Həqiqətlərimizi dünyaya çatdıraq: Ulu Öndər Heydər Əliyevin dövlətçilik irsi və informasiya cəbhəsi

Bakı:

18 °C

82 %

2 m/s

AZ RU EN

Ana səhifə / Arxiv / Həqiqətlərimizi dünyaya çatdıraq: Ulu Öndər Heydər Əliyevin dövlətçilik irsi və informasiya cəbhəsi

Həqiqətlərimizi dünyaya çatdıraq: Ulu Öndər Heydər Əliyevin dövlətçilik irsi və informasiya cəbhəsi

02.10.2026 [10:44]

Hər bir xalqın tarixində onun kimliyini, keçdiyi yolu və yaşadığı çətinlikləri
göstərən mühüm dönəmlər var. Azərbaycan xalqının da zəngin tarixi ilə yanaşı,
dünya ictimaiyyətinə çatdırılması vacib olan həqiqətləri mövcuddur. Bu
həqiqətlərin dünyaya düzgün və obyektiv şəkildə təqdim edilməsi ölkəmiz üçün
hər zaman strateji əhəmiyyət daşıyıb.
Azərbaycan tarixinin müxtəlif dövrlərində xalqımız ağır sınaqlarla qarşılaşıb.
Məhz 1993-cü ilin yayında ölkəmiz vətəndaş müharibəsi, torpaqlarımızın işğalı
və dövlətçiliyin itirilməsi təhlükəsi ilə üz-üzə qalmışdı. 1993-cü il oktyabrın 3-
də xalqın yekdil dəstəyi ilə Ulu Öndər Heydər Əliyevin Azərbaycan
Respublikasının Prezidenti seçilməsi ölkəmizi bu ağır böhrandan xilas etdi,
milli müstəqilliyimizi əbədiləşdirdi və Azərbaycan həqiqətlərinin dünyaya
çatdırılması siyasətinin təməlini qoydu.
Ulu Öndər Heydər Əliyev hakimiyyətə gəldiyi ilk günlərdən etibarən
Azərbaycanı bürüyən informasiya blokadasını yardı. Azərbaycan həqiqətlərinin
dünyaya çatdırılması yalnız baş vermiş hadisələr haqqında məlumat vermək
deyil, tariximizin, mədəniyyətimizin və xalqımızın yaşadığı hadisələrin
beynəlxalq hüquq müstəvisində düzgün şəkildə tanıdılması demək idi. Çünki
həqiqət nə qədər doğru və aydın təqdim olunarsa, beynəlxalq aləmdə onu
anlamaq və dəstəkləmək bir o qədər asan olar.
Bu böyük missiyanın reallaşmasında müxtəlif vasitələrdən istifadə edilir.
Heydər Əliyevin əsasını qoyduğu hücum diplomatiyası sayəsində
diplomatlarımız beynəlxalq görüşlərdə və təşkilatlarda ölkəmizin mövqeyini
qətiyyətlə çatdırır, tarixçilər və tədqiqatçılar obyektiv araşdırmalar aparır,
jurnalistlər məqalələr hazırlayırlar. Müasir dövrdə isə internet və sosial media
Azərbaycan həqiqətlərinin daha geniş auditoriyaya çatdırılması üçün mühüm
imkanlar yaradır.
Gənclərin bu prosesdə rolu da böyükdür. Müasir Azərbaycan gəncliyi xarici
dillərdə ölkəmizin tarixi, mədəniyyəti və milli dəyərləri haqqında məzmun
paylaşmaqla bu müqəddəs işə öz töhfəsini verə bilər. Bunun üçün ilk növbədə
tariximizi yaxşı bilmək, faktları düzgün mənbələrdən öyrənmək və onları
məsuliyyətlə təqdim etmək lazımdır.

Azərbaycanın dünyaya yalnız müharibə və münaqişə tarixi ilə deyil, zəngin
mədəniyyəti ilə də tanıdılması vacibdir. Muğamımız, xalçalarımız, qədim
şəhərlərimiz, milli mətbəximiz, ədəbiyyatımız və musiqimiz xalqımızın tarixini
dünyaya göstərən mühüm dəyərlərdir. Mədəniyyətimizi təbliğ etmək də
Azərbaycan həqiqətlərinin dünyada qəbul olunmasının ayrılmaz hissəsidir.
Bu gün Müzəffər Ali Baş Komandan İlham Əliyevin rəhbərliyi ilə qazanılan 44
günlük Vətən müharibəsi Zəfəri və ərazi bütövlüyümüzün tam bərpası Heydər
Əliyev ideyalarının və uzaqgörən siyasətinin təntənəsidir. İndi informasiya
cəbhəsində üzərimizə düşən məsuliyyət daha da artıb. Hər bir vətəndaş sosial
mediada və beynəlxalq platformalarda paylaşdığı məlumatın ölkəmiz haqqında
formalaşan fikrə təsir etdiyini unutmamalıdır.
Tariximizi qorumaq yalnız keçmişi xatırlamaq deyil, həm də 3 oktyabr kimi
dönüş nöqtələrini və böyük Zəfərlərimizi gələcək nəsillərə düzgün çatdırmaqdır.
Azərbaycan xalqının tarixi, mədəniyyəti və keçdiyi yol haqqında doğru
məlumatlar dünyaya çatdırıldıqca ölkəmiz haqqında daha dolğun və obyektiv
təsəvvür formalaşır.
Vüqar Həsənli
YAP Şahbuz rayon təşkilatının məsləhətçisi