Gündüz İsmayılov: Dinin siyasiləşdirilməsi və dünyəvilik prinsipinə qarşı çıxışlar milli təhlükəsizliyə təhdiddir

Bakı:

27 °C

53 %

4 m/s

AZ RU EN

Ana səhifə / Arxiv / Gündüz İsmayılov: Dinin siyasiləşdirilməsi və dünyəvilik prinsipinə qarşı çıxışlar milli təhlükəsizliyə təhdiddir

Gündüz İsmayılov: Dinin siyasiləşdirilməsi və dünyəvilik prinsipinə qarşı çıxışlar milli təhlükəsizliyə təhdiddir

18.06.2026 [15:58]

Dini Qurumlarla İş üzrə Dövlət Komitəsinin təşkilatçılığı ilə Lerik şəhərində “Müasir dövrdə dini təhlükəsizlik və ideoloji təhdidlər” mövzusunda regional konfrans keçirilib.

AZƏRTAC-ın bölgə müxbiri xəbər verir ki, tədbirdən öncə konfrans iştirakçıları Ulu Öndər Heydər Əliyevin Lerik şəhərində ucaldılan abidəsini ziyarət edib, önünə gül dəstələri düzüblər.

Konfransda Dövlət Himni səsləndirilib və Vətən müharibəsində qazanılmış tarixi Zəfərə həsr olunmuş videoçarx nümayiş etdirilib.

Lerik Rayon İcra Hakimiyyətinin başçısı Əkbər Abbasov çıxışında bildirib ki, güclü dövlət milli və dini irsin qorunmasının əsas təminatçısıdır. Dini sahədə həyata keçirilən maarifləndirmə tədbirləri dövlət qurumları ilə dini icmalar arasında əməkdaşlıq və vahid ictimai düşüncənin gücləndirilməsi baxımından xüsusi əhəmiyyət kəsb edir. Bu istiqamətdə görülən işlər milli-mənəvi dəyərlərin təbliği, dini həmrəyliyin möhkəmləndirilməsi və gənc nəslin sağlam ideoloji mühitdə formalaşmasına töhfə verir.

Eyni zamanda, Azərbaycanın Vətən müharibəsində əldə etdiyi tarixi Zəfər nəticəsində işğaldan azad olunmuş ərazilərdə məscidlərin və digər dini-mədəni abidələrin bərpası dövlətin milli-mənəvi dəyərlərə verdiyi önəmin bariz göstəricisidir.

Dini Qurumlarla İş üzrə Dövlət Komitəsinin sədr müavini Gündüz İsmayılov Azərbaycanda dövlət və din münasibətləri fonunda qarşıya çıxan əsas ideoloji təhlükələr haqqında danışaraq, İslam dəyərlərinin azərbaycançılıq məfkurəsi ilə vəhdətdə qorunmasının vacibliyi vurğulayıb. Qeyd edib ki, din pərdəsi altında başqa xalqların həyat tərzinin və təfəkkürünün cəmiyyətə yeridilməsi, dinin siyasiləşdirilərək ibadət yerlərinin ideoloji alətə çevrilməsi və dünyəvilik prinsipinə qarşı çıxışlar birbaşa milli təhlükəsizliyə təhdiddir. Gündüz İsmayılov Azərbaycana xas olan multikulturalizm, tolerantlıq və məzhəblərarası dinc yanaşı yaşama ənənələrinin qorunmasının, dindarlıqla məzhəbçiliyin bir-birindən fərqləndirilməsinin vacib olduğunu diqqətə çatdırıb.

Milli Məclisin deputatı Vasif Qafarov bildirib ki, radikalizmlə mübarizədə maarifləndirmə, düzgün dini təhsil və gənclərin adət-ənənələrə bağlı yetişməsi mühüm əhəmiyyət daşıyır. Dini təhlükəsizliyin və mədəni irsin qorunması dövlətlə yanaşı, bütün cəmiyyətin ümumi məsuliyyətidir və bu istiqamətdə birgə fəaliyyət göstərilməsi vacibdir. Azərbaycanın tarixən tolerantlıq və multikulturalizm ənənələrinə sadiq qaldığını vurğulayan Vasif Qafarov ölkədə dini etiqad azadlığının təmin edildiyini, müxtəlif dini konfessiyaların qarşılıqlı hörmət şəraitində fəaliyyət göstərdiyini qeyd edib.

Tədbir işini “Qloballaşma prosesində din amili” və “İdeoloji çağırışlar kontekstində dini radikalizm” mövzuları üzrə panel müzakirələrlə davam etdirib.

Paylaş:

Baxılıb: 105 dəfə