Qurtuluşla başlanan dövlətçilik yolu Azərbaycanı Zəfərə və tam suverenliyə qovuşdurdu

Bakı:

26 °C

64 %

8 m/s

Əlaqə

AZ RU EN

Ana səhifə / Arxiv / Qurtuluşla başlanan dövlətçilik yolu Azərbaycanı Zəfərə və tam suverenliyə qovuşdurdu

Qurtuluşla başlanan dövlətçilik yolu Azərbaycanı Zəfərə və tam suverenliyə qovuşdurdu

11.06.2026 [16:37]

Bəzi tarixi hadisələrin əhəmiyyəti illər keçdikcə daha aydın görünür. Çünki zaman həmin hadisələrin dövlətin və xalqın taleyində oynadığı rolu açıq şəkildə ortaya qoyur. Azərbaycan xalqının müasir tarixində 15 İyun - Milli Qurtuluş Günü məhz belə taleyüklü hadisələrdən biridir. 15 İyun Azərbaycan dövlətçiliyinin xilasının, milli birliyin bərpasının, sabitliyin təmin edilməsinin və gələcək inkişaf strategiyasının əsasının qoyulmasının rəmzidir.

1993-cü ilin iyununda Azərbaycan son dərəcə mürəkkəb bir vəziyyətlə üzləşmişdi. Dövlət idarəçiliyində yaranmış boşluq, ölkədaxili gərginlik, müxtəlif siyasi qüvvələr arasında qarşıdurmalar və hakimiyyət böhranı müstəqilliyin taleyini sual altına qoymuşdu. Dövlətçiliyin əsaslarına yönələn təhdidlər getdikcə artır, ölkə parçalanmaq və vətəndaş qarşıdurması təhlükəsi ilə üz-üzə qalırdı. Məhz belə bir zamanda xalqın tələbi ilə siyasi hakimiyyətə qayıdan Ulu Öndər Heydər Əliyev Azərbaycanın gələcəyini müəyyənləşdirən tarixi missiyanı öz üzərinə götürdü.

15 iyun 1993-cü ildə Heydər Əliyevin Azərbaycan Respublikası Ali Sovetinin Sədri seçilməsi ilə ölkənin ictimai-siyasi həyatında yeni mərhələ başlandı. Ulu Öndərin zəngin dövlətçilik təcrübəsi, qətiyyətli siyasi iradəsi və milli maraqlara söykənən fəaliyyəti qısa müddət ərzində ölkədə sabitliyin bərqərar olmasına imkan yaratdı. Dövlət hakimiyyətinin nüfuzu bərpa edildi, qanunsuz silahlı dəstələrin fəaliyyətinə son qoyuldu, hüquqi dövlət quruculuğu istiqamətində mühüm addımlar atıldı. 1994-cü ildə imzalanan "Əsrin Müqaviləsi" isə Azərbaycanın müasir inkişaf tarixində yeni mərhələnin başlanğıcı oldu. Bu müqavilə ölkəmizin beynəlxalq nüfuzunu artırmaqla yanaşı, iqtisadi müstəqilliyinin möhkəmlənməsinə, böyük investisiyaların cəlb edilməsinə və enerji strategiyasının uğurla həyata keçirilməsinə geniş imkanlar yaratdı. Sonrakı illərdə reallaşdırılan qlobal enerji və nəqliyyat layihələri Azərbaycanın regionun aparıcı dövlətlərindən birinə çevrilməsini təmin etdi.

Milli Qurtuluşla təməli qoyulan dövlətçilik strategiyası Prezident İlham Əliyev tərəfindən uğurla davam etdirilərək yeni mərhələyə yüksəldildi. Azərbaycanın iqtisadi qüdrəti artdı, beynəlxalq nüfuzu daha da möhkəmləndi, müasir və peşəkar ordu quruculuğu istiqamətində mühüm nailiyyətlər əldə edildi. Dövlətimizin hərbi, siyasi və iqtisadi potensialının gücləndirilməsi nəticəsində Azərbaycan öz tarixinin ən böyük hədəfinə doğru inamla addımladı.

2020-ci ildə Müzəffər Ali Baş Komandan İlham Əliyevin rəhbərliyi altında Azərbaycan Ordusunun qazandığı tarixi Zəfər Milli Qurtuluş siyasətinin ən möhtəşəm nəticəsi oldu. Otuz ilə yaxın işğal altında qalan torpaqlarımız azad edildi, Azərbaycanın ərazi bütövlüyü bərpa olundu. 2023-cü ildə həyata keçirilən antiterror tədbirləri nəticəsində isə dövlətimizin suverenliyi tam təmin edildi.

Bu gün Qarabağda və Şərqi Zəngəzurda aparılan genişmiqyaslı quruculuq işləri, doğma torpaqlarına qayıdan keçmiş məcburi köçkünlər, Şuşada və Xankəndidə dalğalanan üçrəngli bayrağımız Milli Qurtuluşun real nəticələrinin ən parlaq təzahürüdür. Bütün bunlar bir daha təsdiq edir ki, 15 İyun 1993-cü ildə əsası qoyulan siyasi kurs Azərbaycanın müasir inkişafının, Böyük Zəfərinin və tam suverenliyinin möhkəm təməlidir.

Nəzrin Əlizadə,

YAP Nərimanov rayon təşkilatının məsləhətçisi

Paylaş:

Baxılıb: 274 dəfə