Həsrətin sonu: Badaraya ilk addımlar!

Bakı:

13 °C

82 %

5 m/s

Əlaqə

AZ RU EN

Ana səhifə / MEDİA / Həsrətin sonu: Badaraya ilk addımlar!

Həsrətin sonu: Badaraya ilk addımlar!

19.09.2025 [08:16]

İllərin həsrəti sevincə çevrildi...

Bəzən bir dağın adı, bir bulağın səsi, bir evin qapısı insan üçün bütöv bir tarix, bütöv bir həyat deməkdir. Xocalının Badara kəndi təkcə coğrafi bir məkan deyil, uzun illər qəlbimizin yarası, xatirələrin beşiyi, həsrətin simvolu idi. Amma indi bu ad təkcə həsrət yox, qürur, zəfər, möhtəşəm dönüş deməkdir.

14 ailə köçürülüb

İllərlə xəritədə baxıb həsrətini duyduğumuz, dilimizə dua, könlümüzə nisgil etdiyimiz Badara kəndi artıq bizi gözləmir, bizi qarşılayır. Bu torpağın bağrında yatanlar da, buradan köç edənlər də öz doğma ocaqlarını unutmayanlar da Böyük Qayıdışın gününü gözləyirdi. Və nəhayət həmin gün 2025-ci il senytabrın 12-də reallaşdı. İlk mərhələdə kəndə 55 nəfərdən ibarət 14 ailə köçürülüb. Ailələrə tam təmir olunmuş və müasir tələblərə cavab verən fərdi yaşayış evlərinin açarları təqdim edilib. Prezident İlham Əliyev sentyabrın 15-də Xocalı rayonunun Badara kəndində olub. Dövlət başçısı kəndə köçmüş sakinlərlə görüşüb, onlarla söhbət edib.

İlin sonunadək 115 evin bərpası reallaşdırılacaq

Xatırladaq ki, Badara kəndi 1992-ci ildən Ermənistan silahlı qüvvələrinin işğalı altında olub. 2023-cü il sentyabrın 19-20-də aparılan lokal xarakterli antiterror əməliyyatları nəticəsində kənd yenidən Azərbaycan Respublikası Silahlı Qüvvələrinin nəzarətinə qaytarılıb. Cari ilin sonunadək 115, gələn il isə 128 evin bərpası planlaşdırılır.

Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsindən verilən məlumata görə, kənddə sosialyönümlü bir sıra layihələr icra olunub. Belə ki, mövcud elektrik və qaz xətləri bərpa olunub, transformator quraşdırılıb, sayğaclaşdırma işləri görülüb, yeni qaz xətti çəkilib, rabitə xətləri üçün dirəklər basdırılıb, kabelin çəkilişi isə davam etdirilir. Badarada park və bayraq meydanı yaradılıb, yollara asfalt döşənib.

Qarabağımız və Şərqi Zəngəzurumuz dirçəlir

Məlumdur ki, İkinci Qarabağ müharibəsində tarixi Zəfərimizdən sonra əsas hədəf 30 il işğal altında qalan, ermənilər tərəfindən tamamilə dağıdılıb yerlə-yeksan edilən ərazilərimizin yenidən qurulması və bərpasıdır. Azad edilmiş ərazilərimizdə geniş miqyas alan bərpa-quruculuq işləri keçmiş məcburi köçkünlərin öz yurd-yuvalarına qayıtmasına hədəflənib. Böyük Qayıdış Proqramının birinci mərhələsi üçün əsas hədəf 140 min keçmiş məcburi köçkünün qayıdışının təmin edilməsidir. Qısa zamanda görülən genişmiqyaslı bərpa-quruculuq işlərinin fonunda soydaşlarımızın qayıdış ünvanlarının sayında artım hər birimizi qürurlandırır.

Prezident İlham Əliyevin mütəmadi olaraq Qarabağ və Şərqi Zəngəzura səfərləri çərçivəsində bu torpaqlara qayıdan sakinlərlə görüşləri qürurverici məqamlardandır. Artıq Qarabağımız və Şərqi Zəngəzurumuz dirçəlir, bu torpaqlarda yeni həyat başlayır. Tarixi Zəfərimizdən dərhal sonra başlanan bərpa-quruculuq işləri, icra edilən “Ağıllı şəhər” və “Ağıllı kənd” layihəsi çərçivəsində ilk olaraq sakinlərinə qovuşan Zəngilanın Ağalı kəndindən başlayan köç prosesi hazırda davamlılığı ilə diqqətdədir. Prezident hər bir müsahibəsində, çıxışında, beynəlxalq əhəmiyyətli tədbirlərdə daim diqqəti Böyük Qayıdış Proqramına əsasən görülən işlərə və soydaşlarımızın mərhələ-mərhələ bu torpaqlara köçməsinə yönəldir. Birinci mərhələdə 8 şəhərin və 100 kəndin yenidən qurulması əsas hədəf kimi qarşıya qoyulub. Artıq bu məqsədin reallığa çevrildiyi göz qabağındadır. Belə ki, sakinlərinə qovuşan Laçın, Füzuli, Xocalı, Şuşa, Cəbrayıl, Kəlbəcər şəhərləri ilə yanaşı xeyli sayda kəndlərimiz və qəsəbələrimiz də bərpa edilib. Dövlət başçısının bu günlərdə Füzuli, Xocavənd, Xocalı rayonlarına və Xankəndi şəhərinə səfəri çərçivəsində Xocavənd rayonunun Qırmızı Bazar qəsəbəsində Qırmızı Bazar, Hadrut qəsəbələrinin və Sos kəndinin, həmçinin Xocalı rayonunun Badara kəndində Badara, Daşbulaq, Seyidbəyli və Şuşakənd kəndlərinin sakinləri ilə görüşü də bunun təsdiqidir.

Ölkə başçısının qətiyyətli siyasəti və həyata keçirilən praktiki işlər dünya ictimaiyyətinə nümayiş etdirir ki, Azərbaycan yalnız döyüş meydanında deyil, həm də iqtisadi inkişaf və quruculuqda böyük uğurlar əldə edir. İlham Əliyevin “Biz Qarabağı və Şərqi Zəngəzuru cənnətə çevirəcəyik” ifadəsi artıq reallıqda öz əməli təsdiqini tapmaqdadır. Dövlət başçısının düşünülmüş inkişaf strategiyası nəticəsində Qarabağ və Şərqi Zəngəzur yaxın gələcəkdə təkcə Azərbaycanın deyil, bütün regionun dayanıqlı inkişafının aparıcı mərkəzinə çevriləcək.

Səlim

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İşğaldan azad olunmuş ərazilərə “Böyük Qayıdış”” istiqaməti üzrə hazırlanmışdır.

Paylaş:

Baxılıb: 413 dəfə