Təxribatlar bitmir...

Bakı:

27 °C

58 %

2 m/s

Əlaqə

AZ RU EN

Ana səhifə / Xəbər lenti / Təxribatlar bitmir...

Təxribatlar bitmir...

15.09.2023 [11:25]

Y.Bayramova

Rəsmi İrəvan 2020-ci ilin noyabrında imzaladığı üçtərəfli bəyannamənin şərtlərinə əməl etməkdən boyun qaçırır. Azərbaycanın sülh gündəliyini irəli aparmaq üçün güclü siyasi iradə nümayiş etdirdiyi isə göz qabağındadır. 30 ildir ki, bu ölkəni xarakterizə edən model budur: Danışıqların imitasiyası, geriyə addım vasitəsilə əvvəlki müqavilələrdən və götürülmüş öhdəliklərin icrasından yayınma, eləcə də müxtəlif siyasi, hərbi və digər təxribatlara əl atmaq. Bir sözlə, Ermənistanın məqsədi aydındır-Azərbaycan ərazisində separatizmi bütün mümkün vasitələrlə dəstəkləmək.

Son günlər Ermənistan Azərbaycanla şərti sərhəddə 1-ci, 2-ci, 3-cü və 4-cü ordu korpuslarını fəal şəkildə gücləndirir. Artıq bir həftədən çoxdur ki, hərbi mövqelərə zirehli texnika və artilleriya mərmiləri çatdırılıb, təmir obyektləri fasiləsiz işləyir. Bununla bağlı sosial şəbəkələrdə müvafiq görüntülər də yayılıb. Qeyd olunub ki, Ermənistan Azərbaycanın Qarabağ bölgəsindəki qanunsuz silahlı birləşmələrini yüksək döyüş hazırlığı vəziyyətinə gətirir. Təkcə son bir həftə ərzində Ermənistanda ehtiyatda olan on minədək hərbi qulluqçu çağırılıb.

Ermənistan 30 ilə yaxın davam edən işğal dövründə olduğu kimi yenə də vəziyyəti gərginləşdirməklə məşğuldur. Atəşkəsi pozur və təxribatlara əl atırlar, nəticədə danışıqların mənası itir. Müdafiə Nazirliyinin yaydığı məlumata görə, sentyabrın 13-ü saat 12:20 radələrində sülhməramlıların müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri tərəfindən Ağdam rayonu istiqamətindəki döyüş mövqelərimiz intensiv atəşə tutulub.

Diversiya qrupundan ərazimizə sızmaq cəhdi...

Nazirlikdən bildirilib ki, saat 19:00 radələrində qeyri-qanuni erməni silahlı dəstələrinin kəşfiyyat-diversiya qrupu terror-təxribat əməliyyatları həyata keçirmək məqsədilə Kəlbəcər rayonu Mərcimək yaşayış məntəqəsi istiqamətində yerləşən döyüş mövqelərinin arasındakı dərə boşluqlarından istifadə edərək bölmələrimizin yerləşdiyi əraziyə sızmağa cəhd edib. Döyüş növbətçiliyi aparan hərbi qulluqçularımızın sayıqlığı nəticəsində təxribatın qarşısı alınıb. Nəticədə kəşfiyyat-diversiya qrupu bir üzvü yaralı olmaqla geri çəkilməyə məcbur edilib.

Laçında ekskavatorumuz minaya düşdü

Bundan başqa, sentyabrın 13-də saat 16:00 radələrində Laçında ekskavator tank əleyhinə minaya düşüb. Bu barədə Daxili İşlər Nazirliyindən (DİN) məlumat verilib. Hadisə rayonun Qazıdərə kəndində qeydə alınıb. Həkəri çayının sahilində təmir-bərpa işləri aparan şirkətin texnikasına maddi ziyan dəyib.

Sentyabrın 13-ü saat 21:35-dən sentyabrın 14-ü saat 00:45-dək Ermənistan Kəlbəcər rayonunun Mollabayramlı və Tovuz rayonunun Ağdam yaşayış məntəqələri istiqamətlərində yerləşən mövqeləri atıcı silahlardan fasilələrlə atəşə tutub. Bundan başqa, sentyabrın 14-ü saat 13:45 radələrində Ermənistan silahlı qüvvələri Gədəbəy rayonunun Daryurd yaşayış məntəqəsi istiqamətində yerləşən mövqelərimizi müxtəlif çaplı atıcı silahlardan atəşə tutub. Müdafiə Nazirliyindən verilən məlumata görə, Ordumuzun bölmələri tərəfindən qeyd olunan istiqamətdə cavab tədbirləri görülüb.

Aydındır ki, sülh prosesinə maneçilik törədən Ermənistan tərəfi bu təxribatlara əl atmaqla danışıqlara kölgə salmaq niyyətindədir. Qeyd edək ki, tez-tez mövqelərimizi atəşə tutan və cavab tədbirləri ilə susdurulan ermənilər niyətlərinə nail ola bilməyəcəklər. Azərbaycan dövləti bütün proseslərə nəzarət edir. Ordumuz hər zaman olduğu kimi, indi də istənilən təxribata adekvat cavab verir. Təxribatların qarşısı alınır və bundan sonra da alınacaq.

Paylaş:

Baxılıb: 518 dəfə