Referendum iddiası - kim tərəfindən və niyə məhz indi ortaya atılıb?

Bakı:

27 °C

38 %

8 m/s

Əlaqə

AZ RU EN

Ana səhifə / Gündəm / Referendum iddiası - kim tərəfindən və niyə məhz indi ortaya atılıb?

Referendum iddiası - kim tərəfindən və niyə məhz indi ortaya atılıb?

28.05.2022 [18:47]

Azərbaycanın ictimai-siyasi gündəmi zəngindir. Diqqət yetirilən və əsas müzakirə mövzusuna çevrilən məsələlər çoxdur.

Bunlardan biri (və birincisi) sülh prosesi, ölkəmizlə Ermənistan arasında münasibətlərin normallaşdırılması məsələsidir. Brüsseldə üçüncü üçtərəfli görüşdə mühüm razılaşmaların (sərhədlərin delimitasiyası, kommunikasiyaların bərpası, sülh müqaviləsinin hazırlanması ilə əlaqədar) əldə edilməsi Azərbaycanın geosiyasi iradəsinin nəticə verdiyini, prosesdə irəliləyiş olduğunu təsdiqləyir. Ekspertlər bunu Azərbaycanın hərb meydanında qazandığı qələbəni diplomatik müstəvidə möhkəmləndirərək strateji prosesə çevirməsi kimi dəyərləndirirlər. Xarici media da məsələni diqqətdə saxlayır, müxtəlif rakurslardan şərh edir. İfadə olunan qənaət budur ki, Bakı Cənubi Qafqazda etimad quruculuğunu mümkün edən strateji fəaliyyət həyata keçirir. Xüsusilə də, Azərbaycan ilə Türkiyənin ortaq siyasi iradə əsasında atdığı addımların bölgədə yeni geosiyasi nizam - sülh, sabitlik - təhlükəsizlik və əməkdaşlıq mühiti yaratdığı vurğulanır.

Dialoq və əməkdaşlıq məkanı olan Azərbaycanda beynəlxalq əhəmiyyətli vacib tədbirlərin keçirilməsi ("Teknofest-2022", "Formula-1") də yerli və xarici mətbuatın gündəm mövzularındandır. İqtisadçı-ekspertlər, siyasətşünaslar qeyd edirlər ki, zaman-zaman mühüm diplomatik görüşlərin baş tutduğu paytaxt Bakıda belə tədbirlərin keçirilməsi Azərbaycanın yüksək nüfuzunu - müsbət imicini əks etdirməklə yanaşı, ölkə reallıqlarının təbliği baxımından da önəmlidir.

Daha bir məqam: müxtəlif ölkələrin rəhbərlərinin və rəsmilərinin Prezident İlham Əliyevə telefon zənglərində, ünvanladıqları məktublarda ifadə etdikləri fikirlər Azərbaycanın etibarlı ve perspektivli tərəfdaş kimi dünya siyasi arenasında öz mövqeyini möhkəmləndirdiyini, ölkəmizlə əməkdaşlığın dərinləşdirilməsinin strateji öncəliklər sırasında olduğunu təsdiqləyir. Bu isə müxtəlif informasiya resurslarında geniş əks olunur.

Bütün bu reallıqların fonunda müəyyən xarici dairələr saxta və süni gündəm yaratmaq üçün müxtəlif iddialar ortaya atır, dezinformasiya yayırlar. Bunlardan biri də Azərbaycanda guya yaxın zamanda referendumun keçiriləcəyidir. "BBC Azərbaycan" sosial şəbəkələrin də imkanlarından istifadə edərək bu barədə xəbərlər tirajlayır, ictimai fikrin diqqətini digər məsələlərdən (yuxarıda bəhs olunan reallıqlardan) yayındırmağa çalışır. Saxta referendum haqqında xəbərin "BBC Azərbaycan"ın feysbuk səhifəsində reklama qoyulması isə bu məqsədli və qərəzli informasiya kampaniyasının ünvanını aşkar etməyə (haradan gəldiyini müəyyənləşdirməyə) imkan verir.

Təbii ki, belə cəhdlər ilk olmadığı kimi, sonuncu da deyil. Biz Avropa Oyunları, İslam Həmrəyliyi Oyunları, "Formula-1" yarışları, forumlar və digər tədbirlər zamanı xarici mənşəli kampaniyaların - Azərbaycan haqqında neqativ informasiyaların yayılmasının, sabitliyi hədəfə alan hərəkətlər edilməsinin - bəyanatlar verilməsinin şahidi olmuşuq. Və hər zaman belə kampaniyaların sifarişçiləri və icraçıları deşifrə (ifşa) olunub, siyasi ajiotaj yaratmaq, ictimai rəyi gərginləşdirmək cəhdləri heç bir effekt və nəticə verməyib. Təbiri caizsə, Azərbaycan ictimaiyyətində bu cür informasiya kampaniyalarına (dezinformasiya virusuna) qarşı ictimai immunitet formalaşıb. Ona görə də "BBC Azərbaycan" kimi xüsusi informasiya təyinatlılarının ictimai rəyi "idxal mənşəli - genetik modifikasiya olunmuş zərərli xəbərlər"lə - dezinformasiya ilə qidalandırmaq cəhdləri iflasa məhkumdur.

Nurlan QƏLƏNDƏRLİ

Paylaş:

Baxılıb: 892 dəfə