1 həftə internet olmayacaq?

Bakı:

13 °C

76 %

7 m/s

Əlaqə

AZ RU EN

Ana səhifə / Xəbər lenti / 1 həftə internet olmayacaq?

1 həftə internet olmayacaq?

15.02.2022 [10:21]

Nicat DİLQƏMLİ

Bu və ya digər xəbərdən “əsaslanaraq” cəmiyyətə düzgün olmayan informasiya sırımağa çalışanlar hansı məsuliyyətin altına girdiklərindən xəbərsizdirlər, çox güman. Belə informasiyalardan biri də ötən həftənin son günü yayıldı. Nəticə isə manipulyatorların gözlədiyi kimi oldu: bir qrup insan tirajlanan informasiyanın təsirindən elə narahat oldu ki, gəl görəsən. İnternet olmayacaq başlıqlı kontekstdən çıxarılmış xəbərin sədası yayılandan dərhal sonra “VPN yükləyin”, “Meqabayt götürün” kimi “Ağsaqqal məsləhət”ləri verilməyə başlanıldı. Əslində isə deyilənlər heç də həqiqəti əks etdirmir...

“Bakı Telefon Rabitəsi” MMC-dən (Baktelekom) verilən açıqlamada deyilir ki, fevral ayının 14-dən 21-dək CDMA (Code Division Multiple Access) şəbəkəsini dəstəkləyən baza stansiyasının avadanlıqlarında profilaktik işlərin aparılması ilə əlaqədar müvafiq xidmətlərin göstərilməsində fasilələr yaranacaq. Məlumata görə, fasiləni əsasən 511 və 555 prefiksli simsiz telefon abunəçiləri hiss edəcək.

“Təkmilləşdirmə tədbirləri yekunlaşdıqdan sonra CDMA - simsiz telefon xidmətinin fəaliyyəti tam bərpa ediləcək. Abunəçilərdən rabitə xidmətlərində yarana biləcək fasilələri nəzərə almaları xahiş olunur”, - deyə məlumatda bildirilir.

Göründüyü kimi də dayandırma bir həftəlikdir və lokal xarakter daşıyır.

Bəs bu cür təkmilləşdirmə işləri görüldükdə xidmətlərin göstərilməsində fasilələrin yaranması narahatlığa əsas verirmi?

Məsələ ilə bağlı “Yeni Azərbaycan”a danışan Azərbaycan İnternet Forumunun prezidenti Osman Gündüz bildirib ki, CDMA xidmətindən istifadə edənlərin sayı təxminən 5-10 min nəfərdir: “Baktelekom ilə Aztelekomun simsiz rabitə adlanan bir xidməti var. Mobil yox, simsiz, yəni elə bil ki, ev telefonunun daşınan formasıdır, CDMA deyirlər. İkisinin bir yerdə istifadəçi sayı təxminən 5-10 min nəfər olar. Sözügedən problem məhz bu şəxslərə aiddir, CDMA istifadəçilərinə”.

Həmin şəxslərin ödənişlərinin müəyyən hissəsinin geri qaytarılıb-qaytarılmayacağından danışan ekspert hesab edir ki, güzəştin edilməsi doğru olar: “Düşünmürəm ki, bir həftəlik nə isə ola bilər. Yəqin ki, sadəcə baza stansiyalarını yeniləyəcəklər, əlavə avadanlıqlar quraşdıracaqlar, proqramlarda yenilik edəcəklər. Bir həftəlik internetin kəsilməyi ilə bağlı nə isə olacağını düşünmürəm, sadəcə, arabir problemlər ola bilər. Dünya praktikasında adətən bununla bağlı şirkətlərin müəyyən güzəşt etmə praktikası da var. Belə bir güzəştin edilməsi doğru olar”.

Paylaş:

Baxılıb: 829 dəfə