SOS: Uşaqların gözü önündə qadınlara qarşı zorakılıq halları yolverilməzdir

Bakı:

18 °C

77 %

8 m/s

Əlaqə

AZ RU EN

Ana səhifə / MEDİA / SOS: Uşaqların gözü önündə qadınlara qarşı zorakılıq halları yolverilməzdir

SOS: Uşaqların gözü önündə qadınlara qarşı zorakılıq halları yolverilməzdir

20.09.2021 [14:04]

Müstəqilliyimizi qazandığımız ilk illərdən başlayaraq Azərbaycanda ailə dəyərlərinin qorunması və təbliği, qadın və uşaq hüquqlarının müdafiəsi, gender bərabərliyinin təmin edilməsi dövlət siyasətinin prioritet istiqamətlərindən biri kimi müəyyən edilib. Azərbaycanda gender siyasətinin müasir dövrün tələblərinə uyğun həyata keçirilməsinin hüquqi əsasını məhz Ulu Öndər Heydər Əliyevin təşəbbüsü və birbaşa rəhbərliyi altında 1995-ci il noyabrın 12-də qəbul olunmuş müstəqil Azərbaycanın Konstitusiyası təşkil edir. Azərbaycan Respublikasının Prezidenti İlham Əliyev tərəfindən aparılan uğurlu siyasətin nəticəsi olaraq ailə, qadın və uşaq hüquqlarının müdafiəsi istiqamətində mühüm nailiyyətlər əldə olunub. Xüsusilə də, bu sahədə bir sıra mühüm qanunlar qəbul edilib və davamlı islahatlar həyata keçirilib.

Hələ 15 il əvvəl – 2006-cı ildə qəbul olunmuş “Gender (kişi və qadın) bərabərliyinin təminatları haqqında” qanun qəbul edilib. Bu qanun cinsi mənsubiyyətə görə ayrıseçkiliyin bütün formalarını aradan qaldırmaqla kişi və qadınlara siyasi, iqtisadi, sosial, mədəni və digər sahələrdə bərabər imkanlar təsbit edir. Bu qanunun qəbulu ölkəmizdə gender bərabərliyinin təşviqi sahəsində atılmış mühüm addımdır. Bu qanunu qəbul etməklə Azərbaycan MDB-də və Avropa məkanında bir çox ölkələri qabaqlayıb. Həmçinin gender bərabərliyi haqqında qanun qəbul edildikdən sonra milli qanunvericilik bazası yenidən ekspertizadan keçirilib, bu qanundan irəli gələn zərurətə görə bir çox qanunlara, eləcə də məcəllələrə müvafiq əlavə və dəyişikliklər edilib.

Mövzu ilə bağlı qəzetimizə açıqlama verən Milli Məclisin Ailə, qadın və uşaq məsələləri komitəsinin sədr müavini Jalə Əliyeva bildirib ki, Azərbaycanda uğurla gender siyasəti həyata keçirilir. Onun sözlərinə görə, bu gün Azərbaycanda qadınlar dövlətin yaratdığı bütün imkanlardan istifadə edir, rəhbər vəzifələrdə çalışır, təhlükəsizlik, məhkəmə və hüquq-mühafizə orqanlarında, eləcə də sahibkarlıq sahəsində fəal təmsil olunurlar.

Deputat Azərbaycanda bir sıra mühüm vəzifələrə qadınların təyin edilməsinin, zərif cinsin nümayəndələrinin qanunverici orqanlarda, idarəçilikdə rolunun artırılmasının qadın liderlərin formalaşmasına böyük töhfə verdiyini qeyd edib.

“Bu gün Azərbaycan cəmiyyətində qadınların kişilərlə eyni müstəvidə çıxış etməsi və aralarında heç bir cinsi fərq qoyulmadan cəmiyyət həyatının bütün sahələrində fəaliyyət göstərə bilməsi günümüzün reallıqlarından biridir. Azərbaycan qadınına diqqət dövlət siyasətinin prioritet istiqamətlərindən biridir. Azərbaycan qadını artıq uzun illərdən bəri hələ Ulu Öndər Heydər Əliyevin siyasəti nəticəsində dövlət tərəfindən hər zaman himayə edilən, qayğı göstərilən, eyni zamanda, cəmiyyətin bütün sahələrində öz sözünü deyə bilən bir qüvvəyə çevrilib. Qadın Problemləri üzrə Dövlət Komitəsinin yaradılması da məhz dahi şəxsiyyətin ölkəmizə rəhbərliyi təsadüf edir. 2006-cı il fevralın 6-da Azərbaycan Respublikasının Prezidenti İlham Əliyevin Fərmanı ilə komitənin adı dəyişdirilərək Ailə, Qadın və Uşaq Problemləri üzrə Dövlət Komitəsi yaradıldı. Məqsəd ölkədə ailə və uşaq problemlərinin qadın problemləri ilə kompleks şəkildə öyrənilməsi və həll yollarının tapılması idi”, - deyə J.Əliyeva söyləyib.

Ölkəmizdə qadınlara və qızlara qarşı zorakılığın aradan qaldırılması sahəsində qanunvericilik bazası mövcuddur və daim təkmilləşir, qadınların hüquqlarının müdafiəsi üçün sosial proqramlar həyata keçirilir, davamlı olaraq maarifləndirmə kampaniyaları aparılır. Lakin bütün bunlara baxmayaraq, hələ də bütövlükdə, qadınlara qarşı zorakılıq tam şəkildə aradan qaldırılmayıb: “Ürək ağrısı ilə deməliyik ki, bu gün hələ də qadın ilə kişi arasındakı hüquq bərabərliyi cəmiyyətin ayrı-ayrı fərdləri tərəfindən pozulmaqdadır. Çox təəssüflər olsun ki, biz, demək olar hər gün məişət zorakılığı ilə bağlı xəbərlərlə qarşılaşırıq. Bu hallar çox vaxt azyaşlı uşaqların gözləri qarşısında baş verir. Bu uşaqlar daha sonra böyük bir psixoloji travma ilə qarşılaşırlar. Bütün bunlar, əlbəttə ki, qaçılmaz məsələlərdir. Biz gender siyasəti haqqında danışırıqsa, bu məsələlərin ətrafında mütləq həyəcan təbili çalmalıyıq və mütləq cəmiyyətimizi maarifləndirməliyik”.

Müşfiqə BAYRAMLI

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gender, ailə və demoqrafiya məsələlərinin işıqlandırılması” istiqaməti üzrə hazırlanmışdır

Paylaş:

Baxılıb: 676 dəfə