji önəmin növbəti təcəssümüdür.

Albaniyanın Tirana şəhərində təşkil olunan Avropa çempionatı Azərbaycan idmanı üçün bir sınaq və eyni zamanda tarixi uğur meydanı oldu. Həm sərbəst, həm də yunan – roma güləşi üzrə milli komandamız rəqiblərinə göz açmağa imkan verməyərək, komanda hesabında birinciliyi əldə etdilər. Bu nailiyyət təsadüfi deyil bu, illərin əməyi, gərgin məşq prosesi və dövlətin yaratdığı müasir idman infrastrukturunun birgə məhsuludur.

Çempionatda qazanılan medallar – qızıl, gümüş və bürünc – ölkəmizdə güləşin nə qədər köklü və davamlı bir ənənəyə malik olduğunu bir daha təsdiqlədi. Xüsusilə, təcrübəli ustaların liderliyi və gənc idmançıların qələbə əzmi komandamızın potensialının nə qədər geniş olduğunu göstərdi. Tirana zəfəri sadəcə tatami üzərindəki qələbə deyil, Azərbaycanın idman sahəsindəki gücünün beynəlxalq arenada nümayişi oldu.

Dövlət başçısı Prezident cənab İlham Əliyevin idmançılarla görüşü çox səmimi və qürurverici şəraitdə keçib. Dövlət başçısı bu nailiyyəti Azərbaycanın idman həyatında parlaq bir hadisə kimi dəyərləndirərək, idmançılarımızın göstərdiyi əzmkarlığın bütün xalqımız tərəfindən böyük sevinc hissi ilə qarşılandığını qeyd edib. Prezident cənab İlham Əliyev öz çıxışında vurğulayıb ki, Azərbaycanın güləş üzrə dünya və Avropa səviyyəsində əldə etdiyi uğurlar artıq bir ənənəyə çevrilib və bu ənənəni qoruyub saxlamaq, daha da inkişaf etdirmək qarşıda duran ən vacib vəzifələrdəndir.

Görüş zamanı Prezident cənab İlham Əliyev müasir dünyada idman sahəsində rəqabətin hər il daha da artdığını, bu çətin şəraitdə azərbaycanlı idmançıların özlərini layiqincə təsdiqlədiklərini, bayrağımızı yüksəklərə qaldırdıqlarını və himnimizi səsləndirdiklərini yüksək qiymətləndirib. Dövlət başçısı qeyd edib ki, bu qələbələr cəmiyyətdə, xüsusən də gənc nəsildə idmana marağı kəskin şəkildə artırır və sağlam həyat tərzinin təbliğində həlledici rol oynayır. Prezident cənab İlham Əliyev idmançılarımızın qələbələrinin təkcə medallarla ölçülmədiyini, eyni zamanda onların nümayiş etdirdiyi əxlaqi və iradi keyfiyyətlərin də vacib olduğunu vurğulayıb.

Bu tarixi qəbul Azərbaycanın sistemli və ardıcıl idman siyasətinin nə qədər düzgün qurulduğunu bir daha nümayiş etdirir. Azərbaycanda idman dövlət siyasətinin prioritet istiqamətlərindən biridir. Ölkənin hər bir bölgəsində yaradılan olimpiya idman kompleksləri, müasir təlim - məşq bazaları və idmançıların sosial müdafiəsinin yüksək səviyyədə təşkili bu uğurların təməlində dayanır.

Dövlət başçısının idmançılarla mütəmadi görüşləri, onların problemləri və nailiyyətləri ilə yaxından maraqlanması, həmçinin idmançılara göstərilən dövlət qayğısı onları daha böyük nailiyyətlərə ruhlandırır. 2026-cı il idman ilinin əhəmiyyətli olması və Tiranadakı bu uğurun qarşıdan gələn Dünya çempionatları, həmçinin uzunmüddətli perspektivdə Olimpiya Oyunları üçün böyük bir motivasiya mənbəyi olduğu xüsusi qeyd edilib. Prezident cənab İlham Əliyev gələcəkdə də Azərbaycanın idman ölkəsi kimi öz mövqeyini qoruyub saxlayacağını və beynəlxalq arenada daha böyük nailiyyətlərə imza atacağına inamını ifadə edib.

Sonda idmançılar, məşqçilər və güləş federasiyasının təmsilçiləri onlara göstərilən yüksək etimada və dövlət qayğısına görə Prezident cənab İlham Əliyevə dərin minnətdarlıqlarını bildiriblər. İdmançılar qeyd ediblər ki, onlara yaradılan şərait, ölkə rəhbərliyinin dəstəyi və xalqın sevgisi onları növbəti yarışlarda daha məsuliyyətlə mübarizə aparmağa sövq edir.

Bu görüş bir daha göstərdi ki, Azərbaycan dövləti idmançıların yanındadır və onların hər bir qələbəsi bütün ölkənin uğuru hesab olunur. Tirana zəfəri sadəcə bir çempionluq deyil, Azərbaycanın qüdrətinin, istedadlı gəncliyinin və idman ənənələrinin daha bir təsdiqidir. İnanırıq ki, bu zəfər silsiləsi davamlı olacaq və Azərbaycanın üçrəngli bayrağı dünyanın ən mötəbər idman meydanlarında dalğalanmaqda davam edəcək.

Varis Rüstəmov,

Yeni Azərbaycan Partiyası Sabirabad rayon təşkilatının sədri

Paylaş:

Baxılıb: 111 dəfə