Aqrar sektorun inkişafı dövlət siyasətinin prioritet istiqamətlərindən biridir

Bakı:

26 °C

60 %

7 m/s

Əlaqə

AZ RU EN

Ana səhifə / Arxiv / Aqrar sektorun inkişafı dövlət siyasətinin prioritet istiqamətlərindən biridir

Aqrar sektorun inkişafı dövlət siyasətinin prioritet istiqamətlərindən biridir

01.06.2026 [10:09]

Azərbaycan Respublikasının Prezidenti cənab İlham Əliyevin sədrliyi ilə keçirilən kənd təsərrüfatı məsələlərinə həsr olunmuş müşavirə ölkədə aqrar sektorun inkişafına verilən yüksək önəmin növbəti təsdiqi oldu. Müşavirədə kənd təsərrüfatının mövcud vəziyyəti, qarşıda duran əsas vəzifələr, ərzaq təhlükəsizliyinin təmin olunması, müasir texnologiyaların tətbiqi və fermerlərin dövlət dəstəyi ilə əhatə olunması kimi mühüm məsələlər geniş şəkildə müzakirə edildi. Son illər Azərbaycanda qeyri-neft sektorunun inkişafı istiqamətində həyata keçirilən siyasətdə aqrar sahə xüsusi yer tutur. Dövlət başçısının rəhbərliyi ilə qəbul edilən proqramlar kənd təsərrüfatının davamlı inkişafına, regionlarda məşğulluğun artırılmasına və kənd əhalisinin sosial rifahının yüksəldilməsinə mühüm töhfə verir. Bu baxımdan keçirilən müşavirə aqrar sahənin gələcək inkişaf istiqamətlərinin müəyyənləşdirilməsi baxımından böyük əhəmiyyət daşıyır. Bu müşavirədə vurğulandı ki, ərzaq təhlükəsizliyi hər bir dövlət üçün strateji məsələdir. Dünyada baş verən qlobal iqtisadi dəyişikliklər, iqlim problemləri və ərzaq bazarında müşahidə olunan dalğalanmalar fonunda kənd təsərrüfatının inkişaf etdirilməsi daha da aktuallaşır. Azərbaycan dövləti bu çağırışları nəzərə alaraq aqrar sahədə məhsuldarlığın artırılması, torpaq və su resurslarından səmərəli istifadə, yerli istehsalın genişləndirilməsi istiqamətində mühüm addımlar atır. Ölkə prezidenti

cənab İlham Əliyev müşavirədə kənd təsərrüfatında innovativ yanaşmaların tətbiqinin vacibliyini xüsusi qeyd etdi. Müasir suvarma sistemlərinin qurulması, rəqəmsal texnologiyaların tətbiqi, aqroparkların fəaliyyətinin genişləndirilməsi və texnika təminatının gücləndirilməsi aqrar sahənin modernləşdirilməsi baxımından mühüm əhəmiyyət daşıyır. Bu addımlar həm məhsuldarlığın yüksəlməsinə, həm də kənd təsərrüfatı məhsullarının keyfiyyətinin artmasına şərait yaradır.Fermerlərə göstərilən dövlət dəstəyi də müşavirədə diqqət mərkəzində olan əsas məsələlərdən biri idi. Subsidiyalar, güzəştli kreditlər, lizinq yolu ilə kənd təsərrüfatı texnikasının verilməsi və toxum təminatı fermerlərin fəaliyyətinin genişlənməsinə ciddi stimul yaradır. Dövlətin bu istiqamətdə həyata keçirdiyi siyasət kənd təsərrüfatında sahibkarlığın inkişafına və regionların iqtisadi potensialının güclənməsinə xidmət edir.Müşavirədə işğaldan azad edilmiş ərazilərdə kənd təsərrüfatının inkişaf perspektivlərinə də xüsusi diqqət yetirildi.Qarabağ və Şərqi Zəngəzur iqtisadi rayonlarında münbit torpaq sahələrinin yenidən dövriyyəyə cəlb olunması, müasir infrastrukturun qurulması və “ağıllı kənd” layihələrinin həyata keçirilməsi bu bölgələrin aqrar potensialını daha da artıracaq.Bu istiqamətdə həyata keçirilən layihələr Azərbaycanın kənd təsərrüfatında yeni inkişaf mərhələsinin başlanğıcı kimi qiymətləndirilir. Kənd təsərrüfatına dair müşavirə bir daha göstərdi ki, Azərbaycan dövləti aqrar sahənin inkişafını ölkənin iqtisadi siyasətinin əsas prioritetlərindən biri kimi müəyyən edib. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində kənd təsərrüfatı həm iqtisadi inkişafın, həm də sosial rifahın təmin olunmasında mühüm rol oynayır.Qarşıdakı dövrdə bu sahədə aparılan islahatların daha da dərinləşdirilməsi Azərbaycanın ərzaq təhlükəsizliyinin möhkəmləndirilməsinə və qeyri-neft sektorunun dayanıqlı inkişafına mühüm töhfələr verəcək.

Səyyad Mirzəyev

YAP Ağdam rayon təşkilatının əməkdaşı

Paylaş:

Baxılıb: 407 dəfə