Ermənistanda etiraz aksiyaları davam edir

Bakı:

2 °C

87 %

4 m/s

Əlaqə

AZ RU EN

Ana səhifə / Dünya / Ermənistanda etiraz aksiyaları davam edir

Ermənistanda etiraz aksiyaları davam edir

13.03.2018 [09:54]

Hakimiyyətdə olan hərbi xuntanın həyata keçirdiyi siyasət nəticəsində iqtidarla müxalifət arasında ziddiyyətlər daha da artıb
İşğalçı Ermənistanın düçar olduğu ağır vəziyyətin kökündə hakimiyyətdə olan hərbi xuntanın istinad etdiyi daxili və xarici siyasət kursu durur. Bir çox ekspertlər Ermənistan daxilindəki dərin kataklizmləri işğalçı ölkənin iqtisadi tənəzzülü ilə əlaqələndirirlər. Dərin iqtisadi böhranın səbəbi qismində isə bu ölkənin həyata keçirdiyi təcavüzkar, işğalçı xarici siyasət kursu göstərilir. Belə ki, İrəvanın reallaşdırdığı aqressiv, təcavüzkar xarici siyasət bu ölkəni regional miqyasda təcrid durumuna düşürüb. Bunun fonunda isə heç bir regional layihədə təmsil olunmayan Ermənistan daxili və xarici siyasət nöqteyi-nəzərindən, sözün əsl mənasında, fiaskoya uğrayıb.
Serj Sarkisyana qarşı etirazlar güclənir: proqnozlar pessimistdir
İşğalçı ölkədə iqtisadi tənəzzül siyasi xaosu şərtləndirib. Vətəndaşlarla hakimiyyət arasındakı uçurum özünü daha çox ictimai-siyasi gərginlikdə, xüsusilə də etiraz aksiyalarında göstərir. Eyni zamanda, Sarkisyan hakimiyyətinin uzurpasiya siyasəti hakimiyyətlə müxalifət arasında ziddiyyətlərin artmasını şərtləndirib. Müxalif qüvvələr, eləcə də ictimai və siyasi fəallar hakimiyyətə qarşı müxtəlif formalarda öz etirazlarını bildirməkdədirlər. Yeri gəlmişkən, “Ermənistan naminə” cəbhəsinin İrəvanda keçirdiyi mitinqin iştirakçıları Serj Sarkisyanı hakimiyyətdən əl çəkməyə çağırıblar. “Biz heç bir halda Serj Sarkisyanın baş nazir postuna gətirilməsinə imkan verməyəcəyik. Bu ölkə onun rəhbərlik etdiyi cinayətkar qruplaşmadan kifayət qədər zərbə alıb. Bunun qarşısını almalıyıq”, - deyə vurğulayan “İrs” partiyasının sədri Armen Martirosyan bildirib ki, aksiya Serj Sarkisyanın baş nazir olmaq iddiasına qarşı yönəlib. Bildirilib ki, əgər aprelin 9-dan sonra “Respublika” partiyası Serj Sarkisyanın namizədliyini irəli sürərsə, bu, ölkədə ciddi etiraz dalğası yaradacaq. “Çıxış” blokunun parlament fraksiyasının üzvü Ararat Mirzoyan və hüquq müdafiəçisi Artur Sakunts isə hökuməti sərt tənqid ediblər. Bildirilib ki, Ermənistanda pul ehtiyatları tükənib, xarici borclar artıb, ümumidaxili məhsul istehsalı dəfələrlə aşağı düşüb, işsizlik isə pik həddədir.
Ermənistanı qarşıdakı dövrdə ciddi siyasi kataklizmlər gözləyir
Bütün bunlar Ermənistanın yeni siyasi kataklizmlərə sürükləndiyini göstərir. İşğalçı siyasətini davam etdirən bu ölkədə qarşıdakı dövrdə siyasi-iqtisadi böhranın dərinləşəcəyinə, xarici siyasətdə silsilə uğursuzluqların artacağına dair yekun qənaət ifadə etmək heç də çətin deyil. Bundan başqa, ölkəni beynəlxalq arenada qarşıdakı dövrdə digər ciddi problemlərin gözlədiyi proqnozlaşdırılır.
Digər tərəfdən, Ermənistanın hazırkı durumundan narazı olan vətəndaşların perspektivə dair heç bir ümidləri yoxdur. Siyasi ekspertlər əminliklə qeyd edirlər ki, Ermənistanı qarşıdakı dövrdə ciddi siyasi kataklizmlər gözləyir. Nəticə etibarilə, Ermənistanın timsalında aşkar olan reallıq budur ki, hazırkı şəraitdə bütün yollar işğalçı ölkəni iflasa aparır.
Nurlan QƏLƏNDƏRLİ

Paylaş:

Baxılıb: 1357 dəfə