Ali dəyərlərimizdən biri...

Bakı:

25 °C

69 %

9 m/s

Əlaqə

AZ RU EN

Ana səhifə / MEDİA / Ali dəyərlərimizdən biri...

Ali dəyərlərimizdən biri...

09.08.2024 [10:08]

Ölkəmizdə insan hüquqları necə qorunur?

Hər kəsin toxunulmaz hüquq və azadlıqları var. Bu hüquq və azadlıqlar insanın cəmiyyət və digər şəxslər qarşısında məsuliyyət və vəzifələrini əhatə edir. Vətəndaşın hüquqları şəxsin müəyyən dövlətə məxsusluğu ilə bağlıdır. Onlar dövlət tərəfindən müdafiə olunur.

Beynəlxalq aləmdə insan haqları BMT-nin İnsan Hüquqları Haqqında Ümumi Bəyannaməsi ilə qanuniləşdirilib. Bu sənəddə qeyd olunub ki, hər bir insan onun mənsub olduğu irqdən, cinsindən, dildən, dindən, siyasi və digər baxışlardan, milli və sosial mənşəyindən, mülkiyyətdən, doğum və başqa hallardan asılı olmayaraq, insan haqlarına və azad olmaq hüququna malikdir. Ölkələrin konstitusiyalarında da insan haqları mühüm hüquq kimi xarakterizə edilir.

Hər bir vətəndaşımızın hüququ təmin edilir...

“Konstitusiya Araşdırmaları Fondu”nun rəhbəri, hüquq müdafiəçisi Əliməmməd Nuriyev “Yeni Azərbaycan”a açıqlamasında bildirib ki, insan hüquq və azadlıqlarının müdafiəsi, eyni zamanda, vətəndaşların siyasi mədəniyyət səviyyəsinin yüksəldilməsi tək Azərbaycanda deyil, bütün dünyada müzakirə olunan məsələlərdən hesab olunur: “Dünyada söz sahibinə çevrilən Azərbaycanda insan hüquqları sahəsində strateji əhəmiyyətli sənədlərin təsdiqi, bir sıra uğurlu islahatların aparılması insan hüquqlarının müdafiəsi baxımından mühüm təcrübənin formalaşmasına imkan yaradıb. Azərbaycanın müasir inkişaf dövründə insan hüquqlarının müdafiəsi sahəsində səylərin gücləndirilməsi dövlət siyasətinin əsas istiqamətlərindən biri kimi müəyyən edilib. Respublikamızın ana qanunu olan Konstitusiyamızda insanların hüquq və azadlıqlarının müdafiəsi ilə əlaqədar xüsusi müddəalar təsbit olunub. 2016-ci ildə keçirilən ümumxalq səsvermə yolu ilə Konstitusiyamızın 42 maddəsinin 22-də edilən dəyişikliklərlə insanların hüquq və azadlıqlarının əhatə dairəsi daha da genişləndirilib. Prezidentin 27 dekabr 2011-ci il Sərəncamı ilə Azərbaycan Respublikasında hüquq və azadlıqların müdafiəsinin səmərəliliyini artırmaq sahəsində Milli Fəaliyyət Proqramı təsdiq edilib. Milli Fəaliyyət Proqramı 6 fəsildən ibarət olmaqla insanların hüquq və azadlıqlarının beynəlxalq normalara uyğun təmin olunması istiqamətində təşkili ilə bağlı çox əhatəli tədbirləri özündə əks etdirir. Milli Fəaliyyət Proqramında ictimai həyatın bütün təbəqələrinin, o cümlədən uşaqların, miqrantların, siyasi fəaliyyətlə məşğul olanların, erməni işğalı nəticəsində hüquqları pozulmuş keçmiş qaçqın və məcburi köçkünlərin, məhbus həyatını yaşayanların hüquq və azadlıqlarının təmin edilməsinə geniş yer verilib. Bu gün ölkəmizdə formalaşmış vətəndaş institutları və vətəndaş cəmiyyəti azad şəkildə fəaliyyət göstərir. Korrupsiyaya qarşı mübarizənin genişləndirilməsi və vətəndaşlara xidmətlərin şəffaf təqdim olunması dövlətimizin gündəlik fəaliyyətinə daxil edilib”.

Ölkəmizdə yeni siyasi mədəniyyət formalaşır

Ə.Nuriyevin sözlərinə görə, etnik və dini mənsubiyyətindən asılı olmayaraq, ölkəmizdə bütün vətəndaşlara bərabər hüquq və şərait yaradılıb: “Azərbaycan dünyanın çox az ölkələrindədir ki, multikulturalizim və tolerantlıq siyasəti gündəlik həyat tərzi kimi qəbul edilib. Dövlətimizin yaratdığı bərabər şərait sayəsində hər bir şəxs özünün azad və firavan həyatını qura bilir. Eyni zamanda, hüquq və azadlıqların təmin olunması cəmiyyətdə həm də yeni siyasi mədəniyyət formalaşdırır. Ölkəmizdə aparılan geniş islahatlar yeni siyasi konfiqurasiyanı yaradıb”.

Dövlətimiz inkişaf etdikcə baxışlar da dəyişir

Hüquq müdafiəçisi ölkəmizdə siyasi mədəniyyət səviyyəsinin qənaətbəxş olduğunu qeyd edib: “Bunun təzahürü olaraq xalqımız və dövlət müstəqilliyinin möhkəmlənməsinə xidmət edən vacib məqamlarda bütün siyasi qüvvələrin birləşməsi və öz siyasi baxışlarını kənara qoyub eyni mövqedən çıxış edərək qərar qəbul etmək mədəniyyəti formalaşdığını qeyd etmək olar. 44 günlük Vətən müharibəsində 1-2 radikal qüvvə istisna olmaqla, ölkəmizdə fəaliyyət göstərən bütün siyasi partiyaların mövqeyi üst-üstə düşüb və beynəlxalq ictimaiyyətə vacib çağırışlar edilib.

Ümumilikdə, ölkəmiz inkişaf etdikcə baxışlar da dəyişilir. Dövlətin insan hüquq və azadlıqlarının təmin olunması istiqamətində atdığı addımların əhatə dairəsi genişlənir və hər bir vətəndaşın hüquqları yüksək səviyyədə təmin olunur. Məhz bunun göstəricisidir ki, hüquqi dövlətimiz möhkəm təməllər üzərində qurulub”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə

“İnsan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması” istiqaməti üzrə hazırlanmışdır

Paylaş:

Baxılıb: 809 dəfə