“ADA” Universitetində ikinci Azərbaycan-Fransa universitetlərarası forumu keçirilir

Bakı:

28 °C

49 %

0 m/s

Əlaqə

AZ RU EN

Ana səhifə / Elm / “ADA” Universitetində ikinci Azərbaycan-Fransa universitetlərarası forumu keçirilir

“ADA” Universitetində ikinci Azərbaycan-Fransa universitetlərarası forumu keçirilir

05.04.2014 [10:55]

Aprelin 4-də “ADA” Universitetinin, Fransanın Azərbaycandakı səfirliyinin və “Kampüs Frans” agentliyinin birgə təşkilatçılığı ilə ikinci Azərbaycan-Fransa universitetlərarası forumu işə başlayıb.
AzərTAc xəbər verir ki, forumda Azərbaycanın və Fransanın ali təhsil sistemlərində prioritet istiqamətlər, iki ölkənin təhsil ocaqları arasında əməkdaşlığın genişləndirilməsi yolları müzakirə edilib.
Tədbirdə çıxış edən ADA-nın rektoru, səfir Hafiz Paşayev bildirib ki, forumun məqsədi Fransanın ali təhsil ocaqları haqqında daha dolğun məlumat əldə etməkdir.
Hafiz Paşayev xalqlarımız və dövlətlərimiz arasında səmimiyyət üzərində qurulmuş əlaqələrdən, siyasi, iqtisadi və mədəni sahələrdə səmərəli əməkdaşlıqdan danışıb.
Tədbirin əhəmiyyətindən danışan ADA-nın rektoru həm Fransa, həm də Azərbaycan tələbələrinin bu forumdan yararlanacağına ümidvar olduğunu bildirib.
Ölkələrimiz arasında əlaqələrin yüksək səviyyədə olduğunu bildirən Hafiz Paşayev ADA ilə bir çox ölkələrin universitetləri arasında əməkdaşlığın genişləndiyini qeyd edib.
Tədbirdə çıxış edən təhsil nazirinin müavini Ceyhun Bayramov Azərbaycanda təhsil sahəsində həyata keçirilən layihələrdən, azərbaycanlı gənclərin xarici ölkələrdə təhsil almasına göstərilən dövlət qayğısından və bu sahədə görülmüş işlərdən danışıb. Bildirilib ki, təhsil sahəsinin inkişaf etdirilməsi ölkə rəhbərliyi üçün prioritet istiqamətlərdəndir. Azərbaycanda digər sahələrdə olduğu kimi, təhsil sektorunda da mühüm layihələr həyata keçirilir və uzunmüddətli dövlət proqramları hazırlanır.
Diqqətə çatdırılıb ki, Prezident İlham Əliyevin 2007-ci il 16 aprel tarixli Sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” Təhsil Nazirliyi tərəfindən uğurla həyata keçirilir. İstedadlı gənclərimizin xaricdə təhsilinin təşkili istiqamətində vahid sistemin yaradılmasını nəzərdə tutan Proqram çərçivəsində bugünədək çoxlu sayda azərbaycanlı gənc dünyanın müxtəlif ölkələrinin qabaqcıl ali təhsil müəssisələrində təhsil almaq üçün xaricə göndərilib. Ümumilikdə, təhsil sahəsində həyata keçirilən tədbirlər iqtisadiyyatın inkişaf etdirilməsi ilə yanaşı, güclü kadr potensialının formalaşmasında da mühüm rol oynayır. Proqram çərçivəsində 2612 tələbə dünyanın müxtəlif universitetlərində təhsil almaq hüququ qazanıb.
Fransanın Azərbaycandakı səfiri Paskal Mönye ölkələrimiz arasında təhsil sahəsində əməkdaşlığı daha da genişləndirməyin əhəmiyyətinə toxunub, bu münasibətlərin gələcək inkişafı baxımından belə tədbirlərin mütəmadi təşkil olunmasının vacibliyini vurğulayıb.
Fransanın Azərbaycan ilə əməkdaşlığı daha da möhkəmləndirmək əzmində olduğunu diqqətə çatdıran diplomat, birgə çalışmaq üçün böyük imkanların olduğunu xüsusilə vurğulayıb.
Tədbirdə “ADA” Universiteti və Fransanın İESEG Menecment İnstitutu arasında Anlaşma Memorandumu imzalanıb.
Forum öz işini aprelin 5-də təhsil sərgisi ilə davam etdirəcək. Sərgidə tələbələr Fransada təhsil imkanları, mövcud təqaüdlər barədə məlumat əldə edəcəklər. Eyni zamanda, Fransanın ali məktəblərini bitirmiş azərbaycanlı məzunlarla görüş keçiriləcək.

Paylaş:

Baxılıb: 2451 dəfə