Bulvarda niyə aptek yoxdur?

Bakı:

24 °C

57 %

2 m/s

Əlaqə

AZ RU EN

Ana səhifə / Xəbər lenti / Bulvarda niyə aptek yoxdur?

Bulvarda niyə aptek yoxdur?

10.07.2023 [17:37]

Yeganə BAYRAMOVA

İctimai yerdə insanın qəfil halının pisləşməsi zamanı zəruri məsələ ilkin tibbi yadımın göstərilməsidir. Təbii ki, bunun üçün ətrafda mövcud şəraitin olması da əsas amillərdən biridir. Bəzən eşidirik ki, halı pisləşən şəxsə ya yanlış müdaxilə edilir, ya da ilkin tibbi yardım üçün artıq çox gec olur. Dünyanın bir çox inkişaf etmiş ölkələrinə nəzər yetirsək, görərik ki, mərkəzi küçələrdə, parklarda, iri ticarət mərkəzlərində ilk yardım köşkləri yerləşdirilib.

Məsələn, Böyük Britaniyada yürüyüş zamanı özünü narahat hiss edən şəxslərə parkda ilkin müdaxilə edilir. Parkın bir çox nöqtələrində köşklər yerləşdirilib. Burada çalışması üçün tibb bacısı da ayrılıb. Köşkdə həm tibbi ləvazimatlar, həm də xəstənin istirahət etməsi üçün hər cür şərait yaradılıb.

Qardaş Türkiyədə də bu məsələyə daha həssas yanaşılır. Çox yerlərdə ilkin tibbi yardım qurğuları yerləşdirilib. Qurğunun üzərindəki düyməciyi sıxdıqda, dərhal hadisə yerinə mütəxəssis gəlir və ilkin tibbi yardım göstərilir. Ehtiyac yaranan anda təcili tibbi yardım briqadası dəvət edilir.

Xarici ölkələrə virtual ekskursiya etdikcə bizdə də belə bir xidmətin olması ilə bağlı istəklərimizin nə dərəcə real olduğunu düşünürük. Şəhərimizin hər ay on minlərlə turist qəbul etdiyini nəzərə alsaq, əhalinin sıx olduğu Dənizkənarı Milli Parkda ilkin tibbi yardım köşkünün yaxud da aptekin olmadığını qeyd edə bilərik. Bulvarın istirahət etmək üçün çox böyük xidmətləri mövcuddur. Buna baxmayaraq, o qədər böyük ərazidə nəinki ilk tibbi yardım köşkü, dərman almaq üçün bir dənə olsun aptek gözə dəymir. Bulvarda olanlar arasında yaşlı insanlar, qan təzyiqindən əziyyət çəkənlər də ola bilər. Qəfil halın dəyişməsi baş verərsə, gərək insanlar dərman almaq üçün Bulvarın kənarına çıxsınlar.

Problemin həlli yolunu tapmaq üçün Dənizkənarı Bulvar İdarəsi ilə əlaqə saxlamağa çalışsaq da, cəhdimiz baş tutmadı. Səhiyyə Nazirliyinin məlumatına əsasən isə Bulvarda apteklərin və tibb işçisi vakansiyasının olub-olmaması məsələsi nazirliyin tabeliyində deyil.

Mövzu barədə Yeniazerbaycan.com-a açıqlama verən həkim Şahvələd Məmmədov bildirib ki, təcili yardımı gözləyənə qədər Bulvarın nəzdində xəstəyə tibbi müdaxilə edəcək şəxs və dərmanlar olmalıdır. Onun sözlərinə görə, Bulvarın nəzdində dərman köşkləri olmalıdır ki, ziyarətçilərin ərazidən kənara çıxmaqlarına ehtiyac qalmasın: “Hazırda havaların isti keçməsi ilə bağlı Milli Parka üz tutanların sayı çoxluq təşkil edir. Yay aylarında yaşlı insanları və dəyişən atmosferi nəzərə alsaq, ilk yardım köşkləri və kiçik apteklərin olması zəruridir. Fikrimcə, orada böyük aptek yaratmağa ehtiyac yoxdur. Onsuz da şəhərdə kifayət qədər apteklər var. Məqsəd insanlar üçün ehtiyat dərmanlarının əlçatan olmasıdır. 15 kvadratmetrlik bir yeri izolyasiya edib, apteklər açmaq mümkündür. Dünyanın bir çox ölkələrində bu xidmət varsa, niyə də bizdə olmasın? Xəstə olan insanlar bəzən ehtiyat dərmanlarını üzərində daşımağı unudurlar. Bu zaman dərman axtarmalı olurlar. Aptek isə ancaq şəhərin başqa bir nöqtəsində var. Məsələ köşk yaradıb içinə dərmanları qoymaqla da bitmir. Həmin dərmanların saxlanılma şəraitinə Səhiyyə Nazirliyi və İcbari Tibbi Sığorta kimi qurumlar tərəfindən ciddi nəzarət olunmalıdır. Bizim səlahiyyətimizdə deyil, deməklə məsələ həll olunmur. İnsanların səhhətinə görə xidmət etmək ümdə vəzifədir. Unutmayaq ki, sağlamlıqdan vacib məsələ yoxdur”.

Paylaş:

Baxılıb: 519 dəfə