Prezident İlham Əliyev Bakı Metropoliteninin yenidən qurulmuş "Koroğlu" stansiyasının açılışında iştirak edib

Bakı:

26 °C

55 %

14 m/s

AZ RU EN

Ana səhifə / Gündəm / Prezident İlham Əliyev Bakı Metropoliteninin yenidən qurulmuş "Koroğlu" stansiyasının açılışında iştirak edib

Prezident İlham Əliyev Bakı Metropoliteninin yenidən qurulmuş "Koroğlu" stansiyasının açılışında iştirak edib

31.12.2011 [00:13]

Dövlətimizin başçısı stansiyada yaradılmış şəraitdən razılığını bildirib
Dünən Bakı Metropoliteninin “Koroğlu” (keçmiş “Məşədi Əzizbəyov”) stansiyasının yenidənqurmadan sonra açılışı olub.
Azərbaycan Respublikasının Prezidenti İlham Əliyev və xanımı Mehriban Əliyeva açılış mərasimində iştirak ediblər.
“Koroğlu” stansiyasında dövlətimizin başçısını və xanımını Bakı Metropoliteninin əməkdaşları hərarətlə qarşılayıblar.
Prezident İlham Əliyev stansiyanın rəmzi açılışını bildirən lenti kəsib.
Bakı Metropoliteninin rəisi Tağı Əhmədov dövlətimizin başçısına və xanımına stansiyanın yeni yerüstü binası haqqında məlumat verib. Bildirilib ki, 2010-cu ilin iyunundan etibarən Bakı Metropoliteninin birinci növbəsinə daxil olan bu stansiyada yenidənqurma işlərinə başlanılıb. Layihəni Avstriya şirkəti hazırlayıb, tikinti-quraşdırma işlərini isə ABŞ şirkəti həyata keçirib.
Stansiyada yaradılan şəraitlə tanış olan dövlətimizin başçısına məlumat verilib ki, yenidənqurma işləri çərçivəsində birinci vestibüldəki pavilyonun yerinə hündürlüyü 20 metr, səthin sahəsi 1800 kvadratmetrədək olan şüşə-metal konstruksiyadan piramida şəklində yeni vestibül inşa edilib.
Prezident İlham Əliyev və xanımı Mehriban Əliyeva vestibüldə xalq qəhrəmanı Koroğlunun abidəsinin qoyulacağı postamentə və eskiz layihələrinə baxıblar, stansiya daxilində fəaliyyət göstərəcək ticarət köşkləri və istirahət guşələrində yaradılan şəraitlə tanış olublar.
Sonra platformaya enən Prezident İlham Əliyevə əvvəlcə “SOS” həyəcan avadanlığı barədə məlumat verilib. Qeyd olunub ki, bu avadanlıq vasitəsilə metropoliten işçiləri bütün məlumatları mərkəzə ötürə bilərlər.
Diqqətə çatdırılıb ki, stansiyanın çıxışlarının, vestibüllərinin, divarlarının üzlükləri dəyişdirilərək mərmər və qranitlə əvəzlənib. Sərnişin platformasının və 32 sütunun hər biri yarıyadək mərmər, digər yarısı isə paslanmayan metalla üzlənib. ümumilikdə on min kvadratmetrədək üzləmə işləri yerinə yetirilib. Stansiyada yeni materiallardan quraşdırılmış asma tavan müasir işıqlandırma sistemi ilə təchiz olunub. Burada Almaniya istehsalı olan üç eskalator quraşdırılmışdır. Yeni qurulan yerüstü vestibülü, texnoloji və xidməti sahələri havalandıran, su ilə təchiz edən müasir sistemlər quraşdırılıb. Azərbaycanda ilk dəfə kompyuter texnologiyalarından istifadə olunmaqla şüşə-metal konstruksiyalı vestibüldə çoxrəngli müasir, enerjiyə qənaət edən LED tipli işıqlandırma sistemi tətbiq edilib. Bakı Metropolitenində ilk dəfə olaraq stansiyanın vestibülündə yaşıl bağ salınıb.
Prezident İlham Əliyevə və xanımı Mehriban Əliyevaya məlumat verilib ki, stansiyaya girişi asanlaşdırmaq üçün yerüstü nəqliyyat vasitələrinin intensiv olduğu ərazidə piyada keçidləri inşa olunub.
Dövlətimizin başçısı və xanımı keçidin texniki göstəricilərini əks etdirən stendlərə baxıblar.
Nəqliyyat naziri Ziya Məmmədov bildirib ki, bu, ilk növbədə metrodan istifadə edən sərnişinlərin və ərazidə yaşayan sakinlərin təhlükəsizliyinə və sərbəst hərəkətinə xidmət edir. Heydər Əliyev və Ziya Bünyadov prospektlərinin kəsişməsində inşa olunan birinci və ikinci tunellərdə piyadaların hərəkəti üçün bütün zəruri şərait yaradılıb. Birinci tunelin uzunluğu 140, ikincisinin uzunluğu isə 65 metrdir. Hər iki tunelin eni 6 metrdir. Burada piyadaların hərəkətini tənzimləyən istiqamətverici elektron lövhələr və müşahidə kameraları quraşdırılıb.
Dövlətimizin başçısı stansiyada yaradılmış şəraitdən razılığını bildirib.

Paylaş:

Baxılıb: 1061 dəfə