Zəngilanın azadlığı və dirçəlişi Azərbaycanın tarixi Zəfərinin təntənəsidir

Bakı:

18 °C

88 %

4 m/s

Əlaqə

AZ RU EN

Ana səhifə / YAP xəbərləri / Zəngilanın azadlığı və dirçəlişi Azərbaycanın tarixi Zəfərinin təntənəsidir

Zəngilanın azadlığı və dirçəlişi Azərbaycanın tarixi Zəfərinin təntənəsidir

20.10.2026 [15:15]

20 Oktyabr – Zəngilan Şəhəri Günü Azərbaycanın şanlı Zəfər tarixini, xalqımızın milli birliyini və tarixi ədalətin bərpasını təcəssüm etdirən əlamətdar günlərdən biridir. Bu tarix Vətən müharibəsində qazanılmış möhtəşəm Qələbənin, Azərbaycan Ordusunun qəhrəmanlığının və dövlətimizin qətiyyətli siyasətinin parlaq ifadəsidir.

2020-ci il oktyabrın 20-də Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu Zəngilan şəhərini işğaldan azad etdi. Bu tarixi hadisə Vətən müharibəsinin gedişində mühüm hərbi-strateji əhəmiyyətə malik olmaqla yanaşı, uzun illər doğma yurdlarından ayrı düşmüş zəngilanlıların qayıdışına ümidləri daha da gücləndirdi. Zəngilanın azad edilməsi Azərbaycan xalqının sarsılmaz iradəsinin, ərazi bütövlüyümüzün bərpası uğrunda apardığı mübarizənin və milli həmrəyliyinin təntənəsi oldu.

44 günlük Vətən müharibəsi Azərbaycan tarixində qəhrəmanlıq salnaməsi kimi əbədi yaşayacaq. Bu müharibədə əsgər və zabitlərimizin göstərdiyi şücaət, şəhidlərimizin canı və qanı bahasına əldə edilən Qələbə xalqımızın azadlıq əzmini və Vətən sevgisini bütün dünyaya nümayiş etdirdi. Prezident İlham Əliyevin qətiyyətli rəhbərliyi, Azərbaycan Ordusunun yüksək döyüş hazırlığı və xalqımızın birliyi sayəsində torpaqlarımız işğaldan azad olundu, ölkəmizin ərazi bütövlüyünün təmin edilməsi istiqamətində tarixi nailiyyətlər əldə edildi.

20 Oktyabr – Zəngilan Şəhəri Gününün təsis edilməsi bu tarixi hadisənin əhəmiyyətini daha da artırır. Azərbaycan Respublikası Prezidentinin 2023-cü il 31 iyul tarixli Sərəncamı ilə təsis olunan bu əlamətdar gün Zəngilanın azadlığı uğrunda mübarizə aparan qəhrəmanların xatirəsinə ehtiramın, milli yaddaşın qorunmasının və gələcək nəsillərə vətənpərvərlik ruhunun aşılanmasının mühüm ifadəsidir.

Bu gün işğaldan azad edilmiş ərazilərdə genişmiqyaslı bərpa və quruculuq işləri həyata keçirilir. Zəngilan rayonunda yolların, yaşayış məntəqələrinin, sosial obyektlərin və müasir infrastrukturun yenidən qurulması Böyük Qayıdış proqramının ardıcıl şəkildə icra olunduğunu göstərir. Xüsusilə Ağalı kəndində “ağıllı kənd” konsepsiyası əsasında yaradılan müasir yaşayış şəraiti azad edilmiş ərazilərin gələcək inkişafının bariz nümunəsidir. Bütün bu tədbirlər doğma torpaqlarından didərgin düşmüş insanların öz yurdlarına qayıtmasına, burada təhlükəsiz və firavan həyat qurmasına xidmət edir.

Zəngilanın strateji mövqeyi, iqtisadi potensialı və nəqliyyat imkanları rayonun gələcək inkişafı üçün geniş perspektivlər yaradır. Bölgədə həyata keçirilən layihələr Azərbaycanın iqtisadi gücünü, quruculuq imkanlarını və işğaldan azad edilmiş ərazilərin dirçəldilməsinə verdiyi xüsusi əhəmiyyəti nümayiş etdirir.

20 Oktyabr – Zəngilan Şəhəri Günü hər bir azərbaycanlı üçün qürur və iftixar mənbəyidir. Bu gün biz Vətən uğrunda canından keçən şəhidlərimizin əziz xatirəsini ehtiramla yad edir, qazilərimizin qəhrəmanlığını minnətdarlıqla anırıq.

Bu gün Zəngilan azadlığın, quruculuğun və Böyük Qayıdışın rəmzi kimi yeni inkişaf mərhələsini yaşayır. Doğma torpaqlarımızda üçrəngli Azərbaycan bayrağının əbədi dalğalanması xalqımızın ən böyük qürur mənbəyidir. Zəngilanın gündən-günə yenilənməsi və inkişaf etməsi Azərbaycanın tarixi Zəfərinin davamı olmaqla, gələcək nəsillərə ötürülən əvəzsiz milli mirasdır.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 63 dəfə

Xəbər lenti

Hamısına bax