Təmiz mühit - sağlam həyat

Bakı:

25 °C

72 %

13 m/s

Əlaqə

AZ RU EN

Ana səhifə / MEDİA / Təmiz mühit - sağlam həyat

Təmiz mühit - sağlam həyat

28.03.2023 [11:15]

Ekologiyanın qorunması prioritetdir

Nicat Dilqəmli

Bütün dövrlər üçün aktuallığını saxlayan məsələlərdən biri də ətraf mühitin mühafizəsinin təmin edilməsidir. Təbiətin qorunması, yaşıllıqların daha da artırılması, zərərli maddələrin yer səthinə atılmaması və bu kimi digər bir çox önəmli məqamlara nəzər yetirdikdə ekoloji zəhərlənmənin təsirləri əhəmiyyətli dərəcədə azaldıla bilər. Reallıq isə bir qədər fərqlidir. Bütün sahələr sürətlə inkişaf etməkdədir. Bu isə yeni-yeni kəşflərin, müasir alətlərin, qurğuların yaradılmasını, onlardan geniş şəkildə istifadəni qaçılmaz edir. Son illərin təcrübəsinə nəzər yetirdikdə məlum olur ki, istehsalçıların xüsusi diqqət yetirdiyi məqamlardan biri də hazırlanan məhsulların ekoloji baxımdan zərərsiz olmasıdır.

Heç şübhəsiz, ətraf mühitin mühafizəsi istiqamətində atılan addımlar yalnız və yalnız istehsalat prosesində müxtəlif dəyişikliklərin tətbiq edilməsi ilə kifayətlənmir. Bu səbəbdəndir ki, dünya birliyi müxtəlif vaxtlarda qlobal istiləşmə, dünya okeanının çirklənməsi, ozon qatının dağılması, havanın və torpağın çirklənməsi, meşələrin, yaşıllığın məhvi kimi məsələlərlə əlaqədar olaraq cəmiyyətə çağırış edib. Günümüzdə də aidiyyəti qurumlar dinindən, dilindən, irqindən asılı olmayaraq hər kəsi bu məsələlərdə həmrəy olmağa çağırır. Hazırda ekologiyanın qorunması üçün davamlı olaraq tədbirlər həyata keçirilir, yeni-yeni layihələr, konsepsiyalar hazırlanır.

Qlobal çağırışlara hər zaman öz dəstəyi ilə seçilən ölkəmizdə də ekologiya və ətraf mühitin mühafizəsi məsələsi prioritetdir. Dövlət başçımızın imzaladığı müvafiq Fərman və Sərəncamlar əsasında həyata keçirilən layihələr deyilənləri bir daha təsdiq edir. Bu yerdə Prezident

İlham Əliyevin 2010-cu ili ölkədə “Ekologiya ili” elan etməsini xatırlatmaq yerinə düşər. Həm “Ekologiya ili” çərçivəsində, həm də qarşıdakı illər ərzində ölkə ərazisində milyonlarla ağacın əkilməsi, yeni parkların salınması və dövlət başçısının özünün şəxsən bu kampaniyalarda aktiv iştirakı ətraf mühitin qorunmasına xüsusi diqqətin əyani nümunəsidir.

Artıq bir neçə ildir ki, vətəndaş cəmiyyətinin nümayəndələri arasında ekoloji tədbirlərin həyata keçirilməsi davamlı hal alıb. Ətraf mühitin mühafizəsi, zərərli tullantılardan təmizlənməsi istiqamətində görülən işlərdə gənclərin xüsusi yeri vardır. Müvafiq qurumların təşkilatçılığı ilə keçirilən kampaniyalarda bu günə qədər minlərlə gəncin aktiv şəkildə iştirakı deyilənləri bir daha təsdiq edir. Analoji kampaniyaların təşkilinin davamlı xarakter daşıması olduqca qürurverici, sevindirici bir haldır. Məsələn, bugünlərdə “Batareyaları təhvil ver, təbiəti qoru” layihəsi çərçivəsində “Lankaran Springs Wellness Resort” ?oteli tərəfindən 63 kiloqram işlənmiş batareya təhvil verilərək “Təhlükəli Tullantılar” Məhdud Məsuliyyətli Cəmiyyətinə göndərilib. Ekologiya və Təbii Sərvətlər Nazirliyinin mətbuat xidmətindən ictimaiyyətə verilən məlumata görə, “Qırmızı Ürəklər” Fondu tərəfindən 2022-ci ilin may ayında start verilmiş layihə çərçivəsində bu günədək 425 kiloqram işlənmiş batareya toplanıb. Layihənin məqsədi insan sağlamlığına zərər verən, ətraf mühiti çirkləndirən istifadəyə yararsız elektrik batareyaların toplanaraq çeşidlənməsi və xüsusi şəraitdə zərərsizləşdirilməsidir. Nazirlik hər kəsi tullantıların çeşidlənməsi qaydalarına riayət etməyə, təhlükəli və istifadəyə yararsız batareyaların məişət tullantılarına qarışdırılmasına yol verməməyə və batareyalar üçün ayrılan xüsusi qutulardan istifadə etməyə çağırır.

Bundan başqa, Lənkəranda “Bir ağac-min nəfəs” devizi altında növbəti “Tullantıları tinglərə dəyiş” tingpaylama aksiyası da təşkil olunub. Nazirlik və “Bazarstore” marketlər şəbəkəsinin birgə təşkilatçılığı ilə keçirilən aksiya zamanı vətəndaşlar tərəfindən ümumi tutumu 316 litr olan şüşə tullantı təhvil verilib və əvəzində onlara ağac tingləri paylanılıb. Diqqət çəkən məqamlardan biri də aksiyada vətəndaşların olduqca fəal iştirak etməsi olub. Belə ki, aksiyalar müddətində ən çox şüşə tullantı burada təhvil verilib.

Həyata keçirilən layihələr ekologiya və ətraf mühitin mühafizəsi məsələsinin nə qədər aktual olduğunu bir daha ortaya qoymuş olur. Ölkəmizin ekologiyanın mühafizəsi istiqamətində əməli addımlar atan dövlətlər sırasında ilk sıralarda olması olduqca qürurvericidir.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Ekologiya və ətraf mühitin mühafizəsi” istiqaməti üzrə hazırlanmışdır

Paylaş:

Baxılıb: 1039 dəfə