Martin Şults deputat həmkarları tərəfindən israfçılıqda ittiham olunur

Bakı:

11°C

71%

3m/s

Əlaqə

AZ RU EN

Ana səhifə / Dünya / Martin Şults deputat həmkarları tərəfindən israfçılıqda ittiham olunur

Martin Şults deputat həmkarları tərəfindən israfçılıqda ittiham olunur

08.12.2015 [09:43]

Avropa Parlamenti prezidentinin iki limuzini, iki sürücüsü və 33 assistenti var
Hər zaman ölkəmizə qarşı aparılan şər-böhtan kampaniyasının önündə gedən, dövlətimizdəki sabitliyə, insan hüquq və azadlıqlarının qorunması prinsipinə qərəzli şəkildə yanaşan, anti-azərbaycançı fəaliyyəti ilə ölkəmizə qarşı olan maraqlı dairələrin, ən əsası, ermənilərin sevimlisinə çevrilməyi “bacaran” Avropa Parlamentinin prezidenti Martin Şults öz həmkarlarının hədəfinə tuş gəlib. Ümumiyyətlə, bir siyasətçi kimi ziddiyyətli imicə malik M.Şults bu dəfə olduqca ciddi ittihamlarla üz-üzədir. Belə ki, o, Avropa Parlamentinin üzvləri tərəfindən israfçılıqda ittiham olunur.
Lent.az-ın “dailymail.co.uk” saytına istinadən verdiyi xəbərə görə, Martin Şultsun iki limuzini, iki sürücüsü və 33 assistenti var. Onun həmçinin qonaqları qarşılamaq və digər xidmətlər üçün nəzərdə tutulmuş iki qulluqçusu var. “Bu, parlamentin xərclərinin azaldılması xətti və fiskal siyasətlə bağlı mənfi nümunə yaradır”, - deyə parlamentarilər bildiriblər.
Parlament büdcəsini illik nəzərdən keçirən büdcə nəzarəti komitəsinin məruzəsində isə “Avropa Parlamenti prezidentinin ofisində bu qədər adamın çalışmasının şübhəli olduğu” qeyd edilib. Vurğulanır ki, 21 ildir Avropa Parlamentinin üzvü olan Martin Şults illik 227 min avro məvacib və güzəştlər alır.
Göründüyü kimi, Azərbaycan dövlətinə qarşı aparılan böhtan kampaniyasında fəal iştirak edən, ölkəmizdəki şəffaflığa, ədalətli mühitə şübhə ilə yanaşan Şultsun “fəaliyyəti” elə öz “kolleqa”ları tərəfindən ifşa edilir. Özünə komfort həyat düzəldən, dünyaya “demokratiya” dərsi keçməyə cəhd göstərən M.Şults görəsən indi nə deyəcək?
Xatırladaq ki, ölkəmizin qazandığı hər bir nailiyyətə kölgə salmağa, birmənalı şəkildə ermənilərin apardığı işğal siyasətini ifşa edən faktları dünyaya nümayiş etdirməmizə mane olmağa hesablanan anti-azərbaycançı fəaliyyəti ilə yadda qalan Matin Şults hətta Azərbaycanda mədəniyyət, idman yönümlü beynəlxalq tədbirlərin keçirilməsindən belə narahatlıq duyaraq min bir yolla buna qarşı kampaniyalar həyata keçirməyə cəhdlər göstərirdi. Diletant fəaliyyəti ilə seçilən bu şəxs ölkəmizdə keçirilən birinci Avropa Oyunları ilə bağlı təşkil edilən müzakirələrdə də qərəzini açıq şəkildə büruzə vermişdi. Və yuxarıda bəhs edilən xəbər onun hansı məqsədlərə xidmət etdiyinə işıq salır, daha doğrusu, Azərbaycana qarşı aparılan çirkin kampaniyanın iştirakçısı olan bu şəxsin nə dərəcədə “şəffaf”, “demokrat” olması artıq faktlar əsasında “üzə çıxır”.
Qeyd edək ki, Şultsun hələ yeniyetməlikdə içkiyə qurşandığı haqqında Qərb mətbuatında dövri informasiyalar yer alır. Hətta onun alkoqola aludəçiliyə görə işdən qovulması faktı da səsləndirilib. Avantürist fikirlər söyləmək, müxtəlif ölkələrin rəhbərləri haqqında sağlam məntiqə sığmayan bəyanatlar vermək kimi “xüsusiyyətlər”i özündə cəmləşdirmiş Şults son nəticədə təmsil etdiyi qurumu pis vəziyyətdə qoyur, onun imicinə zərbə vurur.
Maraqlıdır ki, öz prezidentini “sudan quru çıxarmağa” çalışan Şultsun mətbuat katiblərindən biri guya Avropa Parlamenti prezidentinin gərgin iş qrafiki olduğu üçün iki sürücüyə ehtiyacı olduğunu vurğulayıb. Görəsən, digər ittihamlara cavab vermək üçün Şult hansı bəhanələrə əl atmaq və ya hansı şəxslərdən kömək ummaq niyyətindədir?
Necə deyərlər, “öz gözündə tiri görməyən” cənab Şults yaman yerdə haqlanıb. Belə görünür ki, onun gözündəki “tirlər”i artıq öz həmkarları ona xatırlatmaq məcburiyyətində qalıblar...
Pərviz SADAYOĞLU

Paylaş:

Baxılıb: 1327 dəfə