Prezidentin Fərmanı 17-20 min Qarabağ müharibəsi əlilinin 100 minədək ailə üzvlərinin rifahına birbaşa böyük dəstəkdir

Bakı:

20°C

83%

8m/s

AZ RU EN

Ana səhifə / Xəbər lenti / Prezidentin Fərmanı 17-20 min Qarabağ müharibəsi əlilinin 100 minədək ailə üzvlərinin rifahına birbaşa böyük dəstəkdir

Prezidentin Fərmanı 17-20 min Qarabağ müharibəsi əlilinin 100 minədək ailə üzvlərinin rifahına birbaşa böyük dəstəkdir

28.12.2021 [20:56]

“Prezident İlham Əliyevin birinci Qarabağ müharibəsi əlillərinə də birdəfəlik ödəmə verilməsinə dair imzaladığı yeni Fərman dövlət başçısının Qarabağ müharibəsi əlillərinə, onlardan vəfat etmiş şəxslərin ailələrinə xüsusi diqqət və qayğısını göstərir. Fərmanla 1997-ci il avqustun 2-dək olan dövrdə ölkəmizin ərazi bütövlüyü uğrunda döyüşlərdə yaralanaraq əlilliyi müəyyən olunmuş şəxslərə I dərəcə əlilliyə görə 8 800 manat, II dərəcə əlilliyə görə 6 600 manat, III dərəcə əlilliyə görə 4 400 manat birdəfəlik ödəmə veriləcək. Həmin vəsait nağdsız qaydada həmin şəxslərin bank hesabına köçürüləcək və bu barədə onlara məlumat veriləcək. Bu mənada, Prezident İlham Əliyevin sözügedən Fərmanı aparılan uğurlu sosial islahatların yeni mərhələsi hesab edilməlidir”. Bunu Yeni Azərbaycan Partiyası Nizami rayon təşkilatının sədri Ramil Vəlibəyov deyib.

Ramil Vəlibəyov bildirib ki, birdəfəlik ödəmə Qarabağ müharibəsi əlillərinə, təxminən 17-20 min ailəyə, ümumilikdə isə 100 minədək insanın rifahına birbaşa böyük dəstəkdir: “Bu, Qarabağ müharibəsi əlilləri ilə bağlı çox humanist, qayğıkeş və ədalətli bir addımdır. Əlbəttə ki, bu ilk dəstək deyil və bu gün müharibə əlilləri bütün sahələrdə dövlət başçısının xüsusi qayğısı ilə əhatə olunub. Məsələn, onlara müavinət və təqaüdlər verilir ki, bu ödənişlər də təkcə son üç ildə 2,5-3 dəfə artırılıb. Təsadüfi deyil ki, 2021-ci ilin əvvəlində də artımlar olub, bu günlərdə imzalanan Fərmanlarla da əlillərin müavinətləri artırılıb. Eyni zamanda, şəhid ailələri ilə yanaşı, müharibə əlilləri mənzil və fərdi evlərlə təmin olunurlar. Dövlət başçısının xüsusi qayğısı ilə onların mənzillə təminatı proqramı bu il 5 dəfə genişlənib. 2021-2025-ci illərdə daha 11 min, o cümlədən 2021-ci ildə 3 min mənzil və fərdi evin şəhid ailələri və müharibə əlilinə verilməsi nəzərdə tutulub. 2021-ci ildə artıq 2800, ümumən ötən dövrdə 12 min şəhid ailəsi və müharibə əlili mənzil və fərdi evlə təmin edilib. Bununla yanaşı, 2021-ci ildə 164 avtomobil müharibə əlillərinə verilib, ötən dövrlərdə isə bu rəqəm 7400 olub”.

“İmzalanmış Fərmandan əvvəl Prezident İlham Əliyevin müvafiq qərarları ilə 2019-2020-ci illərdə 1997-ci il avqustun 2-dək Azərbaycanın ərazi bütövlüyü uğrunda şəhid olmuş qəhrəmanların ailələri 11 min manat birdəfəlik ödəmə ilə təmin edilmiş, 12,3 minə yaxın şəhidin 18 mindən çox vərəsəsi birdəfəlik ödəmə ilə təmin olunmuşdu” – deyən Ramil Vəlibəyov əlavə edib ki, bu dəfə isə 1997-ci il avqustun 2-dək olan dövr üzrə Qarabağ müharibəsi əlilərinə birdəfəlik ödəmə verilir.

Ramil Vəlibəyov diqqətə çatdırıb ki, Qarabağ müharibəsi əlilləri, onların ailə üzvləri, qazilər, hərbi ekspertlər, ictimaiyyət nümayəndələri də Prezident İlham Əliyevin Qarabağ müharibəsi əlillərinə qayğıkeş münasibətini təqdir edirlər. Atılan bütün addımları, imzalanan Fərman və sərəncamları müharibə əlillərinə, onların ailələrinə yüksək qayğı kimi dəyərləndirirlər.

Paylaş:

Baxılıb: 673 dəfə