Bilik Fondu Karlov Universitetində “Azərbaycanın geologiya elmi Çexiyada” sərgisini təşkil edib

Bakı:

1 °C

93 %

9 m/s

Əlaqə

AZ RU EN

Ana səhifə / Elm / Bilik Fondu Karlov Universitetində “Azərbaycanın geologiya elmi Çexiyada” sərgisini təşkil edib

Bilik Fondu Karlov Universitetində “Azərbaycanın geologiya elmi Çexiyada” sərgisini təşkil edib

04.12.2014 [10:14]

Azərbaycan Respublikasının Prezidenti yanında Bilik Fondu dekabrın 3-dən Çexiya Respublikasının paytaxtı Praqa şəhərində üç günlük sərgi keçirir. “Azərbaycan elmi xaricdə” proqramı çərçivəsində reallaşan sərgi “Azərbaycanın geologiya elmi Çexiyada” adlanır.
Sərgi ilə əlaqədar öncə Karlov Universitetində “dəyirmi masa” təşkil olunub. “Azərbaycan - Çexiya: Tarixi-mədəni münasibətlər” mövzusunda keçirilən müzakirələrdə elm-təhsil, siyasət, incəsənət, iş adamları arasında mövcud əlaqələrin daha da genişləndirilməsi ətrafında fikir mübadiləsi aparılıb. Bilik Fondunun icraçı direktoru Oktay Səmədov iki dost ölkənin ortaq dəyərlərindən danışıb, tarixi-mədəni əlaqələrin yüksələn xətt üzrə inkişaf etdiyini vurğulayıb.
Tədbirdə Karlov Universitetinin Yaxın Şərq və Afrika ölkələri üzrə İnstitutunun professoru Eduard Gombar, Çexiya Respublikasının Türkiyədəki sabiq səfiri, dilçi alim Tomas Lane, AMEA-nın müxbir üzvü Arif İsmayılzadə və Təbiət tarixi muzeyinin direktoru Tariyel Eybətov, petrologiya üzrə tanınmış çex tədqiqatçısı Shah Vali Faryad, Çexiya milli təbiət muzeyinin direktoru Jirina Daskova və muzeyin digər əməkdaşı tanınmış paleontoloq Jiri Kvacek, Çexiya Sənaye Nazirliyinin təmsilçisi Pavel Kavina, Univeristetin geologiya üzrə professoru Pavel Bosak çıxış edərək bildiriblər ki, Azərbaycanla Çexiya arasında tarixi-mədəni münasibətlərin genişləndirilməsi üçün münbit şərait mövcuddur.
Karlov Universitetində baş tutan “Azərbaycanın geologiya elmi Çexiyada” adlı sərginin açılışında Universitetin rektoru Tomas Zima Azərbaycanın Çexiya Respublikasının böyük enerji tərəfdaşı olduğunu diqqətə çatdırıb. Çexiyanın enerji tələbatının 20 faizindən çoxunu Azərbaycanın ödədiyini xatırladan rektor deyib ki, belə layihələr iki ölkə arasındakı elmi mübadilənin inkişafına təkan verir.
Azərbaycanın Çexiyadakı səfiri Fərid Şəfiyev Azərbaycan elminin xaricdə tanıdılması məqsədi ilə Bilik Fondunun həyata keçirdiyi layihələri alqışladığını bildirib və qeyd edib ki, belə tədbirlərin bütün elm sahələrini əhatə etməsi vacibdir. Səfirin sözlərinə görə, elmimizin xaricdə tanıdılması tələbə və müəllim mübadiləsinə, həmçinin, Azərbaycanın tarixi, mədəniyyəti, ədəbiyyatı və siyasətinin təbliğinə şərait yaradacaq.
Azərbaycanlı alimlər geologiya elmində qazandıqları nailiyyətləri, təmsil etdikləri ölkənin ərazisində aşkara çıxardıqları qiymətli qədim eksponatları, dəmir, qızıl, gümüş, alunit, polimetal və başqa yataqların əks olunduğu xəritələri nümayiş etdirib, çex alimləri ilə əməkdaşlıq münasibətləri qurublar.
Sərgiyə qatılan çexiyalı alimlər deyiblər ki, nümayiş olunan eksponatlar Azərbaycanın geologiya elmi - zəngin yeraltı və yerüstü sərvətləri haqqında xeyli bilgilər verib.
Növbəti günlərdə “Azərbaycan elmi xaricdə” proqramı çərçivəsində Bilik Fondunun xətti ilə Azərbaycandan Çexiyaya gedən alimlərin mühazirələri dinləniləcək.
Pərviz SADAYOĞLU

Paylaş:

Baxılıb: 1857 dəfə