Azərbaycanın etibarlı tərəfdaşlıq modeli

Bakı:

26 °C

78 %

10 m/s

Əlaqə

AZ RU EN

Ana səhifə / Arxiv / Azərbaycanın etibarlı tərəfdaşlıq modeli

Azərbaycanın etibarlı tərəfdaşlıq modeli

05.08.2026 [07:35]

Azərbaycan Prezidenti cənab İlham Əliyevin 31 iyul 2026-cı ildə Qırğızıstana dövlət səfəri zamanı mətbuata verdiyi "Müttəfiqlik münasibətləri çox böyük məsuliyyət deməkdir və biz bu məsuliyyətə hazırıq" fikri ölkəmizin xarici siyasətinin mahiyyətini aydın şəkildə ifadə edir. Bu yanaşma göstərir ki, Azərbaycan üçün müttəfiqlik yalnız siyasi bəyanatlar və ya diplomatik münasibətlər deyil, qarşılıqlı etimad, ortaq maraqlar və götürülən öhdəliklərə sadiqlik üzərində qurulan strateji əməkdaşlıq modelidir. Son illər Prezident İlham Əliyevin rəhbərliyi ilə həyata keçirilən çoxşaxəli xarici siyasət Azərbaycanın beynəlxalq nüfuzunu əhəmiyyətli dərəcədə artırıb. Bu gün ölkəmiz regionda etibarlı tərəfdaş, verdiyi sözə əməl edən dövlət kimi tanınır. Məhz bu etimad Azərbaycanın müxtəlif coğrafiyalarda dostluq və əməkdaşlıq əlaqələrini genişləndirməsinə, Türk dünyasında isə inteqrasiya proseslərinin fəal iştirakçılarından birinə çevrilməsinə imkan yaradıb.

Azərbaycan ilə Qırğızıstan arasında müttəfiqlik münasibətlərinin rəsmiləşdirilməsi iki ölkə arasında əlaqələrin keyfiyyətcə yeni mərhələyə yüksəldiyini təsdiqləyir. Bu münasibətlər siyasi dialoqun inkişafı ilə yanaşı, iqtisadi əməkdaşlığın, nəqliyyat, enerji, təhsil, rəqəmsal inkişaf və humanitar sahələrdə qarşılıqlı fəaliyyətin daha da genişlənməsi üçün möhkəm hüquqi və siyasi zəmin yaradır. Dövlətlərarası münasibətlərdə etimadın institusional əsaslar üzərində qurulması gələcək əməkdaşlığın davamlılığını təmin edən başlıca amillərdəndir. Prezident İlham Əliyevin qeyd etdiyi məsuliyyət anlayışı beynəlxalq münasibətlər sistemində xüsusi əhəmiyyət daşıyır. Müttəfiqlik dövlətlərin yalnız hüquqlarını deyil, həm də qarşılıqlı öhdəliklərini müəyyən edir. Bu isə o deməkdir ki, tərəflər bir-birinin milli maraqlarına hörmətlə yanaşmalı, regional sabitliyin qorunmasına töhfə verməli və ortaq layihələrin uğurla həyata keçirilməsi üçün birgə fəaliyyət göstərməlidirlər. Azərbaycanın xarici siyasət təcrübəsi göstərir ki, ölkəmiz bütün tərəfdaşları ilə münasibətlərdə qarşılıqlı hörmət və bərabərhüquqluluq prinsiplərinə sadiq qalır. Bu prinsip sayəsində Azərbaycan müxtəlif beynəlxalq platformalarda etibarlı tərəfdaş kimi qəbul olunur və irəli sürdüyü təşəbbüslər geniş dəstək qazanır. Qırğızıstanla münasibətlərin müttəfiqlik səviyyəsinə yüksəlməsi də məhz belə ardıcıl və prinsipial siyasətin nəticəsidir. Müasir geosiyasi reallıqlar fonunda Türk dövlətləri arasında həmrəyliyin və qarşılıqlı dəstəyin gücləndirilməsi xüsusi aktuallıq kəsb edir. Azərbaycan və Qırğızıstan arasında möhkəmlənən müttəfiqlik əlaqələri yalnız ikitərəfli münasibətlərə deyil, bütövlükdə Türk dünyasında siyasi dialoqun, iqtisadi inteqrasiyanın və regional təhlükəsizliyin möhkəmlənməsinə xidmət edir. Prezident İlham Əliyevin Qırğızıstana dövlət səfəri bir daha nümayiş etdirdi ki, Azərbaycan dostluğa və tərəfdaşlığa böyük dəyər verir, eyni zamanda bu münasibətlərin yaratdığı məsuliyyəti də yüksək səviyyədə dərk edir. Məhz bu məsuliyyət hissi ölkəmizin beynəlxalq aləmdə etibarlı mövqeyini daha da möhkəmləndirir və Azərbaycanı regionun sülh, əməkdaşlıq və inkişaf gündəliyini müəyyənləşdirən aparıcı dövlətlərindən biri kimi ön plana çıxarır.

Səyyad Mirzəyev,

YAP Ağdam rayon təşkilatının əməkdaşı

Paylaş:

Baxılıb: 159 dəfə