Bu gün Beynəlxalq Dənizçilik Günüdür

Bakı:

21°C

60%

10m/s

Əlaqə

AZ RU EN

Ana səhifə / Xəbər lenti / Bu gün Beynəlxalq Dənizçilik Günüdür

Bu gün Beynəlxalq Dənizçilik Günüdür

25.09.2024 [07:40]

25 sentyabr dünyada Dənizçilik Günü kimi qeyd edilir

Birləşmiş Millətlər Təşkilatında beynəlxalq bayramlardan biri olan Dünya Dənizçilik Günü 1978-ci ildən Beynəlxalq Dəniz Təşkilatı (IMO) Assambleyasının 10-cu sessiyasının qərarı ilə təsis edilib və 1980-ci ilədək martın 17-də keçirilib. Sonra onun qeydolunma tarixinin sentyabrın sonuncu həftəsinə keçirilməsinə qərar verilib.

Dünya Dənizçilik Gününün məqsədi dəniz daşımalarında ətraf mühitin təhlükəsizliyini artırmaq, dənizin ətraf mühitini xüsusilə neft çirklənmələrindən qorumaq, bioresursların mühafizəsi və brakonyerliklə mübarizənin qarşısını almaqdır. Həmin günün qeyd olunmasında məqsəd ictimaiyyətin diqqətini dəniz nəqliyyatının təhlükəsizliyinin və ətraf mühitin mühafizəsinin əhəmiyyətli aspektlərinə yönəltməkdir. Buna görə də Dünya Dənizçilik Günü qeyd olunarkən sahənin müxtəlif problemləri qabardılır.

Azərbaycanda dənizçilik sahəsinin şanlı tarixi var və bu tarixin yazılmasında Ulu Öndər Heydər Əliyevin əvəzsiz xidmətləri olub. Belə ki, ölkəmizdə dənizçiliyin inkişafına birbaşa və həlledici təsirləri olan “Əsrin müqaviləsi” neft sazişi, Böyük İpək Yolunun bərpası və Beynəlxalq Dəniz Təşkilatına üzvlüyümüz Ümummilli Liderin adı ilə bağlıdır.

Bu gün dənizçilik sahəsi yeni inkişaf mərhələsindədir. Bu baxımdan 2013-cü ildən bu günə kimi Xəzər Dəniz Donanmasına 20-dən çox yeni gəminin alınması, müasir gəmilər inşa edən Bakı Gəmiqayırma Zavodunun inşası, Xəzər dənizində ən böyük liman olan Bakı Beynəlxalq Dəniz Ticarət Limanının salınması bu mərhələnin bariz nümunələri kimi göstərilib.

Respublikamızda dəniz nəqliyyatı sektorunun rəqabətədavamlı şəkildə inkişafı məqsədilə 2021-ci ilin oktyabr ayında Prezidentin müvafiq fərmanı ilə Dövlət Dəniz və Liman Agentliyi yaradıldıqdan sonra bir sıra mühüm islahatlar da həyata keçirilib.

Dövlət Dəniz və Liman Agentliyinin dənizçilərin hazırlığı sistemində atdığı addımlar, xüsusilə dənizçilərə diplomların (sertifikatlar) verilməsi prosesinin sadələşdirilməsi, qurumun Beynəlxalq Dəniz Təşkilatının 2022-ci il auditindən uğurla keçməsi və dənizçilərin hazırlığı sisteminin Beynəlxalq Dəniz Təşkilatının “Ağ siyahı”sında yer alması Azərbaycan dənizçiləri üçün böyük uğurdur.

Azərbaycan Respublikasının Prezidenti cənab İlham Əliyevin “Dəniz nəqliyyatı sahəsində idarəetmənin təkmilləşdirilməsi ilə bağlı bəzi tədbirlər haqqında” 11 oktyabr 2021-ci il tarixli fərmanına əsasən, Azərbaycan Respublikasının Rəqəmsal İnkişaf və Nəqliyyat Nazirliyinin tabeliyində “Dövlət Dəniz və Liman Agentliyi” publik hüquqi şəxs yaradılıb. Agentlik Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyinin, habelə Dövlət Dəniz Agentliyinin tabeliyində Dəniz Üzgüçülüyünün Təhlükəsizliyi Mərkəzi, eləcə də Nəqliyyat və Texniki-Təminat İdarəsi publik hüquqi şəxslərin əsasında formalaşıb.

Azərbaycan Respublikası Prezidentinin 22 oktyabr 2013-cü il tarixli sərəncamı ilə Azərbaycanda mövcud olan iki böyük donanmanın - Azərbaycan Dövlət Xəzər Dəniz Gəmiçiliyi və Azərbaycan Respublikası Dövlət Neft Şirkətinin Xəzər Dəniz Neft Donanmasının birləşdirilərək yenidən təşkil olunması yolu ilə isə “Azərbaycan Xəzər Dəniz Gəmiçiliyi” Qapalı Səhmdar Cəmiyyəti yaradılıb.

İki donanmanın birləşdirilməsində məqsəd dəniz gəmiçiliyi sahəsində yerli və beynəlxalq daşımaların artırılmasına və ölkənin tranzit potensialının gücləndirilməsinə nail olmaqdır.

Azərbaycan dənizçiləri gecə-gündüz, ilin dörd fəslində yorulmaq bilmədən Xəzərin mavi sularında dənizin keşiyini çəkir, bu sahənin inkişafına öz töhfələrini verirlər. Fədakar dənizçilərimizi bayram münasibəti ilə təbrik edir, onlara dözüm, mətanət və işlərində sonsuz uğurlar arzu edirik!

Paylaş:

Baxılıb: 371 dəfə