İsveçdə ictimai nəqliyyatda gediş haqqı müvəqqəti olaraq iki dəfə azaldıla bilər

Bakı:

28 °C

47 %

11 m/s

Əlaqə

AZ RU EN

Ana səhifə / Dünya / İsveçdə ictimai nəqliyyatda gediş haqqı müvəqqəti olaraq iki dəfə azaldıla bilər

İsveçdə ictimai nəqliyyatda gediş haqqı müvəqqəti olaraq iki dəfə azaldıla bilər

27.05.2026 [17:31]

İsveç hökuməti iyulun 1-dən etibarən ictimai nəqliyyatda aylıq gediş haqqı biletlərinin qiymətini müvəqqəti olaraq təxminən 50 faiz azaltmağı planlaşdırır.

AZƏRTAC xəbər verir ki, bu tədbirin həyata keçirilməsi üçün təxminən 7 milyard kron (730–740 milyon dollar) ayrılması nəzərdə tutulur. Proqramın isə ilin sonunadək qüvvədə qalacağı bildirilir.

Bu təşəbbüs enerji böhranı və qiymət artımı fonunda əhaliyə dəstək məqsədilə hazırlanmış genişmiqyaslı tədbirlər paketinin bir hissəsinə çevrilib. Bundan əvvəl hakimiyyət benzin və dizelə tətbiq olunan vergilərin azaldılması, daxili aviasiyanın dəstəklənməsi və ərzaq məhsullarına əlavə dəyər vergisinin müvəqqəti endirilməsi üçün artıq on milyardlarla kron vəsait ayırıb.

İsveç mediasının məlumatına görə, aylıq gediş biletlərinin ucuzlaşması nəticəsində yaranacaq gəlir itkisinə görə regionlara kompensasiya veriləcək. Bununla belə, nəqliyyat əlaqələrinin genişləndirilməsi və ya artan yanacaq xərclərinin qarşılanması üçün əlavə vəsait ayrılması nəzərdə tutulmayıb ki, bu da regional hakimiyyət orqanlarında narahatlıq yaradır.

Müxalifət bu təklifi tənqid edib.

Sosial-Demokrat Partiyasının nümayəndələri bildiriblər ki, hökumət çıxılmaz vəziyyətdə hərəkət edir, hazırkı addım isə seçkilər ərəfəsində reytinqini sürətlə artırmaq cəhdi təsiri bağışlayır.

“Hökumətin etibarı sıfır səviyyəsindədir. Onlar ictimai nəqliyyatın yaxşılaşdırılması və daha ucuz olması ilə bağlı bütün təkliflərimizin əleyhinə fəal şəkildə səs veriblər. İndi isə ictimai narazılıq qarşısında çıxılmaz vəziyyətdə seçkilər ərəfəsində qiymətləri müvəqqəti azaltmaq istəyirlər. Bu hökumətin iqtisadi siyasətini ciddi qəbul etmək çətindir”, – deyə Sosial-Demokrat Partiyasının katibi Tobias Baudin bildirib.

Politoloq Henrik Ekeqren Oskarsson hesab edir ki, bu təşəbbüs gözlənilən siyasi effekti verməyə bilər. Onun fikrincə, İsveç seçiciləri qısamüddətli iqtisadi üstünlüklərə daha az önəm verir və daha çox ideoloji baxışlarına əsaslanaraq səs verirlər. Ekspert qeyd edib ki, endirimin müvəqqəti xarakter daşıması onu seçkiqabağı populizmə bənzədir. O xəbərdarlıq edib ki, bu cür addımlar, xüsusilə iri dövlət xərcləri və səhiyyə də daxil olmaqla digər sahələrdə davam edən problemlər fonunda seçicilərin bir hissəsində əks reaksiya da doğura bilər.

Paylaş:

Baxılıb: 402 dəfə