Gənc nəsil!

Bakı:

29 °C

52 %

7 m/s

Əlaqə

AZ RU EN

Ana səhifə / MEDİA / Gənc nəsil!

Gənc nəsil!

14.06.2023 [10:37]

Millətin onurğa sütunu...

“Gənclik yeni nəsil deməkdir. Kökünə bağlı, əcdadının yolu ilə gedən, milli mənəvi dəyərlərinə sadiq, əyilməz, alnıaçıq, həm də tükənməz gücdür gənclik... Zamanın hər parçasını milləti, vətəni adına dəyərləndirən gənclik uca missiyaları çiynində daşıyan xalq qəhrəmanıdır”.

“Füyuzat” jurnalı

Yazıya “Füyuzat” jurnalından olan bu sətirlərlə başlamaq əbəs deyil. Bu fikirlər gəncliyin tam olaraq kimliyini göstərən əsas faktdır. Gələcəyimizin təminatçısı olan gənclik ən zəngin milli sərvətimizdir. Və hər bir millətin istər tərəqqisi, istərsə də tənəzzülü həmin millətin gənclərinin alacaqları tərbiyədən asılıdır.

Mövuzunu “Yeni Azərbaycan”a dəyərləndirən millət vəkili İlham Məmmədov bildirib ki, ölkəmizdə gənclərə qayğı dövlət siyasətinin mühüm tərkib hissəsidir. Deputatın fikrincə, hər bir ölkənin milli inkişaf siyasətinin əsasında dayanan fundamental faktorlardan biri də milli-mənəvi dəyərlər əsasında gənclərin inkişafı və tərbiyəsinin təmin edilməsidir: “Azərbaycan xalqı sahib olduğu mənəvi dəyərləri zənginləşdirərək, müasir çağırışlarla uzlaşdıraraq yaşatmaqdadır. Xalqımıza məxsus olan milli-mənəvi dəyərlər əsrlərdən keçərək bu günümüzə qədər gəlib çatıb. Bəlli olduğu kimi, milli dəyərlərin ən mühüm daşıyıcısı milli mədəniyyətdir. Mədəniyyətin nəsildən-nəslə ötürülməsi milli dəyərlərin də qorunması, yaşadılması deməkdir. Milli dəyərlərin təbliği təhsildə, milli ideologiyada, qanunvericilikdə, cəmiyyətdaxili münasibətlərdə geniş əksini tapıb”.

İ.Məmmədovun sözlərinə görə, mədəniyyətlərin bir-birinə nüfuz etdiyi və bəzi hallarda assimilyasiyaya uğradığı dövrdə xalqımızın milli-mənəvi keyfiyyətlərini mühafizə edərək gələcək nəslə ötürməsi irsimizin öyrənilib, qorunub saxlanma səviyyəsindən asılı olacaq: “Milli irsimizin mühafizəsi məsələsi Azərbaycan Respublikası Konstitusiyasının 40-cı maddəsində öz əksini tapıb: “Hər kəs tarixi, mədəni və mənəvi irsə hörmətlə yanaşmalı, ona qayğı göstərməli, tarix və mədəniyyət abidələrini qorumalıdır”.

Azərbaycandakı dövlət quruculuğu milli dəyərlərə söykənsə də, bu, heç də bəşəri dəyərlərin inkar olunması anlamına gəlmir. Çünki öz milli çalarları ilə digər xalqların mədəniyyətlərindən seçilən müasir Azərbaycan mədəniyyəti bəşəri dəyərlərlə də uzlaşır. Azərbaycan dünya mədəniyyətinə açıq olmaqla Qərbə inteqrasiya edən bir dövlətdir. Müasir qloballaşma prosesinin təsirləri burada da özünü göstərir. Lakin qloballaşmanın bir parçasına çevrilmək, ümumdünya mədəniyyətinin tərkib hissəsi olmaq milli özünəməxsusluğun, milli mədəniyyətin və dəyərlərin itirilməsi ilə müşayiət olunmamalıdır. Bu gün dövlətimizin bu məsələdə mövqeyi də dünya ilə harmonik inkişaf fonunda milli dəyərlərin qorunmasından ibarətdir”.

Parlament üzvü qeyd edib ki, gənclik bir millətin yaşaması, inkişafı üçün xalqın onurğa sütunudur: “Azərbaycanın suverenliyinin və ərazi bütövlüyünün qorunmasında, Vətənimizin torpaqlarının erməni işğalçılarından müdafiə edilməsində gedən döyüşlərdə qəhrəmanlıqla vuruşmuş və şəhid adına, Milli Qəhrəman adına layiq görülmüş minlərlə gənci var bu torpağın. Gənclərdə vətənpərvərlik hissinin müqəddəsliyi elə bir şəksiz və ülvi həqiqətdir ki, bu barədə danışmaq belə insanın qəlbini riqqətə gətirir. Gənclik dövlət, xalq, millət uğrunda öz evinin divarı üçün vuruşduğu kimi vuruşaraq gələcəyə gedən yolda zəfər çala bilər.

Bu gün hər bir sahədə əllərindən gələni əsirgəməyərək Vətənimizin adını göylərə qaldıran gənclərimiz hər birimizə örnəkdir. Vətənə, torpağa, bayrağa, xalqa sevgi ilə yaşayıb böyüyən gənclərimiz Vətən sevgisini, Vətənə bağlılığı tam anlamı ilə dərk edirlər. Bu gün Azərbaycan gənci başa düşür ki, Vətən dedikdə müəyyən sərhədləri olan bir torpaq sahəsi başa düşülmür. Vətən- ulu babalarımızın uyuduğu torpaq, gələcək nəsillərin yaşayış yeridir. Vətənpərvərlik hissi olmayan bir gəncdə əxlaqi kamillikdən danışmaq olmaz. İctimai səciyyə daşıyan vətənpərvərlik gənclərin vətəndaş kimi formalaşmasında mənəvi təsir gücünə malikdir. Doğma yurda sədaqət, həm də mövcud çətinlikdən qorxmayıb vətəndaşlıq mətanəti göstərmək deməkdir”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi” istiqaməti üzrə hazırlanmışdır

Paylaş:

Baxılıb: 818 dəfə