AMB uçot faiz dərəcəsini dəyişəcək?

Bakı:

29 °C

48 %

7 m/s

Əlaqə

AZ RU EN

Ana səhifə / İqtisadiyyat / AMB uçot faiz dərəcəsini dəyişəcək?

AMB uçot faiz dərəcəsini dəyişəcək?

25.10.2022 [10:35]

Nicat Dilqəmli

Azərbaycan Mərkəzi Bankı (AMB) həftə sonu, daha dəqiq desək, oktyabrın 28-i uçot faiz dərəcəsinə dair qərarını açıqlayacaq. AMB-nin İdarə Heyətinin yeni sədri Taleh Kazımov isə faiz parametrlərini hələ ki, dəyişməyib. Bu ilin sentyabrın 1-dən faiz parametrlərində aşağı hədd 4.00%, yuxarı hədd 9.25% və uçot faiz dərəcəsi 7.75%-dir. AMB-nin son iclasında bildirilib ki, pul siyasətinə dair növbəti qərarlar qlobal mühitdə gedən proseslərin ölkə daxilindəki inflyasiya proseslərinə və maliyyə bazarlarına təsirləri, habelə daxili və xarici risk amillərinin balansı nəzərə alınmaqla qəbul ediləcək.

Mərkəzi Bank uçot stavkasını necə dəyişəcək? Uçot dərəcəsi artırılacaqmı?

Məsələ ilə bağlı “Yeni Azərbaycan” qəzetinə danışan Milli Məclisin deputatı, iqtisadçı-ekspert Vüqar Bayramovun sözlərinə görə, Mərkəzi Bankın uçot stavkası müəyyənləşdirildiyi zaman burada, həm inflyasiya səviyyəsi, həm də digər makroiqtisadi göstəricilər nəzərə alınır: “Eyni zamanda, tərəfdaş ölkələrdəki vəziyyət, o cümlədən, həmin ölkələrdə də uçot stavkası ilə bağlı dəyişikliklər də əsas faktorlardan biridir. Amma bütün bunlarla yanaşı, digər mühüm məqamlardan biri də Mərkəzi Bankın uçot stavkasının valyuta, o cümlədən, məzənnə siyasətinə necə təsir göstərməsidir. Hələlik Mərkəzi Bankın uçot stavkası ilə həm kredit bazarında olan faiz dərəcələri arasında fərq var, eyni zamanda məzənnə siyasətinə təsirləri birbaşa deyil. Amma bununla belə, təbii ki, hər bir ölkə üçün uçot stavkası çox önəmlidir. Bir tərəfdən Azərbaycanın ixracatı baxımından ölkəyə daxil olan valyutanın həcmi kifayət qədər böyükdür, bu da makroiqtisadi stabillik baxımından vacib şərtlərdən biridir”.

V.Bayramov bildirib ki, hələlik uçot stavkasının ciddi dəyişimi üçün zəmin yoxdur: “Doğrudur, inflyasiya səviyyəsi proqnozlaşdırılandan daha yüksəkdir. Dövlət Statistika Komitəsinin məlumatına əsasən, son 9 ayda 13.4 faiz inflyasiya qeydə alınıb və bu da inflyasiya səviyyəsinin yüksək olduğunu göstərir. Lakin bütün bunlarla yanaşı, digər mühüm məqam məhz Mərkəzi Bankın uçot stavkasının ciddi dəyişimi üçün zəminin olmamasıdır. Ona görə də, gözlənilir ki, Mərkəzi Bank uçot stavkasında hələlik kəskin dəyişikliklərə getməyəcək və təbii ki, indiki halda bu, makroiqtisadi stabilliklə bağlıdır. Mərkəzi Bank çalışmalıdır ki, uçot stavkası ilə həm məzənnə, həm valyuta, həm də kredit bazarına birbaşa təsir göstərə bilsin və uçot stavkası daha aktiv şəkildə alətə çevrilə bilsin”.

Xatırladaq ki, Mərkəzi Bankın İdarə Heyəti pul siyasəti qərarları ilə bağlı planlaşdırılan 8 iclasdan 6-sı keçirilib və sonuncu dəfə mart iclasında uçot dərəcəsi artırılıb.

Paylaş:

Baxılıb: 890 dəfə