Bakıda beynəlxalq təlimlər başlayıb...

Bakı:

26 °C

47 %

2 m/s

Əlaqə

AZ RU EN

Ana səhifə / MEDİA / Bakıda beynəlxalq təlimlər başlayıb...

Bakıda beynəlxalq təlimlər başlayıb...

23.04.2026 [10:52]

Azərbaycan rəqəmsal təhlükəsizliyin gücləndirilməsi üçün yeni mərhələyə keçir

Aprelin 21-dən 24-nə qədər Bakının dinamik və sürətlə rəqəmsallaşan mühitində dövlət qurumlarının, kritik infrastruktur subyektlərinin, kibertəhlükəsizlik sahəsində fəaliyyət göstərən mütəxəssislərin və özəl maliyyə təşkilatlarının nümayəndələri bir araya gəliblər. İxtisaslaşmış təlimlərin keçirilməsi, ölkədə rəqəmsal təhlükəsizliyin gücləndirilməsi istiqamətində atılan mühüm addımlardan biri kimi diqqət çəkir. Çünki bu cür tədbirlər yalnız bilik və təcrübə mübadiləsi ilə məhdudlaşmayaraq, həm də real təhlükə ssenarilərinə qarşı hazırlığın artırılmasına, koordinasiyanın gücləndirilməsinə və müxtəlif sektorlar arasında əməkdaşlığın daha da dərinləşdirilməsinə xidmət edir. Təlimlər Estoniyanın Elektron İdarəetmə Akademiyası (eGA) və “Azərbaycan Kibertəhlükəsizlik Təşkilatları Assosiasiyası” (AKTA) İctimai Birliyinin təşkilatçılığı ilə baş tutub. Beynəlxalq təcrübə ilə yerli ekspertizanı birləşdirən belə platformalar iştirakçılara yalnız nəzəri biliklər deyil, həm də praktiki bacarıqlar qazandıraraq onları müasir kibertəhdidlərə qarşı daha dayanıqlı və çevik edir.

Bilik və praktiki bacarıqların artırılması

Təlimlər maliyyə sisteminin sabitliyi üçün kibertəhlükəsizlik risklərinin idarə olunması, insidentlərə cavabvermə imkanlarının yetkinlik səviyyəsinin qiymətləndirilməsi, zərərli proqramlar üzrə məlumat mübadiləsi, eləcə də şəbəkə təhdidlərinin aşkarlanması kimi mühüm mövzuları əhatə edir. Təlim proqramı kiberdavamlılığın həm strateji, həm də texniki aspektlərini birləşdirərək iştirakçıların bilik və praktiki bacarıqlarının artırılmasına xidmət edir.

Maliyyə sektoru üzrə kibertəhlükəsizlik risklərinin idarə olunmasına həsr olunan seminar zamanı kiber risklərin maliyyə sabitliyinə təsiri və Avropa İttifaqının bu sahədə tətbiq etdiyi qabaqcıl yanaşmalar təqdim ediləcək. Eyni zamanda iştirakçılar təşkilati struktur, insan resursları, texniki alətlər və proseslər üzrə insidentlərə cavab vermə imkanlarının yetkinlik səviyyəsini qiymətləndirmək imkanı əldə edəcəklər.

Texniki təlimlər isə CSIRT və CERT qurumları üçün nəzərdə tutulmuş praktiki alətlərin tətbiqi, təhdid kəşfiyyatı məlumatlarının mübadiləsi, zərərli fəaliyyətlərin aşkarlanması və əməliyyat səviyyəsində cavab vermə mexanizmlərinin təkmilləşdirilməsi mövzularını əhatə edir.

Təlim proqramının açılışında çıxış edən AKTA-nın icraçı direktoru Rauf Cabarov bildirib ki, bu cür təşəbbüslər müxtəlif qurumlar arasında əməkdaşlığın gücləndirilməsinə, praktiki biliklərin artırılmasına və insidentlərə effektiv cavab vermə imkanlarının inkişafına mühüm töhfə verir.

Azərbaycan eGA-nın dəstəyi ilə kibermüdafiəni gücləndirir

Estoniyanın Elektron İdarəetmə Akademiyasının (“eGA”) kibertəhlükəsizlik üzrə baş eksperti Elza Neeme bildirib ki, “eGA” Azərbaycanda kiberdiplomatiya sahəsində potensialın artırılması təşəbbüslərində iştirak etməyi planlaşdırır: “Bu istiqamət Azərbaycanda kifayət qədər yaxşı inkişaf edib, şübhəsiz, gələcək əməkdaşlığın prioritet sahələrindəndir. Tərəfdaşlarımız, xüsusilə “Azərbaycan Kibertəhlükəsizlik Təşkilatları Assosiasiyası” (AKTA) və Azərbaycan Mərkəzi Bankı ilə birgə müxtəlif hədəf qrupları üçün məlumatlılığın artırılması mexanizmlərinin yaradılması üzərində işləyirik. Məqsədimiz son istifadəçilərə şəbəkədə özlərini qoruma üsullarını aydın şəkildə izah etmək, həmçinin kritik infrastruktur obyektləri üçün tədbirlər keçirməkdir. Plan olduqca genişmiqyaslıdır”.

Kibertəhlükələr mahiyyətcə transsərhəd olduğu üçün...

Ekspert qeyd edib ki, məqsəd azərbaycanlı həmkarlarla birgə iş potensialın artırılmasına yönəlib, lakin bu məsələ bir ölkənin hüdudlarından xeyli kənara çıxır: “Layihə Azərbaycana yönəlib, lakin kibertəhlükələr mahiyyətcə transsərhəd olduğu üçün tərəfdaşlarla Avropa İttifaqı arasında əməkdaşlıq son dərəcə vacibdir. Bu, gündəlik istifadə etdiyimiz bank xidmətləri kimi həyati vacib xidmətlərin fasiləsizliyini təmin etmək üçün zəruridir. Biz bu təlimi ikitərəfli və həm Azərbaycan, həm də ekspert komandamız üçün faydalı etməyə çalışırıq”.

Avropadakı təcrübəmizi müzakirə etmək vacibdir

Baş ekspertin sözlərinə görə, söhbət yalnız biliklərin ötürülməsindən deyil, həm də Azərbaycan tərəfindən təhlükə vektorları və ən aktual risklər barədə geridönüşün alınmasından gedir: “Təhlükələrin minimuma endirilməsi üsullarını, Azərbaycanda mövcud təcrübəni, eləcə də Avropada dəyişən risk mənzərəsinə qarşı mübarizə təcrübəmizi müzakirə etmək vacibdir. Bununla yanaşı, biz insidentləri idarəetmə bölmələri, xüsusən də CERT komandaları üçün kurs keçiririk”.

Yeganə

Paylaş:

Baxılıb: 455 dəfə