Bakı Dövlət Universitetində XX əsr Azərbaycan ictimai fikrinin ən görkəmli nümayəndələrindən biri olan Əli bəy Hüseynzadənin 150 illik yubileyi qeyd edilib

Bakı:

24 °C

68 %

3 m/s

AZ RU EN

Ana səhifə / Elm / Bakı Dövlət Universitetində XX əsr Azərbaycan ictimai fikrinin ən görkəmli nümayəndələrindən biri olan Əli bəy Hüseynzadənin 150 illik yubileyi qeyd edilib

Bakı Dövlət Universitetində XX əsr Azərbaycan ictimai fikrinin ən görkəmli nümayəndələrindən biri olan Əli bəy Hüseynzadənin 150 illik yubileyi qeyd edilib

30.04.2014 [09:12]

Aprelin 29-da Bakı Dövlət Universitetində (BDU) böyük Azərbaycan ədibi, filosofu və ədəbiyyat tənqidçisi, XX əsr Azərbaycan-türk ictimai fikrinin ən görkəmli nümayəndələrindən biri Əli bəy Hüseynzadənin 150 illik yubileyinə həsr edilmiş tədbir keçirilib.
AzərTAc xəbər verir ki, BDU-nun və Azərbaycan Mətbuat Şurasının (MŞ) birgə təşkilatçılığı ilə reallaşan tədbirdə tanınmış alim və mütəxəssislər, müəllimlər və tələbələr iştirak ediblər.
BDU-nun rektoru, Milli Məclisin deputatı, akademik Abel Məhərrəmov Azərbaycan Prezidenti İlham Əliyevin “Əli bəy Hüseynzadənin 150 illik yubileyinin keçirilməsi haqqında” 2014-cü il 21 yanvar tarixli Sərəncamının əhəmiyyətindən danışıb.
Rektor Əli bəy Hüseynzadənin mənalı ömür yolundan, geniş ictimai-siyasi fəaliyyətindən, zəngin ədəbi və maarifçilik irsindən bəhs edib.
Əli bəy Hüseynzadənin 1864-cü ildə Salyanda anadan olduğunu, bir müddət Tiflis mühitində yaşadığını, Peterburqda və İstanbulda ali təhsil aldığını və çalışdığını qeyd edən akademik A.Məhərrəmov onun Azərbaycanda “Kaspi”, “Həyat”, “Füyuzat” və digər nəşrlərinin populyarlıq qazanmasında mühüm xidmətlərini, yorulmadan təbliğ etdiyi maarifçilik, türkçülük ideyalarının əhəmiyyətini, milli təfəkkürün, milli ideologiyanın formalaşmasındakı əvəzsiz rolunu xatırladıb.
Azərbaycan Mətbuat Şurasının sədri Əflatun Amaşov türk dünyasının böyük şəxsiyyəti olan Əli bəy Hüseynzadənin çoxşaxəli fəaliyyətindən, zəngin fəlsəfi-publisistik, ədəbi-elmi irsindən bəhs edib.
Bildirilib ki, Əli bəy Hüseynzadə böyük ədib, filosof, maarifçi, şair, publisist, jurnalist, rəssam, həkim olub. Ensiklopedik biliyə və dünyagörüşünə malik olan Əli bəy Hüseynzadə Azərbaycanda milli düşüncənin, milli şüurun inkişafında və formalaşmasında müstəsna xidmətlər göstərib.
Tədbirdə Bakı Dövlət Universitetinin professoru Şirməmməd Hüseynov milli tariximiz, mətbuatımız və onların inkişaf mərhələlərindən danışıb, görkəmli tarixi şəxsiyyətlərimizdən olan Əli bəy Hüseynzadənin xidmətləri barədə fikirlərini bildirib.
Azərbaycan Mətbuat Şurası idarə heyətinin üzvü, Milli Məclisin deputatı Cavanşir Feyziyev Əli bəy Hüseynzadənin 150 illik yubileyi ilə əlaqədar MŞ tərəfindən hazırlanmış film barədə məlumat verib.
Əli bəy Hüseynzadənin qardaşı nəvəsi, Azərbaycan Milli Konservatoriyasının tərkibindəki Musiqi Kollecinin müəllimi Cəmilə Hüseynzadə tədbirin təşkilatçılarına və iştirakçılarına təşəkkürünü bildirib.
Sonra Əli bəy Hüseynzadənin 150 illik yubileyi ilə əlaqədar Azərbaycan Mətbuat Şurasının hazırladığı film nümayiş etdirilib.

Paylaş:

Baxılıb: 2335 dəfə