Aİ Trampdan Rusiyaya sanksiya tətbiq etməsini istəyir

Bakı:

21°C

64%

10m/s

Əlaqə

AZ RU EN

Ana səhifə / Analitik / Aİ Trampdan Rusiyaya sanksiya tətbiq etməsini istəyir

Aİ Trampdan Rusiyaya sanksiya tətbiq etməsini istəyir

17.09.2025 [10:15]

Vaşinqton şərt qoyur

Vaşinqton NATO-dakı müttəfiqlərini Rusiyaya qarşı sanksiya məsələsinə ciddi yanaşmağa çağırıb. Belə ki, ABŞ Dövlət katibi Marko Rubio “Fox News” telekanalına müsahibəsində bildirib ki, Avropa ölkələri Vaşinqtondan Rusiyaya qarşı sanksiyaların sərtləşdirilməsini tələb etməzdən öncə ilk növbədə özləri eyni məhdudiyyətləri tətbiq etməlidirlər. ABŞ Prezidenti Donald Trampın yeni sanksiyaların tətbiqini nə qədər gözləyəcəyi ilə bağlı sualı cavablandıran Rubio qeyd edib ki, prezident “süni şəkildə vaxt çərçivəsi elan etməyəcək. O əlavə edib ki, Avropa da eyni addımları atmalıdır. “Avropada hələ də Rusiya mallarını, o cümlədən Rusiya neftini alan ölkələr var. Prezident Avropadakı tərəfdaşlarımıza çağırış edib ki, onlar bizdən tələb etdikləri sanksiyaları özləri də tətbiq etsinlər. Əgər bu məsələyə, həqiqətən, sadiqdirlərsə, biz onları bu istiqamətdə konkret addımlar atmağa təşviq etmək istəyirik”, - deyə dövlət katibi vurğulayıb. Qeyd edək ki, ABŞ Prezidenti Donald Tramp sentyabrın 13-də bəyan edib ki, əgər Şimali Atlantika Alyansının bütün üzvləri birlikdə hərəkət edərsə və Rusiya neftinin alışını dayandırarsa, Rusiyaya qarşı sərt sanksiyalar tətbiq etməyə hazırdır. “Mən Rusiyaya qarşı böyük sanksiyalar tətbiq etməyə hazıram, amma yalnız o halda ki, bütün NATO ölkələri buna razılaşsın və eyni addımı atsın, həmçinin bütün NATO ölkələri Rusiyadan neft almasını dayandırsın,” - deyə Tramp bildirib.

Rusiyaya qarşı vahid cəbhədə birləşmək mümkün olacaq?

Məsələ ilə bağlı politoloq Rəşad Bayramov “Yeni Azərbaycan” qəzetinə şərhində qeyd edib ki, ABŞ və Avropa ölkələrinin Rusiyaya qarşı birgə sanksiyaların tətbiq edilməsi istiqamətində vahid mövqe ortaya qoyması qeyri-real görünür. Onun sözlərinə görə, Avropada Rusiya ilə iqtisadi-ticari münasibətləri tamamilə dayandırmaq istəməyən müəyyən ölkələr var. “Tramp administrasiyasının bu şəkildə şərt irəli sürməsi faktiki olaraq onu deməyə əsas verir ki, ABŞ Rusiyaya təzyiq göstərməyin məsuliyyətini birbaşa Avropa ölkələrinin öhdəliyinə buraxmaq istəyir. Məlumdur ki, Tramp Rusiyadan neft alışını dayandırmaqla yanaşı, Moskvanın ticarət tərəfdaşı olan Çin və Hindistanın məhsullarına 50 və ya 100 faizlik tarif tətbiq edilməsini də şərt kimi irəli sürür. Halbuki Ağ Ev çox yaxşı başa düşür ki, Avropa İttifaqının ayrı-ayrı üzv ölkələrinin Rusiya ilə ticarəti, o cümlədən bu ölkədən neft alışını davam etdirməsi məcburiyyətdən irəli gəlir. Çünki həmin ölkələrin başqa ölkələrdən ucuz qiymətə neft almaq imkanları yoxdur, buna görə də Rusiyaya üz tuturlar. Ümumiyyətlə, Avropa İttifaqı daxilində Rusiyaya qarşı sanksiyalarla bağlı vahid mövqe ortaya qoyulmayıb. Bu, çox çətin bir məsələdir. Tramp administrasiyası bunu çox yaxşı bildiyi halda bu cür şərtlərlə çıxış etməsi məsuliyyətdən yayınmağa hesablanıb”, - deyə R.Bayramov vurğulayıb. Ekspert əlavə edib ki, Tramp hələ də Rusiyaya qarşı sərt tədbirlər görmək niyyətində deyil; “Avropa İttifaqı bu günə qədər Rusiyaya qarşı 18 sanksiyalar paketi tətbiq edib. Aİ və ittifaqın üzv ölkələri Trampdan əsas istəyi budur ki, hazırda Konqresin gündəmində olan Rusiya ilə bağlı sanksiyalar tez bir zamanda tətbiq olunsun. Amma Tramp hələ də bu məsələdə tələsmir və Kremlə düşünməyə vaxt verir. Ancaq Moskva Ukraynada öz hədəflərindən bir addım da geri çəkilmək istəmir”.

Yunis ABDULLAYEV

Paylaş:

Baxılıb: 216 dəfə