Bir günə sığmayan təşəkkür!

Bakı:

18 °C

88 %

1 m/s

Əlaqə

AZ RU EN

Ana səhifə / Sosial / Bir günə sığmayan təşəkkür!

Bir günə sığmayan təşəkkür!

05.10.2026 [16:29]

Müəllimlik bəşəri və uca peşələrdən biridir...

Dünyada gözəl, nəcib peşələr çoxdur. Ancaq elə bir peşə var ki, onun əməyi bütün sahələrin təməlində dayanır – bu, müəllimlikdir. Müəllim sadəcə öyrədən deyil. Bu peşə sahibləri insanın düşüncəsinə yol açan, qəlbində elmə və biliyə sevgi oyadan, gələcəyə inam yaradan şəxslərdir. Bəzən bir müəllimin söylədiyi adi bir cümlə şagirdin yaddaşında illərlə yaşayır, verdiyi tövsiyə isə bütöv bir həyat yoluna istiqamət verir. Bu mənada müəllimlik yalnız peşə deyil, insan yetişdirmək missiyasıdır.

Məhz buna görə müəllim anlayışı bəşəri və uca məna daşıyır. Dünyanın hansı ölkəsində, hansı məktəbində olmasından asılı olmayaraq, müəllimin əsas missiyası dəyişmir: bilik vermək, şəxsiyyət formalaşdırmaq və gələcəyi daha yaxşı quracaq nəsil yetişdirmək.

Oktyabrın 5-i Beynəlxalq Müəllimlər Günüdür. Bu gün UNESCO-nun qərarı ilə 1966-cı ildən qeyd edilir. Lakin müəllim əməyini sadəcə bir günlə məhdudlaşdırmaq mümkün deyil.

Müəllim də zamanla dəyişir...

Müasir dövrdə müəllimlik əvvəlki dövrlərlə müqayisədə daha fərqli məsuliyyət tələb edir. Texnologiyanın sürətli inkişafı, informasiyanın əlçatanlığı və yeni öyrənmə imkanları müəllimin rolunu da dəyişir. Artıq şagirdlər istənilən məlumatı saniyələr ərzində əldə edə bilər. Buna görə müasir müəllimin əsas vəzifələrindən biri sadəcə məlumat vermək deyil, məlumatı düzgün seçməyi, təhlil etməyi və ondan doğru nəticə çıxarmağı öyrətməkdir.

Təbii ki, texnologiya müəllimin yerini tutmur, əksinə, onların qarşısında yeni imkanlar açır. Ən müasir texnologiyanın belə edə bilmədiyi bir şey var: şagirdin hissini duymaq, onun narahatlığını görmək, potensialına inanmaq və ona “sən bacararsan” demək. Bu səbəbdən müəllimə verilən dəyər yalnız maaş, mükafat və ya fəxri adlarla ölçülmür. Əsl dəyər cəmiyyətin müəllim əməyinə münasibətində, müəllimin nüfuzunda və onun yetişdirdiyi nəslin davranışında özünü göstərir.

Müəllimlərə dövlət qayğısı

Ölkəmizdə müəllimlər günü 1993-cü ildən qeyd edilməyə başlanıb. Ulu Öndər hər zaman müəllim peşəsinə böyük dəyər verib. “Müəllim adı ən yüksək addır. Mən yer üzündə müəllimdən yüksək ad tanımıram” deyən Heydər Əliyev bu yanaşmadan çıxış edərək müəllimlərin sosial müdafiəsinin gücləndirilməsi ilə bağlı davamlı qərarlar qəbul edib. Heydər Əliyevin bir özəlliyi də ondan ibarət idi ki, hər yeni tədris ilinin ilk günündə məktəblərdə olur, müəllim və şagirdlərlə görüşür, onları dinləyir və öz müdrik tövsiyələrini verirdi. Azərbaycan müəllimlərinin XI qurultayında geniş məruzə ilə çıxış edən Ulu Öndər deyib: “Azərbaycan müəllimlərinin tam əksəriyyəti layiqli müəllimlərdir. Əgər bunlar belə olmasaydı, Azərbaycanın bugünkü elmi, iqtisadiyyatı, mədəniyyəti, yüksəlişi ola bilərdimi?”.

Ulu Öndərin siyasi kursunun uğurlu davamçısı, Prezident İlham Əliyev də milli təhsilin inkişafına, müəllimlərin sosial vəziyyətinin yaxşılaşmasına həmişə xüsusi qayğı ilə yanaşıb. Məhz bu qayğının nəticəsidir ki, Azərbaycanda müəllimin nüfuzu ilbəil artır, güzəranı getdikcə yaxşılaşır. Hələ 2004-cü ildə Prezident “2005-2008-ci illər üçün ümumtəhsil məktəbləri şəbəkəsində pedaqoji kadr təminatı üzrə Dövlət Proqramı”nın qəbul edilməsi ilə bağlı xüsusi sərəncam imzalayıb. Bu gün Elm və Təhsil Nazirliyi müəllimlərin seçilməsi və işlə təmin edilməsi sahəsində dünyada sınaqdan keçirilmiş mexanizmlərin tətbiqi istiqamətində bir sıra əhəmiyyətli addımlar atır.

Son illər təhsilin inkişafı ilə bağlı həyata keçirilən kompleks tədbirlər, Prezidentin bu amili dövlət siyasətinin mühüm prinsipləri sırasına daxil etməsi, təhsil işçilərinə hərtərəfli qayğı dövlətin gələcəyini daha etibarlı və inamlı görmək əzmindən xəbər verir. Zəngin təbii sərvətləri ilə dünyanın diqqətində olan Azərbaycan bu sərvətlərdən səmərəli istifadə ilə insan kapitalının daha da inkişaf etdirilməsini başlıca istiqamət seçib. Son illərdə ölkəmizdə heç bir dövrdə olmadığı qədər yeni məktəblər tikilib, əlavə korpuslar inşa olunub. İndi Azərbaycanda elə təhsil ocaqları var ki, dünyanın ən inkişaf etmiş ölkələrindəki məktəblərdən fərqlənmir, hətta onları üstələyir. Sevindirici hal bir də odur ki, bu proses paytaxtla yanaşı, bütün bölgələri də əhatə edir.

Azərbaycanın Birinci vitse-prezidenti Mehriban Əliyevanın rəhbərliyi ilə Heydər Əliyev Fondunun dövlətin bu fəaliyyət proqramına verdiyi dəstək isə öz mükəmməlliyi ilə seçilir. Fond ölkədə məktəb tikintisində yaxından iştirakla yanaşı, həmin təhsil müəssisələrinin əyani vəsaitlər, şagirdlərin məktəb ləvazimatı ilə təminatında da mühüm rol oynayır. Yeni, müasir məktəblər, yeni təhsil kompleksləri şagird kontingentinin təhsil şəraitini tamamilə dəyişir, tədrisin səviyyəsini yüksəldir. Bütün bu tədbirlər İlham Əliyevin “Uşaqlar yaxşı məktəblərdə oxumalı, müəllimlər də yaxşı məktəblərdə işləməlidirlər” fikrini reallığa çevirir.

Müəllimə hörmət gələcəyə hörmətdir

Beynəlxalq Müəllimlər Günü əslində yalnız müəllimləri təbrik etmək üçün təqvimdə qeyd olunan tarix deyil. Bu gün bizə daha böyük bir həqiqəti xatırladır: gələcəyin qurulması məktəbdən, məktəbin gələcəyi isə müəllimdən başlayır. Bu baxımdan müəllimə hörmət etmək elmə, biliyə, zəhmətə və gələcəyə hörmət etməkdir. Çünki bu gün bir uşağın əlindən tutan müəllim sabah bütöv bir nəslin düşüncəsinə təsir edə bilər. Elə buna görə də müəllim haqqında deyilən ən gözəl sözlərin heç biri onun əməyini tam ifadə etməyə kifayət etmir.

Öyrədən, düşündürən, ruhlandıran və gələcək nəsli yetişdirən fədakar müəllimləri təbrik edirik. Gününüz mübarək!

Yeganə BAYRAMOVA

Paylaş:

Baxılıb: 71 dəfə