YAP-ın fəaliyyətinin əsasında xalqa xidmət dayanır

Bakı:

22 °C

62 %

5 m/s

Əlaqə

AZ RU EN

Ana səhifə / YAP xəbərləri / YAP-ın fəaliyyətinin əsasında xalqa xidmət dayanır

YAP-ın fəaliyyətinin əsasında xalqa xidmət dayanır

05.12.2009 [09:34]

Nərimanov rayonunun Təbriz küçəsində seçicilərlə görüş keçirilib
Bələdiyyə seçkilərində Yeni Azərbaycan Partiyasının namizədlərinin təbliğat-təşviqat kampaniyası uğurla davam edir. Kampaniya çərçivəsində dünən Nərimanov rayonunun Təbriz küçəsində seçicilərlə görüş keçirilib. YAP-ın bələdiyyə seçkilərində səlahiyyətli nümayəndəsi, partiyanın Nərimanov rayon təşkilatının sədri Təmraz Tağıyev bələdiyyə seçkilərinin ölkənin həyatında əhəmiyyətli siyasi kampaniya olduğunu bildirib. Onun sözlərinə görə, bütün seçkilərdə olduğu kimi bu siyasi kampaniyada da YAP monolit qüvvə kimi iştirak edir.
Səlahiyyətli nümayəndə partiyanın seçkilərdə müəyyən hədəflərinin olduğunu deyərək bütün bunların seçki konsepsiyasında əks olunduğunu söyləyib. O, həmçinin, qeyd edib ki, yerli özünüidarəetmə orqanlarının vəzifəsi insanlara səmərəli xidmət göstərmək və yerli sosial məsələlərin həllinə daha peşəkar yanaşmaqdan ibarətdir. Buna görə də, növbəti bələdiyyələr seçildikdən sonra bu meyarlara uyğun olaraq daha yüksək səviyyədə fəaliyyət göstərməlidirlər. özünün də namizəd olduğunu deyən T.Tağıyev partiyanın namizədlərinin seçkilərdə qələbə qazanacaqları təqdirdə insanlara ləyaqətlə xidmət edəcəklərini vurğulayıb. O, dekabrın 23-də seçiciləri fəal olmağa və YAP-ın namizədlərinə səs verməyə çağırıb.
YAP tərəfindən Nərimanov rayon bələdiyyəsinə namizədliyi irəli sürülmüş Əmir Abbasov bələdiyyələrin ölkənin sosial həyatında vacib rol oynadığını bildirib. Onun sözlərinə görə, zaman keçdikcə bu təsisatın cəmiyyətdəki rolu artır: “YAP xalqa xidmət edən partiya kimi bütün proseslərin önündə gedir. Bələdiyyə seçkilərində YAP-ın namizədlərinə səs verməklə gələcəkdə sosial məsələlərin həllində özünüzə ən yaxın silahdaşlar qazanacaqsınız”.
İndiyə qədər müxtəlif qurumlarda çalışdığını deyən namizəd təşkilati işlərin həyata keçirilməsinin önəmli olduğunu bildirib. Onun sözlərinə görə, iş təcrübəsi bələdiyyələrdə də uğurlu fəaliyyətə təminat verir.
Nərimanov bələdiyyəsinə digər namizəd İradə Qarayeva seçkidə uğur qazanacaqları təqdirdə səlahiyyətləri çərçivəsində əhalinin sosial problemlərinin həllində yaxından iştirak edəcəklərinə söz verib: “Biz namizəd olaraq üzərimizə düşən vəzifələri aydın şəkildə dərk edirik. Rayonun abadlaşmasında imkanımız çərçivəsində iştirak edəcəyik. Biz elə işləyəcəyik ki, sabah insanlarla üz-üzə gələndə utanmayaq. Bələdiyyə üzvləri daim insanların arasında olmalı, onların qayğılarının aradan qaldırılmasında öz səlahiyyətləri çərçivəsində iştirak etməlidir. Bu məsulliyəti dərk edərək seçkilərdə iştirak edirik. Siz də seçkidə fəal olmalısınız. Vətəni, xalqı sevən insanlar kimi seçkilərdə fəal olun”.
Seçicilərdən Əsəd Əylisli dekabrın 23-də səsvermə prosesində fəal iştirak edəcəklərini deyib. O, bildirib ki, əhali yeni seçiləcək heyətdən çox işlər gözləyir: “Bilirsiniz ki, ölkəmiz Prezident İlham Əliyevin həyata keçirdiyi siyasət nəticəsində sürətlə inkişaf edir. Bütün bölgələrdə abadlıq və quruculuq işləri aparılır. Bu prosesdə bələdiyyələr də fəal iştirak etməlidir. Ona görə də Nərimanov bələdiyyəsinə seçiləcək yeni üzvlərdən gözləntilərimiz böyükdür”.
Digər seçici Yunis Əliyev deyib ki, biz YAP-ın namizədlərinə inanırıq. O, yaşadığı məhəllənin problemlərini sadalayaraq yeni seçiləcək bələdiyyədən həmin problemlərin həllinə yardım göstərməyi xahiş edib.
Nardar BAYRAMLI

Paylaş:

Baxılıb: 1400 dəfə