Daşkəsən və ətraf rayonlardan olan 55 sahibkara 747 min manat güzəştli kredit verilib

Bakı:

26 °C

63 %

9 m/s

Əlaqə

AZ RU EN

Ana səhifə / İqtisadiyyat / Daşkəsən və ətraf rayonlardan olan 55 sahibkara 747 min manat güzəştli kredit verilib

Daşkəsən və ətraf rayonlardan olan 55 sahibkara 747 min manat güzəştli kredit verilib

24.07.2015 [09:22]

İyulun 23-də İqtisadiyyat və Sənaye Nazirliyinin Sahibkarlığa Kömək Milli Fondu Daşkəsən rayonunda sahibkarlığın güzəştli kreditləşdirilməsi məsələlərinə dair işgüzar forum keçirib.
Nazirliyin mətbuat xidmətindən AZƏRTAC-a bildiriblər ki, tədbirdə sahibkarlara güzəştli kreditlərin alınması mexanizmi barədə ətraflı məlumat verilib, Daşkəsəndə həyata keçirilməsi məqsədəuyğun hesab olunan nümunəvi layihələr təqdim edilib, sahibkar-müvəkkil kredit təşkilatı münasibətlərinin möhkəmləndirilməsi istiqamətində müzakirələr aparılıb, sahibkarların investisiya layihələri güzəştli qaydada maliyyələşdirilib.
Yüz əlliyə yaxın sahibkarın iştirak etdiyi forum çərçivəsində Daşkəsən rayonunun iqtisadi potensialının reallaşdırılması məqsədi ilə prioritet hesab olunan cins heyvandarlıq, kartofçuluq, yüksək məhsuldar kartof toxumçuluğu və arıçılıq təsərrüfatlarının, meyvə emalı və qablaşdırılması, çörək, şirniyyat məhsulları, plastik qapı-pəncərə və üzlük daş istehsalı müəssisələrinin yaradılması üzrə nümunəvi investisiya layihələrinin təqdimatı keçirilib, kiçikhəcmli investisiya layihələrinin ümumi dəyərinin bütün hissəsinin dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanılıb.
Sahibkarlığa Kömək Milli Fondunun icraçı direktoru Şirzad Abdullayev qeyd edib ki, 2015-ci ilin ötən dövrü ərzində 3300-ə yaxın sahibkara 113 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 7300-ə yaxın yeni iş yerinin yaradılmasına imkan verir. Ümumilikdə indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin 5450-dən çox investisiya layihəsinin maliyyələşdirilməsinə 198 milyon manatdan artıq güzəştli kredit verilib, digər sahələrlə yanaşı, müasir texnologiyaların tətbiqinə əsaslanan logistik mərkəzlərin, taxıl anbarlarının, quşçuluq fabrikinin, cins iri buynuzlu heyvandarlıq kompleksinin, çörək zavodlarının, meyvə-tərəvəz, ət, süd emalı, tikinti materialları istehsalı müəssisələrinin, istixana, intensiv bağçılıq təsərrüfatlarının yaradılması və s. sahələr üzrə investisiya layihələri maliyyələşdirilib, 24 mindən çox yeni iş yerinin açılması imkanı yaradılıb.
İşgüzar forum çərçivəsində Daşkəsən və ətraf rayonlardan olan 55 sahibkara 747 min manat güzəştli kredit verilib. Kreditlər əsasən, heyvandarlıq, tərəvəzçilik, kartofçuluq, arıçılıq və s. sahələrin inkişafına yönəldiləcək.
Forum çərçivəsində Daşkəsən rayonunun Quşçu qəsəbəsində illik istehsal gücü 1000 ton olan ət kəsimi müəssisəsinin fəaliyyətinə baxış keçirilib. Sahibkarlığa Kömək Milli Fondu tərəfindən 655 min manat kreditin verildiyi müəssisədə hazırda 45 nəfər işləyir.

Paylaş:

Baxılıb: 1002 dəfə