YAP Qusar Rayon Təşkilatının veteranları və fəalları Qarabağa səfər etdi

Bakı:

25 °C

72 %

16 m/s

Əlaqə

AZ RU EN

Ana səhifə / YAP xəbərləri / YAP Qusar Rayon Təşkilatının veteranları və fəalları Qarabağa səfər etdi

YAP Qusar Rayon Təşkilatının veteranları və fəalları Qarabağa səfər etdi

18.05.2026 [17:55]

YAP Qusar rayon təşkilatı tərəfindən 16 may 2026-cı il tarixində təşkil olunan Qarabağ səfəri iştirakçılarda unudulmaz təəssüratlar yaratdı. Səfərdə partiya fəalları, veteranlar, qazilər, eləcə də Milli Qəhrəman Çingiz Qurbanovun valideynləri iştirak edirdilər. Qarabağın azad olunmuş bölgələrini ziyarət edən nümayəndə heyəti burada aparılan genişmiqyaslı quruculuq və abadlıq işlərinin şahidi oldu, ölkəmizin əldə etdiyi möhtəşəm Zəfərin nəticələrini böyük qürur hissi ilə izlədilər.

Səfər çərçivəsində nümayəndə heyəti Ağdam Cümə Məscidini ziyarət etdi. XIX əsrə aid olan bu tarixi-dini abidə işğal dövründə ciddi dağıntılara məruz qalsa da, hazırda burada bərpa işləri həyata keçirilir. İştirakçılar həmçinin Ağdam Şəhidlər Xiyabanında şəhidlərin əziz xatirəsini ehtiramla yad etdilər.

Səfər zamanı Qarabağın qədim memarlıq nümunələrindən biri olan Əsgəran Qalası da ziyarət olundu. XVIII əsrdə inşa edilmiş qala bölgənin tarixi müdafiə istehkamlarından biri kimi xüsusi əhəmiyyət daşıyır. Daha sonra nümayəndə heyəti Yuxarı Gövhər Ağa Məscidində oldu. Şuşanın simvollarından hesab olunan bu məscid Azərbaycanın zəngin dini-mədəni irsinin mühüm nümunələrindəndir.

Səfər iştirakçıları həmçinin Şuşa Qalasını, Cıdır düzünü, İsa Bulağını və Molla Pənah Vaqifin Məqbərəsini ziyarət edərək Qarabağın zəngin tarixi və mədəni irsi ilə yaxından tanış oldular. Səfər çərçivəsində nümayəndə heyəti işğal dövründə erməni vandalizminə məruz qalmış “güllələnmiş abidələr”ə də baş çəkərək tarixi-mədəni abidələrimizə qarşı törədilmiş dağıntıları yerində müşahidə etdi.

Nümayəndə heyəti həmçinin Xankəndi şəhərində olaraq burada aparılan yenidənqurma və abadlıq işləri ilə tanış oldu, şəhərdə bərpa olunan həyatın ölkəmizin gücünü və suverenliyini bir daha nümayiş etdirdiyini vurğuladılar.

Qarabağda müşahidə olunan hər bir yenilik Azərbaycan dövlətinin gücünün, xalqımızın birliyinin və həyata keçirilən uğurlu siyasətin bariz nümunəsidir. Vaxtilə dağıdılmış və viran qoyulmuş torpaqlarımızda bu gün yeni yolların, yaşayış məntəqələrinin və sosial obyektlərin inşa olunması hər bir azərbaycanlının qəlbində böyük qürur hissi doğurur.

YAP Qusar rayon təşkilatının təşəbbüsü ilə həyata keçirilən bu səfər iştirakçılar üçün həm mənəvi, həm də tarixi əhəmiyyət daşıdı. Azad olunmuş torpaqlarda həyatın yenidən canlanması dövlət-xalq birliyinin, güclü siyasi iradənin və milli həmrəyliyin parlaq təcəssümüdür.

Paylaş:

Baxılıb: 623 dəfə