Ermənistanın xarici borcları 4 milyard dolları ötüb

Bakı:

0 °C

86 %

2 m/s

Əlaqə

AZ RU EN

Ana səhifə / Dünya / Ermənistanın xarici borcları 4 milyard dolları ötüb

Ermənistanın xarici borcları 4 milyard dolları ötüb

29.09.2015 [10:07]

Serj Sarkisyan diaspordan sədəqə dilənmək üçün yenidən okeanın o tayına üz tutdu
Hazırda işğalçı Ermənistanda bütün sahələrdə geriləmənin baş verdiyi kimsəyə sirr deyil. Bu geriləmə Ermənistanın xarici borclarının kritik həddə çatmasında da özünü göstərir. Belə ki, sentyabrın 1-nə olan məlumata görə, Ermənistanın beynəlxalq maliyyə təşkilatları və kreditorlar qarşısındakı borc öhdəlikləri ilin əvvəlindən daha 283 milyon dollar artaraq, 4 milyard 68 milyon dollar təşkil edir. Bu haqda yerli “Ayoç Aşxar” qəzeti məlumat yayıb. Mənbənin iddiasına görə, bu rəqəm hələ Ermənistanın bütün xarici borclarını tam şəkildə əks etdirmir. Belə ki, cari ildə Ermənistan bir sıra kredit müqavilələri imzalayıb.
“Cari ildə Ermənistan Rusiyadan hərbi texnika və silah-sursat alınmasına dair 200 milyon dollarlıq müqavilə imzalayıb. Bu kreditin icrasına hələ başlanılmasa da, nəticə etibarı ilə bunu nə vaxtsa biz ödəyəcəyik. Bundan əlavə, Ermənistan AES-in modernləşdirilməsinə dair 270 milyon dollarlıq yeni bir kredit sazişi də imzalayıb”, - deyə “Ayoç Aşxar” qəzeti yazır.
Digər tərəfdən, yerli “www.lragir.am” portalı xəbər verir ki, Ermənistanın da daxil olduğu Avrasiya İqtisadi İttifaqına (Aİİ) üzv ölkələrin hamısı 2015-ci ili mənfi iqtisadi göstəricilərlə başa vuracaq. Qurumun İqtisadi Komissiyasının hesabatlarına istinad edən saytın məlumatına görə, iqtisadi geriləmə Ermənistan üçün təqribən 1 faiz təşkil edəcək.
Yeri gəlmişkən, Ermənistanın cari ili iqtisadi geriləmə ilə başa vuracağı haqda proqnozlar Dünya Bankının bu yaxınlarda açıqladığı hesabatlarda da öz əksini tapıb. Lakin Ermənistanın baş naziri Ovik Abramyan ciddi-cəhdlə bu proqnozları inkar edərək, guya 2015-ci ildə ölkə iqtisadiyyatında 4,5 faiz artım olacağını iddia etməkdədir.
Hadisələrin inkişafı isə erməni baş nazirinin sözlərinin sabun köpüyündən başqa bir şey olmadığından xəbər verir. Belə ki, elektrik enerjisi tariflərinin artırılması məsələsi ortaya çıxdıqdan sonra Ermənistanın elektrik şəbəkəsinə sahib olan Rusiyanın “İnter RAO” şirkəti müəssisənin səhmlərini satmaq qərarına gəlib. Buna səbəb isə rentabelliyin həddən artıq aşağı olmasıdır. Saytın yazdığına görə ruslar elektrik şəbəkəsini Kiprdə ofşor şirkət kimi qeydiyyatdan keçmiş “Liomand hooldinq”ə satmağa hazırlaşırlar.
Doğrudur, Ermənistan rəhbərliyi hələlik bu barədə heç bir açıqlama vermək istəmir və elektrik şəbəkəsinin yeni sahibinin kimliyini gizlətməyə çalışır. Lakin buna baxmayaraq, rus tərəfi mətbuata artıq bütün kartlarını açıb və məsələdə gizli heç nə qalmayıb. Saytın yazdığına görə, təbii olaraq, şəbəkənin yeni sahibinin əhaliyə satılan elektrik enerjisi tariflərinə yenidən baxacağı heç də istisna edilmir. Bu isə tezliklə Ermənistanda kütləvi etiraz aksiyalarının yeni dalğasının başlanacağından xəbər verir.
Bu arada, sayt diqqəti daha bir maraqlı məqama yönəldib. Mənbə bildirir ki, Serj Sarkisyanın sentyabrın 27-də okeanın o tayına işgüzar səfər etməsinin əsas səbəbi heç də onun BMT Baş Assambleyasının 70-ci sessiyasında iştirak etməsi deyil. Belə ki, Nyu-Yorka səfəri çərçivəsində Serj Sarkisyan bir sıra digər görüşlərdə iştirak etməyi də planlaşdırır. Ən önəmlisi isə odur ki, Serj Sarkisyan ABŞ-dakı erməni diasporunun rəhbərləri ilə görüşərək “vəziyyətdən çıxmaq üçün” onlardan yenə də sədəqə dilənəcək. Çünki regionda apardığı işğalçılıq siyasəti nəticəsində Ermənistanda iqtisadiyyatın çökməsi, faktiki işçi qüvvəsini təşkil edən əhalinin böyük əksəriyyətinin bir qarın çörək dalınca başqa ölkələrə köç etməsi artıq kimsəyə sirr deyil. Rəsmi məlumatlara görə, hər il Ermənistanı 10 minlərlə miqrant tərk edir. Digər tərəfdən isə ölkə iqtisadiyyatının güclü şəkildə bağlı olduğu Rusiyada rublun dəyərdən düşməsi Ermənistanın milli valyutası olan dramın alıcılıq qabiliyyətini də heçə endirməkdədir. Ermənistan Mərkəzi Bankının son açıqlamasına görə, hazırda 1 ABŞ dolları təqribən 500 drama bərabərdir. Ərzaq mallarını əsasən Rusiyadan idxal edən Ermənistan üçün milli valyutanın belə kəskin dəyərdən düşməsinin isə ölkə üçün daha da ağır nəticələrə gətirib çıxaracağı istisna edilmir. Saytın yazdığına görə, həftəsonu yenidən Yerevan küçələrinə axışacaq ermənilər Sarkisyan rejimindən ölkəni və xalqı xilas etməyi tələb edəcəklər. Qarşıdakı ümumrespublika etiraz mitinqinin hansı nəticələrə gətirib çıxaracağını indidən söyləmək çətin olsa da, görünən odur ki, Serj Sarkisyanın ölkədə yürütdüyü siyasət Ermənistanı bir dövlət kimi məhvə aparır. Və əgər Sarkisyan öz işğalçılıq siyasətini davam etdirsə, qonşu dövlətlərlə mehriban münasibətlər yaradılmasına cəhdlər göstərməsə, gec-tez bu dövlət məhv olmaq təhlükəsi ilə üz-üzə dayanacaq.
Səlim LOĞMANOĞLU

Paylaş:

Baxılıb: 1249 dəfə