Azərbaycanda dinlərarası münasibətlər yüksək səviyyədədir

Bakı:

25 °C

64 %

7 m/s

Əlaqə

AZ RU EN

Ana səhifə / Daxili siyasət / Azərbaycanda dinlərarası münasibətlər yüksək səviyyədədir

Azərbaycanda dinlərarası münasibətlər yüksək səviyyədədir

05.09.2014 [09:45]

Sentyabrın 4-də Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı Sabunçu rayonunda dini icmaların nümayəndələri ilə görüş keçirib.
AzərTAc xəbər verir ki, görüşdən əvvəl Mübariz Qurbanlı və Sabunçu rayon İcra Hakimiyyətinin başçısı Adil Vəliyev Azərbaycan xalqının Ümummilli lideri Heydər Əliyevin Sabunçu rayon İcra Hakimiyyətinin binasındakı büstünü ziyarət ediblər.
Tədbiri giriş sözü ilə açan Sabunçu rayon İcra Hakimiyyətinin başçısı Adil Vəliyev belə görüşlərin keçirilməsinin əhəmiyyətindən danışıb. O, bildirib ki, din xadimlərinin cəmiyyətdə çox böyük bir rolu vardır və bu görüş dini icmaların gələcək fəaliyyəti baxımından böyük önəm kəsb edir. İcra Hakimiyyətinin başçısı qeyd edib ki, ölkəmizdə dinin dövlətdən ayrı olmasına baxmayaraq din hər zaman dövlətə dayağı kimi çıxış edib.
Rayon İcra Hakimiyyətinin başçısı Ulu öndər Heydər Əliyevin ikinci dəfə hakimiyyətə qayıdışından sonra respublikamızda dinə münasibətin tamamilə dəyişdiyini, ölkədə milli-mənəvi dəyərlərimizə, dinimizə hər zaman hörmət və qayğı ilə yanaşıldığını diqqətə çatdırıb. O, bu siyasətin hazırda Prezident İlham Əliyev tərəfindən uğurla davam etdirildiyini deyib.
DQİDK-nın Bakı şəhəri üzrə şöbə müdiri Anar Kazımov Sabunçu rayonundakı dini durum, dini icmalar, eləcə də məscid və ziyarətgahlarla bağlı məlumat verib. O, bildirib ki, əhalinin dini baxışlarının sağlam müstəvidə formalaşdırılması, gənclərin radikal fikirli insanların təsiri altına düşməməsi və din xadimlərimizin bu istiqamətdə məlumatlandırılmasının təmin edilməsi üçün maarifləndirici tədbirlərin keçirilməsinə ehtiyac vardır. Bunu nəzərə alaraq müxtəlif rayonlarda dini icmaların nümayəndələri ilə görüşlər keçirilir və fikir mübadiləsi aparılır.
Görüşdə Dini Qurumlarla İş üzrə Dövlət Komitəsinin sədri Mübariz Qurbanlı çıxış edərək bildirib ki, milli adət-ənənələrimizin, dinimizin yad ünsürlərdən qorunması istiqamətində fəaliyyət daha da gücləndirilməlidir. O, qeyd edib ki, Azərbaycanda dövlət-din münasibətləri qanun vasitəsilə nizamlanır. Konstitusiyamızda dini azadlıqla bağlı müddəalar heç də dünyanın ən inkişaf etmiş ölkələrindəkindən geri qalmır. Bizim milli-mənəvi dəyərlərimiz arasında İslam dini xüsusi əhəmiyyətə malikdir və bu mütərəqqi dinin düzgün təbliği prioritet məsələlərdəndir.
Mübariz Qurbanlı vurğulayıb ki, bu gün ölkəmizdə dinlərarası münasibətlər yüksək səviyyədədir. Prezident İlham Əliyevin qayğısı ilə ölkədə yeni məscidlər tikilir, dini abidələrimiz bərpa olunur. Bu isə dövlətin dinə olan münasibətinin bariz nümunəsidir.
Komitə sədri son vaxtlar dünyada qeyri-ənənəvi cərəyanların din adından istifadə etməklə öz ideologiyalarını yaymağa çalışmalarından və siyasi məqsədləri üçün istifadə etməyə çalışmalarından söz açaraq bunun qarşısının alınması məqsədilə dini icmaların fəaliyyətinin daha da gücləndirilməsinin vacibliyinə toxunub.
DQİDK-nın sədri ölkədə dini təhsil məsələsinə toxunaraq bunun “Dini etiqad azadlığı haqqında” qanunla tənzimləndiyini qeyd edib. O, deyib ki, qanunda da vurğulandığı kimi, dini təhsil verən insanların mütləq ölkədə dini təhsil almış və səlahiyyət sahibləri olması vacibdir.
Sonda dini icmaların nümayəndələri ilə fikir mübadiləsi aparılıb.

Paylaş:

Baxılıb: 1705 dəfə