Nəcib təşəbbüslə xilaskar olmaq...

Bakı:

31 °C

45 %

13 m/s

Əlaqə

AZ RU EN

Ana səhifə / Xəbər lenti / Nəcib təşəbbüslə xilaskar olmaq...

Nəcib təşəbbüslə xilaskar olmaq...

14.06.2024 [11:20]

Ümumdünya Qan Donoru Günüdür

İlk baxışda minlərlə insan həyatının xilaskarına çevrilmək mümkünsüz görünə bilər. Ancaq buna nail olmaq o qədər də çətin deyil. Sadəcə, humanistlik nümayiş etdirmək kifayətdir. Bu təşəbbüslər sırasında qan donorluğunu xüsusi vurğulamaq yerinə düşər.

Məlumdur ki, qan insan orqanizminin mühüm komponentlərindən biridir. Hər kəs həyatı boyunca qan köçürülməsinin zəruri olduğu hallarla üzləşə bilər. Belə olan hallarda qan vermək hər bir sağlam insanın bəşəri borcudur. Bəziləri fikirləşir ki, qan donoru olmaq orqanizmə mənfi təsir edir. Əslində, belə deyil. Sağlamlığı yerinə olan hər kəs qan verə bilər. Tədqiqatlar da sübut edir ki, 400-450 ml qan vermək insanın səhhətinə və əmək qabiliyyətinə müsbət təsir edir. Mütəmadi olaraq qan verən donorlarda şəkərli diabet, yüksək xolesterin, yüksək təzyiq, qaraciyər, ürək-damar və xərçəng xəstəliklərinin riski az olur. Qanvermə yeni hüceyrələrin əmələ gəlməsini stimullaşdırır və psixi sağlamlığa səbəb olur. Lakin qan verən şəxslərin bilməsi vacib olan şərtlər də var.

Kimlər qan verə bilməz?

Bir çox xəstəlikdən əziyyət çəkənlər, həmçinin sağlamlıq durumunda müvəqqəti dəyişiklik olan şəxslərin qan verməsi məsləhət görülmür. Məsələn, Hepatit B, Hepatit C, AIDS xəstələrini qeyd edə bilərik. Bundan başqa, malyariya xəstələri müalicə olunandan 3 il sonra, vərəm xəstələri isə müalicə edildikdən 5 il sonra qan verə bilərlər.

Eyni zamanda bronxit-xroniki xəstələr, epilepsiya xəstələri, anemiyadan əziyyət çəkənlər, allergiya-asma xəstələri və hamilə qadınlar da qan verə bilməzlər. Ancaq doğum və ya hamiləliyin sona çatdırılmasından 6 həftə sonra isə bu, mümkündür.

Ən təhlükəsiz qan bu şəxslərindir...

Hər il dünyada təxminən 112 milyon donor qeydiyyatdan keçir. Onların təxminən yarısı dünya əhalisinin 15 faizini təşkil edən yüksək gəlirli ölkələrdə yaşayır. Başqa sözlə desək, 62 ölkə könüllülərin təmənnasız verdiyi qan hesabına tam qan ehtiyatlarına malikdir. Təhlükəsiz donor qanına ehtiyac hər zaman var. Təcrübə göstərir ki, ən təhlükəsiz olan məhz könüllü, təmənnasız donorların qanıdır. Təhlükəsiz qan, onun komponentləri və preparatları hər il hamiləlik və ağır doğuş zamanı minlərlə ananı, körpəni, xəsarət alanı, irsi qan xəstəliklərindən əziyyət çəkəni ölümdən xilas etməyə kömək edir.

Bağışlamanın 20 illiyi: təşəkkürlər, qan donorları!

Artıq 20 ildir ki, hər il iyunun 14-ü Ümumdünya qan donoru günü kimi qeyd edilir. Bu barədə Ümumdünya Səhiyyə Təşkilatının (ÜST) Cenevrə şəhərində keçirilmiş 58-ci Assambleyasında qərar qəbul olunub. Ümumdünya Qan Donoru Günü kampaniyasının 2024-cü il üçün şüarı “Bağışlamanın 20 illiyi: təşəkkürlər, qan donorları!” adlanır.

Azərbaycanda donor qanının həcmi artıb

Ölkəmizdə də qanvermə aksiyaları mütəmadi qaydada təşkil olunur. Donorların və onlardan qan analizinin alınması, müayinəsi və qan ehtiyatlarına nəzarətin elektronlaşdırılması məqsədilə Azərbaycanda “Vahid Qan Bankı” sistemi yaradılıb. Hazırda bu sistem Mərkəzi Qan Bankının bütün bölmələrində istifadə olunur. Görülmüş tədbirlər nəticəsində ölkəmizdə tədarük olunan donor qanının həcmi artıb, komponentlərə bölünməsi işi yaxşılaşdırılıb, təhlükəsizliyinin təmin edilməsində laborator nəzarət gücləndirilib.

Nəcib bir təşəbbüslə 1 dəfə qan verib tanımadığımız insanların həyatını xilas edə bilərik. Gəlin bu gün qan donoru olaq və insanların sağlamlığına köməklik göstərək...

Yeganə BAYRAMOVA

Paylaş:

Baxılıb: 743 dəfə