Aydın Hüseynov: Valyuta Fondunun hesabatında Azərbaycanın dayanıqlı və davamlı inkişafı açıq şəkildə öz əksini tapıb

Bakı:

18 °C

68 %

3 m/s

AZ RU EN

Ana səhifə / İqtisadiyyat / Aydın Hüseynov: Valyuta Fondunun hesabatında Azərbaycanın dayanıqlı və davamlı inkişafı açıq şəkildə öz əksini tapıb

Aydın Hüseynov: Valyuta Fondunun hesabatında Azərbaycanın dayanıqlı və davamlı inkişafı açıq şəkildə öz əksini tapıb

11.04.2014 [09:20]

Beynəlxalq Valyuta Fondu (BVF) “Dünya İqtisadiyyatının İnkişaf Perspektivləri” (“World Economic Outlook”) adlı yeni hesabatını dərc edib. Sənəddə dünya ölkələrinin 2015 və qarşıdakı illərə dair makroiqtisadi inkişaf göstəriciləri, maliyyə-bank sektorundakı sabitlik vəziyyəti, ölkələrin daxili və xarici borc öhdəliklərinin durumu, həyata keçirilən pul-kredit siyasəti və digər komponentlər təhlil edilib. Sənəddə Azərbaycan iqtisadiyyatının inkişafı ilə bağlı nikbin proqnozlara yer verilib. Hesabatda qeyd edilir ki, gələn il respublikamızda iqtisadi artım 5,2 faiz təşkil edəcək. İnkişaf dinamikası sonrakı illərdə də davam edəcək.
Məsələyə münasibət bildirən Yeni Azərbaycan Partiyası (YAP) Siyasi Şurasının üzvü, partiyanın İqtisadi məsələlər komissiyasının sədr müavini Aydın Hüseynovun sözlərinə görə, Valyuta Fondunun yeni hesabatında Azərbaycanın dayanıqlı və davamlı inkişafı açıq şəkildə öz əksini tapıb. “Hesabatdan da göründüyü kimi Azərbaycan hökuməti ölkədə makroiqtisadi sabitliyin saxlanması, milli-iqtisadi potensialın artırılması, neft sektoru amilinin azalması və qeyri-neft sektorunun inkişafı, əlverişli investisiya və biznes mühitinin yaradılması siyasəti yürüdür. BVF hesab edir ki, respublikamız inkişaf dinamikasına görə Avropa miqyasında aparıcı dövlətlərdən biri sayılır. Azərbaycanda son illərdə əhəmiyyətli dərəcədə müsbət göstəricilər və dayanıqlılıq müşahidə olunur. İqtisadiyyata kredit yönəldilməsi və pul kütləsi artıb, insanların maddi rifahı yaxşılaşıb. Həyata keçirilən təmkinli və düşünülmüş iqtisadi strategiya respublikamızın siyasi və iqtisadi sabitliyi üçün dərin əsaslar yaradıb, inkişafı sürətləndirib”.
A.Hüseynov qeyd edib ki, BVF-nin ölkəmizlə bağlı yaxın 5 il üzrə proqnozlarında Azərbaycanın regionda ən sabit və dinamik inkişaf edən ölkə olacağı müəyyən edilib. “Valyuta Fondu Mərkəzi Asiya və Qafqaz regionunda ən yüksək inkişaf edən ölkə kimi Azərbaycanın 2015-2019-cu illərdə perspektiv inkişafının ümidverici olduğunu bildirir. Proqnozlara görə, milli məhsulun inkişaf dinamikası ölkə vətəndaşlarının illik gəlirlərinin artımına da şərait yaradacaq. 2014-2017-ci illər ərzində ÜDM-də əhalinin hər nəfərinə düşən pay ən azı 15 faiz artacaq. Yaxın ortamüddətli ssenarilərə görə, 2014-cü ildə ÜDM-in adambaşına həcmi 5,8 faiz artaraq 6,5 min manata, 2015-ci ildə 6,4 faiz artaraq 6,9 min manata, 2016-cı ildə 5,3 faiz artaraq 7,1 min manata, 2017-ci ildə 7,4 min manata çatacaq. Ümumilikdə, 2020-ci ilə kimi adambaşına düşən ÜDM-in 9 min manata catacağı proqnozlaşdırılır. Sosial-iqtisadi inkişaf proqnozlarına əsasən, qarşıdakı 3 ildə özəl sektorun çəkisi də əhəmiyyətli dərəcədə artaraq ÜDM-də təxminən 81,8 faizə çatacaq. Azərbaycan həmin dövrdə Cənubi Qafqaz iqtisadiyyatının təxminən 90 faizlik payına sahib olacaq”.
YAP-ın İqtisadi məsələlər komissiyasının sədr müavininin sözlərinə görə, Azərbaycan yaxın illərdə iqtisadiyyatın həcminə görə, dünyanın 50 inkişaf etmiş ölkəsi sırasında yer almağı hədəf seçib. Respublikamız ümumi daxili məhsulun həcminə görə, dünyanın ən yaxşı 50 ölkəsi sırasına daxil olmaq üçün iqtisadiyyatı 2 dəfə artırmağı planlaşdırır. Mövcud iqtisadi artım və ssenarilər onu göstərir ki, hər il ÜDM-in 5-6 faizlik artım dinamikası nəzərdə tutulan həddə çatmağa imkan verəcək.

Paylaş:

Baxılıb: 1257 dəfə