Azərbaycan ilə Laos arasında əlaqələr dostluq və qarşılıqlı hörmətə əsaslanır

Bakı:

24 °C

78 %

7 m/s

Əlaqə

AZ RU EN

Ana səhifə / Arxiv / Azərbaycan ilə Laos arasında əlaqələr dostluq və qarşılıqlı hörmətə əsaslanır

Azərbaycan ilə Laos arasında əlaqələr dostluq və qarşılıqlı hörmətə əsaslanır

15.10.2026 [16:31]

Oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri müasir Azərbaycan xarici siyasətinin dinamikliyini və coğrafi əhatəliliyini nümayiş etdirən mühüm tarixi hadisələrdən biri kimi yadda qaldı. Səfər çərçivəsində keçirilən yüksək səviyyəli görüşlərin ardınca Prezident İlham Əliyevin mətbuata verdiyi bəyanat təkcə iki ölkə arasındakı ikitərəfli münasibətlərin cari vəziyyətini deyil, həm də gələcək strateji tərəfdaşlıq platformasının əsas prioritetlərini müəyyən etdi. Prezident İlham Əliyev öz bəyanatında Azərbaycan ilə Laos arasında illər ərzində formalaşmış dostluq və qarşılıqlı hörmətə əsaslanan əlaqələrin vacibliyini xüsusi vurğuladı. İki dövlət arasındakı coğrafi məsafəyə baxmayaraq, beynəlxalq təşkilatlar çərçivəsində, xüsusilə Qoşulmama Hərəkatı və BMT platformalarında nümayiş etdirilən həmrəylik münasibətlərin möhkəm təməlini təşkil edir. Azərbaycanın Qoşulmama Hərəkatına uğurlu sədrliyi dövründə suverenlik, ərazi bütövlüyü və beynəlxalq hüququn üstünlüyü prinsiplərini müdafiə etməsi Laos tərəfindən hər zaman yüksək qiymətləndirilib. Dövlət başçısı mətbuat bəyanatında bu siyasi dəstəyin və beynəlxalq arenada vahid mövqedən çıxış etmək ənənəsinin bundan sonra da davam etdiriləcəyini bildirdi.

Görüşün və mətbuat bəyanatının ən əsas istiqamətlərindən biri iqtisadi əməkdaşlığın canlandırılması məsələsi oldu. Hazırkı ticarət dövriyyəsinin mövcud potensiala cavab vermədiyini qeyd edən dövlət başçıları, iqtisadi münasibətləri keyfiyyətcə yeni mərhələyə qaldırmaq üçün konkret addımların atılmasının vacibliyini vurğuladılar. İki ölkə arasında mal mübadiləsinin genişləndirilməsi, kənd təsərrüfatı və sənaye məhsullarının qarşılıqlı bazarlara çıxarılması, eyni zamanda iqtisadi və ticarət əlaqələrini koordinasiya edəcək işçi qruplarının və komissiya mexanizmlərinin fəallaşdırılmas bu baxımdan mühüm əhəmiyyət daşıyır. Qeyd etmək lazımdır ki, Azərbaycan və Laos sahibkarları arasında birbaşa əlaqələrin qurulması, birgə biznes forumlarının təşkili, Azərbaycanın Asiya və Avropa arasında mühüm nəqliyyat qovşağına çevrilməsi Laos kimi dənizə çıxışı olmayan, lakin Cənub-Şərqi Asiyada tranzit qovşağına çevrilməyə çalışan bir ölkə üçün böyük maraq kəsb edir. Prezident İlham Əliyev Azərbaycanın müasir logistik infrastruktura malik olduğunu bildirərək, bu imkanlardan Asiya tərəfdaşlarının yararlanmasının əhəmiyyətini qeyd edib. Laosun Cənub-Şərqi Asiya Dövlətləri Assosiasiyasındakı rolu nəzərə alınaraq, Azərbaycanın bu regionla iqtisadi inteqrasiyasında Laosun körpü rolu oynaya biləcəyi diqqətə çatdırılıb.

Azərbaycan ilə Laos arasında münasibətlərin tarixi köklərinə nəzər salındıqda, humanitar və təhsil sahəsindəki təcrübə xüsusi yer tutur. Sovet dönəmində və müstəqillik illərində yüzlərlə Laos tələbəsi Azərbaycanın ali təhsil müəssisələrində müxtəlif ixtisaslar üzrə təhsil almışdır. Azərbaycanın Qoşulmama Hərəkatı və digər çərçivələrdə Laoslu tələbələr üçün təqaüd proqramlarını davam etdirməsi, energetika, mühəndislik və İKT sahələrində təcrübə mübadiləsi, iki xalq arasında qarşılıqlı tanınmanı artırmaq üçün mədəniyyət günlərinin və turizm təşviqatının təşkili əməkdaşlıq əlaqələrimizin inkişafında əhəmiyyətli rol oyanyıb.

Bir sözlə, Prezident İlham Əliyevin Laos Prezidenti Thonqlun Sisulitin səfəri zamanı verdiyi mətbuat bəyanatı Azərbaycanın xarici siyasətində vektorların şaxələndirilməsi strateqiyasının uğurlu davamıdır. Azərbaycan yalnız Avropa və yaxın qonşuluq zonasında deyil, həm də Cənub-Şərqi Asiyanın sürətlə inkişaf edən ölkələri ilə çoxşaxəli tərəfdaşlıq qurmaq əzmindədir. Bu səfər və bəyanatda səsləndirilən fikir və təşəbbüslər Bakı və Laos arasında siyasi dialoqun dərinləşməsinə, iqtisadi platformada yeni imkanların yaranmasına və iki ölkənin beynəlxalq arenada bir-birini daha qətiyyətlə dəstəkləməsinə təkan verəcəkdir.

Vüsar İsmayılov

Yeni Azərbaycan Partiyası Binəqədi rayon təşkilatının sədri

Paylaş:

Baxılıb: 83 dəfə

Xəbər lenti

Hamısına bax