Müasir dövrdə şəhərsalma siyasəti

Bakı:

30 °C

44 %

6 m/s

Əlaqə

AZ RU EN

Ana səhifə / YAP xəbərləri / Müasir dövrdə şəhərsalma siyasəti

Müasir dövrdə şəhərsalma siyasəti

20.05.2026 [15:45]

Azərbaycan, qlobal idarəetmə və diplomatiya arenasında növbəti tarixi zirvəsinə imza atır. Paytaxt Bakı şəhəri, Birləşmiş Millətlər Təşkilatının İnsan Məskənləri Proqramı ilə tərəfdaşlıq çərçivəsində keçirilən Ümumdünya Şəhərsalma Forumunun 13-cü sessiyasına ev sahibliyi edir. Dünyanın gələcək simasını, urbanizasiya xəritəsini və dayanıqlı ekosistemlərini müəyyən edən bu nəhəng platforma, rəsmi Bakının qlobal miqyaslı strateji moderator rolunu bir daha nümayiş etdirir.

Azərbaycan Respublikasının Prezidenti İlham Əliyev forum çərçivəsində etdiyi çıxışda bu mötəbər missiyanın ölkəmiz üçün daşıdığı ali mənəvi və siyasi əhəmiyyəti xüsusi diqqətə çatdırıb. Dövlət başçısı Azərbaycanın beynəlxalq nüfuzunu təkzibolunmaz rəqəmlərlə ifadə edərək bildirmişdir ki, Ümumdünya Şəhərsalma Formuna ev sahibliyi etmək bizim üçün böyük şərəfdir. Burada 182 ölkə təmsil olunur. Bu isə Azərbaycana göstərilən hörmətin bariz nümunəsidir.

Dünyanın 182 ölkəsindən dövlət rəsmilərinin, nazirlərin, şəhərsalma üzrə aparıcı ekspertlərin, memarların və beynəlxalq təşkilat rəhbərlərinin Bakıda bir araya gəlməsi təsadüfi xarakter daşımır. Bu genişmiqyaslı iştirakçılıq, Azərbaycanın uzun illərdir formalaşdırdığı etibarlı tərəfdaş imicinin, multilateralizmə verdiyi töhfələrin və COP29 kimi nəhəng qlobal tədbirlərdən sonra qazandığı böyük təşkilatçılıq təcrübəsinin birbaşa nəticəsidir.

Prezident cənab İlham Əliyevin vurğuladığı "Azərbaycana göstərilən hörmət", eyni zamanda ölkəmizin dinamik şəkildə modernləşən şəhər infrastrukturu modelinə, iqtisadi sabitliyinə və qlobal çağırışlara çevik reaksiya vermək qabiliyyətinə verilən beynəlxalq qiymətdir.

Bakıda keçirilən WUF13 sessiyası təkcə nəzəri müzakirələr platforması deyil, həm də Azərbaycanın praktiki uğurlarının dünyaya təqdimatıdır. Bu gün forumun gündəliyində dayanan əsas mövzular – rəqəmsal şəhərlər, emissiyasız nəqliyyat, inklüziv icmalar və yaşıl enerji zonaları – hazırda Azərbaycanın işğaldan azad edilmiş ərazilərində tətbiq etdiyi əsas strategiyalardır.

Azərbaycan dünyaya unikal bir təcrübə təqdim edir. Belə ki, dağıdılmış şəhərlərin ən müasir texnologiyalar və süni intellekt əsaslı idarəetmə sistemləri ilə yenidən qurulması, azad edilmiş ərazilərin tamamilə ekoloji təmiz enerji mənbələrinə əsaslanan regionlara çevrilməsi, dayanıqlı məskunlaşma və şəhər mühitinin insan kapitalının inkişafına uyğunlaşdırılması, qarşıda duran ən mühüm məsələlərdən biridir.

Bu kontekstdə, Bakı Forumu münaqişədən əziyyət çəkmiş və yenidənqurma mərhələsində olan digər dünya ölkələri üçün vizioner bir mayak rolunu oynayır.

WUF13 çərçivəsində qəbul ediləcək qərarlar və formalaşdırılacaq yeni yanaşmalar növbəti illərdə qlobal şəhərsalma siyasətinə birbaşa təsir göstərəcək. Forumda iqlim dəyişikliyinə davamlı şəhərlərin salınması, urbanizasiyanın sosial bərabərsizliyə təsirlərinin azaldılması və rəqəmsal keçid mövzuları sahəsində mühüm sənədlərin imzalanması gözlənilir.

Azərbaycan dövləti, Prezident cənab İlham Əliyevin rəhbərliyi ilə təkcə öz coğrafiyasında deyil, qlobal miqyasda daha ədalətli, yaşıl və təhlükəsiz şəhər mühitinin yaradılması prosesinə liderlik edir.Ümumdünya Şəhərsalma Forumunun Bakı sessiyası, Azərbaycanın diplomatik və iqtisadi gücünün nümayişi olmaqla bərabər, bəşəri problemlərin həllində ölkəmizin intellektual və strateji mərkəz olduğunu sübut etdi. 182 ölkənin yekdil dəstəyi və Bakı dialoqu, müasir tariximizə regional gücdən qlobal təsir dairəsinə malik modern bir dövlətin növbəti möhtəşəm triumfu kimi həkk olunur.

Ölkə Prezidenti cənab İlham Əliyevin formdakı çıxışı Azərbaycanın şəhərsalma, dayanıqlı inkişaf, beynəlxalq əməkdaşlıq sahəsində strateji baxışını bir daha nümayiş etdirdi. Formun 13-cü sessiyasının keçirilməsi Azərbaycanın artan beynəlxalq nüfuzunun, müasir inkişaf strategiyasının və şəhərsalma sahəsində qazandığı uğurların mühüm göstəricisidir.

Həbibə Vəliyeva

YAP Culfa rayon təşkilatının fəalı

Paylaş:

Baxılıb: 536 dəfə