Macarıstanda Azərbaycan Dili və Mədəniyyəti Mərkəzi açılıb

Bakı:

27 °C

41 %

7 m/s

Əlaqə

AZ RU EN

Ana səhifə / Elm / Macarıstanda Azərbaycan Dili və Mədəniyyəti Mərkəzi açılıb

Macarıstanda Azərbaycan Dili və Mədəniyyəti Mərkəzi açılıb

19.05.2025 [19:19]

Mayın 19-da Macarıstanın Elte Universitetində Azərbaycan Dili və Mədəniyyəti Mərkəzinin açılışı olub.

Bu barədə AZƏRTAC-a Azərbaycan Dillər Universitetindən (ADU) məlumat verilib. Açılış mərasimində qeyd olunub ki, Azərbaycan Dili və Mədəniyyəti Mərkəzi iki ölkə arasında elmi, mədəni, siyasi, təhsil sahələrində tərəfdaşlıq münasibətlərinə töhfə verəcək.

Elte Universitetinin rektoru Laszlo Borhy ADU ilə əlaqələrin inkişafında yeni açılan Mərkəzin xüsusi rola malik olacağını vurğulayıb. Bildirib ki, ADU-da fəaliyyət göstərən Macar Dili və Mədəniyyəti Mərkəzi ilə qarşılıqlı əlaqələrin qurulması fonunda yeni layihələr, müəllim-tələbə mübadiləsi proqramları həyata keçiriləcək.

ADU-nun beynəlxalq əlaqələr üzrə prorektoru Jalə Qəribova qeyd edib ki, Azərbaycan Dillər Universiteti beynəlxalq əlaqələrini daha da genişləndirir və bu istiqamətdə xaricdə açılan mərkəzlərin xüsusi yeri var: “Bu Mərkəzin açılışı əlamətdar hadisədir. Burada Azərbaycan mədəniyyətinin və dilinin öyrənilməsi, ciddi elmi-tədqiqat işlərinin aparılması ilə bağlı böyük perspektiv var”. O, Mərkəzin açılışında göstərdiyi böyük dəstəyə görə Elte Universitetinin Türk dilləri departamentinin müdiri professor Benedek Periyə təşəkkürünü bildirib.

Sosial məsələlər və ictimaiyyətlə əlaqələr üzrə prorektor, Milli Məclisin parlamentlərarası əlaqələr üzrə işçi qrupunun üzvü Tamam Cəfərova iki ölkə arasında əlaqələrin inkişafının perspektivlərindən söz açıb.

Görüşdə Azərbaycan ilə Macarıstan arasında dostluq, qarşılıqlı hörmət və sıx əməkdaşlığa əsaslanan strateji tərəfdaşlıq əlaqələrinin mövcudluğu, hər iki ölkənin siyasi, iqtisadi, təhsil və digər sahələrdə fəal əməkdaşlıq etdiyi diqqətə çatdırılıb: “Parlamentlərarası münasibətlər iki ölkə arasındakı inkişafa böyük töhfə verib. Yeni Mərkəzin açılması iki ölkə arasında olan sıx tərəfdaşlıq və dostluq münasibətlərinə öz müsbət təsirini göstərəcək”.

Azərbaycanın Macarıstandakı səfiri Tahir Tağızadə çıxışında qeyd edib ki, ADU ilə Elte Universitetinin tərəfdaşlığı iki ölkə arasında mövcud olan elmi, mədəni əlaqələrin inkişafına təkan verəcək. ADU-nun yüksək elmi potensialından danışan səfir deyib ki, bu təhsil ocağında multikultural ab-hava kifayət qədər münbitdir. Bu da təhsil müəssisəsində bir sıra xarici ölkələrin dil və mədəniyyət mərkəzlərinin fəaliyyəti üçün əlverişli imkanlar yaradır. ADU-nun rektoru akademik Kamal Abdullanın təşəbbüsü ilə xarici ölkə universitetlərində yaradılan Azərbaycan Dili və Mədəniyyəti mərkəzlərinin fəaliyyəti ölkələr arasında münasibətlərin inkişafına töhfə verir.

Tədbirdə ölkələr arasında elmi əməkdaşlıqla bağlı irəli sürülən dil və mədəniyyət mərkəzlərinin fəaliyyəti ideyasının orijinallığı xüsusi olaraq vurğulanıb.

Azərbaycanda təhsil almış ilk macar tələbə, professor Maria Kenessey Macarıstanda Azərbaycan Dili və Mədəniyyəti Mərkəzinin açılmasının son dərəcə sevindirici bir hadisə olduğunu söyləyib. Mərkəzin açılması münasibətilə təbriklərini çatdıran professor Maria Kenessey gənclərə təhsil həyatında uğurlar arzulayıb.

Paylaş:

Baxılıb: 588 dəfə