Bakıda MDB ölkələrinin V Bank Konfransı keçirilir

Bakı:

22 °C

46 %

3 m/s

Əlaqə

AZ RU EN

Ana səhifə / İqtisadiyyat / Bakıda MDB ölkələrinin V Bank Konfransı keçirilir

Bakıda MDB ölkələrinin V Bank Konfransı keçirilir

16.11.2012 [00:11]

Dünən Bakıda MDB ölkələrinin “MDB-nin maliyyə bazarları: yeni imkanlar və qlobal risklər” mövzusunda V Bank Konfransı işinə başlayıb.
AzərTAc xəbər verir ki, MDB-nin Maliyyə-Bank Şurası və Azərbaycan Beynəlxalq Bankının (ABB) təşkilatçılığı ilə keçirilən konfransda Azərbaycan Prezidenti Administrasiyasının rəhbəri, akademik Ramiz Mehdiyev iştirak edib.
İkigünlük konfransın ilk günündə ABB İdarə Heyətinin sədri Cahangir Hacıyev konfransın aktuallığından və əhəmiyyətindən danışıb, tədbirin əməkdaşlığımızın inkişafında mühüm əhəmiyyət kəsb edəcəyini diqqətə çatdırıb. Bildirilib ki, maliyyə və iqtisadi böhran şəraitində inteqrasiya və müxtəlif layihələrin həyata keçirilməsi, problemlərin geniş müzakirəsi vacib məsələlərdəndir.
“ABB MDB ölkələrinin təsərrüfat subyektləri arasında əlaqələrin inkişafına, həmçinin MDB-nin maliyyə sahəsində fəaliyyətinə töhfəsini verib” - ABB İdarə Heyətinin sədri Cahangir Hacıyev deyib. ABB ölkənin bank bazarının risklərdən müdafiəsinə yönəldilmiş çox ciddi ölçülər götürür. Bir sıra banklar fəaliyyətini dayandıracaq. Amma bu, MDB banklarının ölkəyə gəlişi üçün yaxşı şərait yaradır, çünki burada yaxşı işgüzar mühit var. MDB İcraiyyə Komitəsinin sədri-icraçı katib Sergey Lebedev ikitərəfli ticarət, valyuta, hesablaşma rejimlərinin təkmilləşdirilməsi məsələlərinin aktuallığını diqqətə çatdırıb, Azərbaycanın inteqrasiya proseslərində mühüm rol oynadığını vurğulayıb. Qeyd edib ki, bir sıra irimiqyaslı inteqrasiya təşkilatlarının yaradılması, Avropada maliyyə böhranının davam etməsi, likvidliyin azalması ilə bağlı müəyyən problemlər ortaya çıxır. Bildirilib ki, islam bankçılığı kimi yeni alətlərin istifadəsi, milli valyutaların hesablaşmalarda istifadə edilməsi çox vacibdir. İslam bankçılığı önəmli məsələlərdəndir və ABB-nin bu sahədə gördüyü işlər yüksək qiymətləndirilir.
Konfransda MDB ölkələri üçün vahid maliyyə məkanının yaradılması məsələsi də müzakirə olunacaq. Moskvada maliyyə mərkəzinin yaradılması da planlaşdırır. MDB-nin Maliyyə-Bank Şurasının Əlaqələndirmə Şurasının sədri Anatoli Kazakov deyib ki, Azərbaycan Mərkəzi Bankı tərəfindən bankların kapitallaşdırılmasına dair tələblərin sərtləşdirilməsi ölkə bazarını MDB bankları üçün cazibədar edir. MDB-nin bank sistemi böyüməkdə davam edir, onun aktivlərinin həcmi son bir ildə 1,5 trilyon dollaradək artıb.
Konfransda “MDB-də maliyyə bazarlarının dayanıqlığı”, “Xəzəryanı maliyyə bazarları”, “MDB məkanında Azad Ticarət Zonası şəraitində bankların fəaliyyəti”, “MDB-də beynəlxalq maliyyə mərkəzlərinin yaradılması, regional inkişaf maliyyə institutları”, bank kapitalının hərəkəti, fondlaşma institutları, qarşılıqlı investisiya imkanları, inteqrasiya proseslərində normativ aktları və s. məsələlər üzrə məruzələr dinlənilmiş, müzakirələr aparılıb. Konfrans çərçivəsində mükafatlandırma mərasimi keçirilib. Azərbaycan Beynəlxalq Bankı MDB-nin Beynəlxalq Bank Şurasının “MDB-nin ən yaxşı bankı” mükafatına, idarə heyətinin sədri Cahangir Hacıyev isə “MDB-nin ən yaxşı bankiri” mükafatına layiq görülüblər.
MDB-nin Maliyyə-Bank Şurası və Azərbaycan Beynəlxalq Bankının (ABB) təşkilatçılığı ilə keçirilən tədbirdə MDB ölkələrinin maliyyə və bank qurumları, beynəlxalq maliyyə təşkilatları, eləcə də Azərbaycanın bank və sığorta təşkilatlarının nümayəndələri iştirak ediblər.
Tədbirin birinci gününün yekununda mətbuat konfransı keçirilib.

Paylaş:

Baxılıb: 1468 dəfə