ÜƏMT-nin departament direktoru ilə universitetlərin rektorları arasında görüş keçirilib

Bakı:

29 °C

61 %

12 m/s

Əlaqə

AZ RU EN

Ana səhifə / Elm / ÜƏMT-nin departament direktoru ilə universitetlərin rektorları arasında görüş keçirilib

ÜƏMT-nin departament direktoru ilə universitetlərin rektorları arasında görüş keçirilib

16.12.2024 [21:34]

Dekabrın 16-da Əqli Mülkiyyət Agentliyində ÜƏMT-nin Regional və milli inkişaf sektorunun Keçid və inkişaf etmiş dövlətlər departamentinin direktoru Habip Asan ilə ali təhsil müəssisəsinin rektorları arasında görüş keçirilib.

AZƏRTAC xəbər verir ki, görüşdə çıxış edən Əqli Mülkiyyət Agentliyinin İdarə Heyətinin sədri Kamran İmanov son illər Azərbaycanın ali təhsil müəssisələrinin innovasiyalar istiqamətində nailiyyətlər əldə etdiyini, eləcə də ölkəmizin təhsil sistemində aparılan islahatları qeyd edib.

Görüşdə ÜƏMT-nin departament direktoru təmsil etdiyi təşkilatın həyata keçirdiyi layihələrdən danışıb. O, Əqli Mülkiyyət Agentliyinin ali təhsil müəssisələri ilə əməkdaşlığını, həmçinin Azərbaycanda bəzi universitetlərin texnoloji transfer mərkəzlərinin olmasını yüksək qiymətləndirib. Departament direktoru son 20 ildə patent və dizayn sahələrinin geniş inkişaf etdiyini söyləyib, əqli mülkiyyətin gəlir gətirməsi imkanları ilə bağlı fikirlərini bölüşüb.

Beynəlxalq təşkilatın rəsmisi çıxışında ayrı-ayrı ölkələrin universitetlərinin tədris, tədqiqat, əqli mülkiyyət və innovasiya təcrübəsini diqqətə çatdırıb. Habip Asan, həmçinin Azərbaycanın 2030-cu ilədək Milli Prioritetlərini yüksək qiymətləndirib.

Daha sonra Kamran İmanov maraqlı elmi işlərin, patentlərin kommersiyalaşdırılmasının zəruriliyini qeyd edib, bu prosesdə kritik nöqtələrə nəzər salıb. Agentliyin rəhbəri bildirib ki, əqli mülkiyyətə öncədən sahiblik aydınlaşmalıdır. Əqli mülkiyyətin nəticəsinə görə düzgün bölünmə aparılmalıdır. Onun sözlərinə görə, adambaşına daha aşağı ÜDM-i olan ölkələr əqli mülkiyyət hüquqlarının daha zəif qorunmasına üstünlük verərək imitasiyalara yol açırlar. Lakin ÜDM-in adambaşına artması ilə keyfiyyətli, leqal məhsullara ehtiyac artır, istehsal stimullaşdırılır və bununla əqli mülkiyyətin qorunma səviyyəsinin artmasına səbəb olur. Deməli, birbaşa xarici investisiyalara ehtiyac olmadığı halda adambaşına ÜDM-in artımı əqli mülkiyyət hüquqlarının qorunması səviyyəsini artırır. Qeyd olunub ki, zəif iqtisadiyyatlı ölkələr üçün birbaşa xarici investisiyaları cəlb etmək məqsədilə əqli mülkiyyət hüquqlarını yüksək səviyyədə qorumağa başlayırlar. Onlar zənginləşən və ortasəviyyəli gəliri olan ölkələrə çatdıqdan sonra əqli mülkiyyətin qorunma rejimi zəifləyir və bununla idxal texnologiyaları daha geniş istifadə olunur. Lakin texnoloji həddə çatdıqdan sonra əqli mülkiyyət hüquqlarının qorunması yenidən güclənir.

Azərbaycan Dövlət İqtisad Universitetinin (UNEC) rektor professor Ədalət Muradov bu görüşün əhəmiyyətini qeyd edib. O, ilkin olaraq patentlərin satılmasının mümkünlüyü, hüquq sahiblərinin bu barədə maarifləndirilməsinin əhəmiyyətini söyləyib, həmçinin alimlərə dəstək göstərilməsinin vacibliyini bildirib.

Bakı Dövlət Universitetinin rektoru Elçin Babayev ölkədə əqli mülkiyyət sahəsində kadr hazırlığı ilə bağlı Agentliyin fəaliyyətini xüsusi vurğulayıb. Rektor, həmçinin universitetin innovasiyalar sahəsində həyata keçirdiyi tədbirləri qeyd edib. O, BDU tələbələrinin innovativ layihələrinin Türkiyədə “TEKNOFEST”də uğur qazandığını bildirib.

Görüş müzakirələrlə davan edib. ÜƏMT-nin rəsmisi universitet rektorlarının suallarını cavablandırıb.

Paylaş:

Baxılıb: 775 dəfə