Davamlı inkişafda yeni təhsil modellərinin yaranması zəruridir

Bakı:

27 °C

47 %

2 m/s

Əlaqə

AZ RU EN

Ana səhifə / Elm / Davamlı inkişafda yeni təhsil modellərinin yaranması zəruridir

Davamlı inkişafda yeni təhsil modellərinin yaranması zəruridir

22.05.2018 [09:27]

Mayın 21-də Dövlət İqtisad Universitetində (UNEC) Azərbaycan Xalq Cümhuriyyətinin (AXC) 100 illik yubileyinə həsr olunmuş “Davamlı inkişaf: problemlər və perspektivlər” mövzusunda beynəlxalq elmi-praktik konfrans keçirilib.
AZƏRTAC xəbər verir ki, UNEC-in rektoru, professor Ədalət Muradov bu il AXC-nin yaranmasının 100 illiyinin tamam olduğunu bildirib. Qeyd olunub ki, ötən yüz ildə ölkəmizdə davamlı inkişaf sahəsində böyük uğurlar əldə edilib. Davamlı inkişafın iqtisad elmində müzakirə edilən bir problem olduğunu deyən rektor bildirib ki, UNEC-in əsas hədəfi insan kapitalının yetişdirilməsidir.
Təhsil nazirinin müavini Firudin Qurbanov AXC dövründə elm və təhsilin inkişafına xüsusi diqqət göstərildiyini qeyd edib. O deyib: “1918-1920-ci illərdə Azərbaycanda Maarif Nazirliyi yaradılıb, Bakı Dövlət Universiteti fəaliyyətə başlayıb. AXC dövründə hökumət tərəfindən 100 tələbə xaricə təhsil almağa göndərilib. Müstəqillik dövründə isə xaricdə təhsil üzrə Dövlət Proqramı əsasında 3500-dən çox Azərbaycan vətəndaşı dünyanın aparıcı ali təhsil müəssisələrində bakalavriat, magistratura, doktorantura pillələri üzrə təhsil alıb. Hazırda bu istiqamətdə islahatlar həyata keçirilir”.
F.Qurbanov davamlı inkişafda yeni təhsil modellərinin yaranması zərurəti haqqında məlumat verib, bu istiqamətdə “SABAH” qrupları layihəsinin fəaliyyətini diqqətə çatdırıb. Nazir müavini “Azərbaycan Respublikasında təhsilin inkişafı üzrə Dövlət Strategiyası”nda qeyd olunan məqsədlərin “SABAH” qrupları layihəsinin fəaliyyətində əksini tapdığını diqqətə çatdırıb.
Konfransda “SABAH” İcra Komitəsinin rəhbəri Şahin Seyidzadə Azərbaycanın ali təhsil sistemində yeni model olan “SABAH” qrupları barədə məlumat verib. Bildirilib ki, “SABAH” qrupları Təhsil Nazirliyinin təşəbbüsü ilə 2014/2015-ci tədris ilində yeddi baza ali təhsil müəssisəsində yaradılmış ən aparıcı layihələrdəndir. Layihənin əsas məqsədi ali təhsilin keyfiyyətinin yüksəldilməsi, ali təhsil sistemində yeni və fərqli bir mühitin yaradılması, savadlı, bacarıqlı və hazırlıqlı tələbə yetişdirilməsi, əmək bazarının artan tələblərinə müvafiq olaraq keyfiyyətli kadr hazırlığının təmin edilməsidir. Hazırda “SABAH” qrupları 12 baza ali təhsil müəssisəsində fəaliyyət göstərməklə 45 ixtisas və 2300-dən artıq tələbəni əhatə edir.
Tədbirdə AXC-nin 100 illiyinə həsr edilmiş videoçarx nümayiş olunub.
Konfrans işini bölmə iclasları ilə davam etdirib.

Paylaş:

Baxılıb: 1503 dəfə