Azərbaycan şanlı tarixinin qələbələr və uğurlar dövrünü yaşayır

Bakı:

19 °C

72 %

3 m/s

Əlaqə

AZ RU EN

Ana səhifə / YAP xəbərləri / Azərbaycan şanlı tarixinin qələbələr və uğurlar dövrünü yaşayır

Azərbaycan şanlı tarixinin qələbələr və uğurlar dövrünü yaşayır

07.12.2023 [11:45]

Müstəqil Azərbaycan şanlı tarixi boyu indiki qədər güclü, qüdrətli və nüfuzlu olmamışdır. Möhtərəm Prezidentimiz, Silahlı Qüvvələrin Ali Baş Komandanı cənab İlham Əliyevin rəhbərliyi ilə bütün sahələrdə qazanılan saysız - hesabsız qələbələr, uğurlar göz önündədir. Təbii ki, qələbələrimizin sırasında Vətən müharibəsində qazanılan möhtəşəm Zəfərin xüsusi yeri vardır. Üç il əvvəl, dekabr ayının 10-da Azərbaycanın Vətən müharibəsində qazandığı möhtəşəm Qələbəyə həsr olunmuş Zəfər paradı isə uzun müddət yaddaşlardan silinməyəcəkdir. Qələbə paradında Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev, Türkiyə Prezidenti Rəcəb Tayyib Ərdoğan, iki ölkənin dövlət və hökumət üzvləri, həmçinin diplomatik korpusların nümayəndələri də iştirak etdilər. Möhtəşəm Paradda 3000 nəfərdən artıq şəxsi heyətin, 150-dək hərbi texnikanın, o cümlədən silahlanmaya yeni qəbul edilmiş müasir hərbi texnikanın, raket və artilleriya qurğularının, hava hücumundan müdafiə sistemlərinin, eləcə də hərbi gəmi və katerlərin nümayişi oldu. Həmçinin Vətən müharibəsi zamanı Azərbaycan Ordusunun darmadağın etdiyi düşməndən ələ keçirdiyi hərbi qənimətlərin bir qismi də paradda nümayiş etdirildi.

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev bu il noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi paradda çıxışı zamanı demişdir: “Bu günü bizə bəxş edən müzəffər Silahlı Qüvvələrimiz döyüş meydanında cəsarət, qəhrəmanlıq, fədakarlıq göstərərək düşməni bizim əzəli torpaqlarımızdan qovmuşdur. Bu, böyük tarixi hadisədir. Azərbaycan xalqının çoxəsrlik tarixində buna bənzər parlaq Qələbə olmamışdır. Şuşa əməliyyatı, 44 gün ərzində apardığımız bütün digər hərbi əməliyyatlar, hərbçilərimizin şücaəti bir qəhrəmanlıq dastanıdır. Qırx dörd gün ərzində döyüş meydanında düşməni məğlub edərək, şəhər və kəndlərimizi azad edərək Azərbaycan əsgər və zabiti əsl qəhrəmanlıq göstərmişdir. Hər gün biz irəli gedirdik, bir gün belə geriyə addım atmamışdıq. Düşmən ordusu Azərbaycan Ordusunun, Silahlı Qüvvələrin peşəkarlığını, fədakarlığını görərək daha da böyük təşvişə düşürdü və onların özlərinin etirafına görə, 44 günlük müharibə zamanı Ermənistan ordusunda 12 min fərari olmuşdur. Azərbaycan Silahlı Qüvvələrinin bir nəfər də olsun hərbçisi döyüş meydanını tərk etməmişdir. Bu, Azərbaycan xalqının əyilməz ruhunu və yüksək mənəvi keyfiyyətlərini bir daha bütün dünyaya nümayiş etdirdi.”

Bəli, Vətən müharibəsində Azərbaycan Ermənistanı məğlub etdi və işğala son qoydu. 44 günün hər günü şanlı bir tarixdir. Hər gün Azərbaycan Ordusu irəli gedərək yeni şəhərlər, kəndlər, qəsəbələr, yüksəkliklər azad edrdi. Azərbaycan əsgəri, Azərbaycan zabiti bir amalla vuruşurdu ki, bu işğala son qoyulsun, bu haqsızlığa son qoyulsun, tarixi ədalət zəfər çalsın. Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyi ölkəmizin qələbəsini təmin edən mühüm amillər oldu. Ulu əcdadlarımızın zəngin dövlətçilik və hərb tarixindən ilhamlanan Azərbaycan xalqı hərb tariximizə daha bir şanlı qəhrəmanlıq salnaməsi yazaraq, özünün qalib xalq olduğunu bütün dünyaya sübut etdi və düşmən üzərində tarixi zəfər çaldı. Xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə dövlət başçısı cənab İlham Əliyevin sərəncamı ilə hər il noyabrın 8-i Azərbaycan Respublikasında Zəfər Günü kimi təntənəli şəkildə qeyd edilir.

Bütün sahələrə xüsusi diqqət yetirən Möhtərəm Prezidentimiz Vətən müharibəsində qələbə münasibətilə Azərbaycan Respublikasının orden və medallarının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə Milli Məclisin 2020-ci il 26 noyabr tarixində qəbul etdiyi qanunu təsdiqləyib. Dövlət Başçımız dekabrın 1-də sözügedən qanunun tətbiqi haqqında fərman imzalayıb.

Bəli, heç kim unudulmur, heç nə yaddan çıxmır. Hər kəs göstərdiyi xidmətlərə, qəhrəmanlıqlara görə layiq olduğu qiymətini alır, təltif olunur. Əminliklə demək olar ki, çoxəsrlik dövlətçilik tarixinin qələbələr və uğurlar dövrünü yaşayan müstəqil Azərbaycan bundan sonra da Möhtərəm Prezidentimiz, Silahlı Qüvvələrin Ali Baş Komandanı cənab İlham Əliyevin rəhbərliyi ilə yeni-yeni qələbələr, uğurlar, nailiyyətlər qazanacaqdır. Bunları söyləməyə mövcud Azərbaycan reallıqları əsas verir.

İsgəndər Qurbanov

Partiya veteranı

Paylaş:

Baxılıb: 446 dəfə