Avropa İttifaqı ilə Azərbaycanın ikitərəfli əməkdaşlıq əlaqələri genişlənir

Bakı:

15°C

82%

9m/s

Əlaqə

AZ RU EN

Ana səhifə / Gündəm / Avropa İttifaqı ilə Azərbaycanın ikitərəfli əməkdaşlıq əlaqələri genişlənir

Avropa İttifaqı ilə Azərbaycanın ikitərəfli əməkdaşlıq əlaqələri genişlənir

01.05.2009 [13:04]

Prezident İlham Əliyev: Avropa İttifaqı və Azərbaycan arasındakı əlaqələr qarşılıqlı şəkildə faydalıdır
Xəbər verdiyimiz kimi, aprelin 29-da Azərbaycan Prezidenti İlham Əliyev və Avropa İttifaqı Nazirlər Şurasının baş katibi, ümumi xarici və təhlükəsizlik siyasəti üzrə ali nümayəndəsi Xavyer Solana görüşdən sonra mətbuat nümayəndələri qarşısında bəyanatlarla çıxış ediblər. Xavyer Solana bildirib ki, Azərbaycan Avropa İttifaqı üçün vacib ölkədir və tərəflər arasında yaxşı əməkdaşlıq münasibətləri var: “Azərbaycan Avropa İttifaqı üçün çox önəmli bir ölkədir. Bu ölkə ilə bizim “Şərq tərəfdaşlığı” və “Avropa Qonşuluq Siyasəti” çərçivəsində gözəl əlaqələrimiz var. Bizim enerji sahəsində də xüsusi əlaqələrimiz var və olacaqdır. Məlum olduğu kimi, bu məsələlərin bir çoxu geniş şəkildə müzakirə etdiyimiz mövzuların bir hissəsidir. Mən cənab Prezidentə bunun davam etdiriləcəyinə söz verdim. Bizim kifayət qədər vaxtımız var ki, görmək istədiyimiz bütün bu məsələləri eyni gözlə və eyni baxışlarla nəzərdən keçirək. Söz verirəm ki, bu söhbəti davam etdirmək üçün Azərbaycana səfər edəcəyəm. Onu da demək istərdim ki, Azərbaycan bizim üçün önəmli bir ölkədir. Bildiyiniz kimi, bu yaxınlarda biz bir sıra tədbirlərdə görüşəcəyik. Hesab edirəm ki, biz yenidən bir araya gələrək bu tərəfdaşlıq, o cümlədən enerji və “Cənub dəhlizi” haqqında müzakirələrimizi davam etdirəcəyik. ümid edirəm ki, Avropa İttifaqı ilə Azərbaycan arasında ikitərəfli əlaqələr daha da dərinləşəcək. Bu, bizim məqsədimizdir və biz bu istiqamətdə də çalışacağıq”.
Azərbaycan Prezidenti İlham Əliyev aparılan danışıqlardan məmnunluğunu ifadə edərək bildirib ki, biz Avropa İttifaqı ilə əməkdaşlığın səviyyəsini yüksək qiymətləndiririk: “Bu müzakirələr Avropa İttifaqı və Azərbaycan arasındakı əlaqələrin davamlı inkişafı üçün çox geniş imkanlar yaradır. Biz bu əlaqələrə böyük önəm veririk. Biz əməkdaşlığın səviyyəsini yüksək dəyərləndiririk. Biz bu əməkdaşlığın praktiki cəhətlərini müzakirə etdik. Əlaqələrimizin gündəliyi genişlənir. Hazırda bu gündəlik regional inkişafa, iqtisadi əməkdaşlığa, siyasi islahatlara və təbii ki, enerji təhlükəsizliyi və şaxələndirməyə dair bir sıra məsələləri özündə əks etdirir. Münaqişələrin həlli, regiondakı təhlükəsizlik - bütün bunlar bir-biri ilə bağlı olan məsələlərdir və bu məsələlərin həlli üçün biz Avropa İttifaqı ilə Azərbaycan arasındakı səmərəli dialoqu davam etdirəcəyik. Bizim baxışlarımız bir çox regional inkişaf məsələləri üzrə üst-üstə düşür. Bu gün qitənin təhlükəsizliyi sahəsində ən mühüm məsələlərdən biri sayılan enerji təhlükəsizliyinə gəldikdə isə, Azərbaycan bir dost, karbohidrogen ehtiyatlarının etibarlı təchizat mənbəyi və etibarlı tranzit ölkəsi kimi enerji şaxələndirilməsində öz rolunu davam etdirəcəkdir. Bu, hamımız üçün vacibdir. Avropa İttifaqı və Azərbaycan arasındakı əlaqələr qarşılıqlı şəkildə faydalıdır. ümid edirəm ki, “Şərq tərəfdaşlığı” təşəbbüsü çərçivəsində yaranacaq yeni format bu əlaqələri möhkəmləndirəcəkdir”.

Paylaş:

Baxılıb: 1349 dəfə