Azərbaycan BMT TŞ-yə sədrlik edəcək

Bakı:

13 °C

82 %

5 m/s

Əlaqə

AZ RU EN

Ana səhifə / Gündəm / Azərbaycan BMT TŞ-yə sədrlik edəcək

Azərbaycan BMT TŞ-yə sədrlik edəcək

01.05.2012 [11:06]

Prezident İlham Əliyev: Azərbaycan dünyanın ən böyük, ən mötəbər, ən vacib qurumuna sədrlik edəcəkdir və əminəm ki, uğurlu sədrlik edəcəkdir
Məlum olduğu kimi, bu ilin may ayında Azərbaycan BMT Təhlükəsizlik Şurasına (TŞ) sədrlik edəcək. Qurumun fəaliyyət prinsipinə əsasən, bu müddətdə iş proqramı - gündəlik tərtib edilir, həmin gündəlikdə bir sıra məsələlər irəli sürülür, eləcə də, həmin iş proqramı ölkələr tərəfindən müzakirəyə çıxarıldıqdan sonra qəbul olunur.
Qeyd edək ki, Azərbaycan Şuraya iki dəfə, yəni 2012-ci ilin may və 2013-cü ilin sentyabr aylarında sədrlik edəcək. Azərbaycanın TŞ-yə üzvlük məsələsinə kifayət qədər ciddi və məsuliyyətlə yanaşdığını nəzərə alsaq, ölkəmizin bu vəzifənin öhdəsindən layiqincə gələcəyini söyləmək olar. Bu məsələyə Nazirlər Kabinetinin 2012-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı nitqində toxunan Prezident İlham Əliyev ölkəmizin bu yöndə fəaliyyətini yüksək səviyyədə icra edəcəyinə inamını ifadə edib: “Bu da tarixdə ilk dəfə olan bir addımdır. Azərbaycan dünyanın ən böyük, ən mötəbər, ən vacib qurumuna sədrlik edəcəkdir və əminəm ki, uğurlu sədrlik edəcəkdir”.
Qeyd edək ki, Azərbaycan BMT Təhlükəsizlik Şurasına layiqincə sədrlik etməsi üçün lazım olan dəyər və göstəricilərə sahibdir. Belə ki, Azərbaycan, ilk növbədə, hər bir fəaliyyətində beynəlxalq hüquqa hörmətlə yanaşdığını əyani şəkildə sübuta yetirib. Eyni zamanda, Azərbaycan həm regionda, həm də bütün dünyada sülh və sabitliyin bərqərar olmasında, ölkələrin bir-birilə qarşılıqlı hörmət və mehriban münasibətlər şəraitində inkişaf etməsində maraqlıdır. Dövlət başçısının da qeyd etdiyi kimi, Azərbaycan hər zaman ədaləti müdafiə edib və bundan sonra da belə olacaq: “Bu mötəbər quruma üzv seçildikdə mən demişəm, bir daha demək istəyirəm ki, biz Təhlükəsizlik Şurasında, ilk növbədə, beynəlxalq hüququ və ədaləti müdafiə edəcəyik və müdafiə edirik. Bizim mövqeyimiz ədalətlidir, ölkəmizin müstəqil siyasəti üzərində qurulubdur”.
Qeyd edək ki, Azərbaycan BMT çərçivəsində həyata keçirilən tədbirlərdə və müzakirələrdə kifayət qədər fəal iştirak edir, müxtəlif məsələlərlə bağlı öz mövqeyini açıq şəkildə ortaya qoyur. Bu isə ölkəmizin beynəlxalq nüfuzuna, mövqelərinin möhkəmlənməsinə müsbət təsir göstərir. ümumiyyətlə isə, Azərbaycanın BMT TŞ-yə üzv seçilməsinin özü ölkənin beynəlxalq nüfuzundan xəbər verir.
Xatırladaq ki, 2011-ci ilin sonlarında BMT-də günlərlə davam edən səsvermə prosesinin nəticəsində 193 ölkədən 155-nin səsini qazanan Azərbaycan Macarıstan və Sloveniya ilə rəqabətdən qalib ayrılaraq 2012-2013-cü illərdə Şərqi Avropa regionunu Təhlükəsizlik Şurasında təmsil etmək hüququnu əldə edib. Ən mötəbər beynəlxalq təşkilatın ali orqanında təmsil olunmaq, şübhəsiz, hər bir dövlət üçün böyük əhəmiyyət daşıyan bir məsələdir. TŞ-yə qeyri-daimi üzv olmaq Azərbaycan üçün siyasi nüfuzunun yüksəlməsi, regional və qlobal proseslərə təsir göstərmək imkanlarının genişlənməsi, müxtəlif məsələlərlə bağlı mövqeyini bütün dünyaya duyurması baxımından əhəmiyyətlidir.
Qeyd etməliyik ki, Azərbaycanın BMT TŞ-yə qeyri-daimi üzv seçilməsi heç də təsadüfi xarakter daşımır. çünki cəmi 20 illik müstəqilliyə malik gənc bir dövlət olmasına baxmayaraq, Azərbaycan bu müddət ərzində çox böyük inkişaf yolu keçib. BMT TŞ-yə üzv seçilməsi üçün dövlətin beynəlxalq sülh və təhlükəsizliyə, insan hüquqlarının müdafiəsinə verdiyi töhfələr nəzərə alınır.
Məlum olduğu kimi, Azərbaycan BMT-yə üzvlük məsələsində böyük önəm verilən beynəlxalq əməkdaşlıq sahəsində xeyli uğurlar qazanıb. Müxtəlif dövlətlərlə əlaqələrini ikitərəfli və çoxtərəfli qaydada inkişaf etdirən ölkəmizin səsvermədə 155 ölkənin dəstəyini qazanması bu baxımdan təəccüblü deyil. Siyasi, iqtisadi, hərbi, humanitar, mədəni və digər sahələrdə möhkəm xarici əməkdaşlıq münasibətləri yaradan Azərbaycan tərəfdaşlarının sayını ildən ilə artırır. Digər tərəfdən, ölkəmizin BMT, Avropa Şurası, AŞ PA, UNESCO kimi təşkilaların işində aktiv iştirakı, habelə, Avropa İttifaqı və NATO ilə səmərəli əməkdaşlığı da respublikamızın imicinə müsbət təsir göstərən faktorlardandır.
Belə qənaətə gəlmək olar ki, Azərbaycanın BMT TŞ-yə üzvlüyü çərçivəsində yerinə yetirəcəyi sədrlik funksiyası ölkəmizin müxtəlif məsələlərlə bağlı mövqeyini nümayiş etdirməsi, quruma üzv digər dövlətlərlə münasibətləri daha da möhkəmləndirməsi, beynəlxalq siyasi arenadakı mövqeyini gücləndirməsi baxımından böyük önəm daşıyır. ümid etmək olar ki, Azərbaycanın quruma sədrliyi ölkəmizin artan diplomatik uğurlar silsiləsində bir çox müsbət məqamları ilə yadda qalacaq.
Hülya MƏMMƏDLİ

Paylaş:

Baxılıb: 1010 dəfə